Bình Phước lac tỉnh bhum ceik di gah Đông Nam Bộ, hu 41 bangsa gam raidiuk, mikva bangsa takik meblah jaik 20% rahra. Puac thun 2021, dom baoh sang kan kathaot lac bangsa takik, meblah jaik 58% dom baoh sang dalam tỉnh. Bruk eik lipa kathaot rambah di mikva bangsa takik kayua rilo makna, njauk mayai nan lac bruk padang taneh riya, masaiy jien laba glaong oh biyar saiy hu saong njauk po masaiy mek taneh.

Bruk pablei asal pa-aok blait daok bingu, masaiy jien laba glaong, padang taneh di mikva bangsa takik rahtabiak meng lavik mai. Makna lac kayua mikva diuk meng bruk ngak nong, pala drak nan ye oh patak pataom hu jien padai, drap ar. Kayua yau nan ye, tuk dalam sang hu bruk caong tal njien njauk pablei  pa-aok blait daok bingu, padang, pablei taneh riya.

Anak bruk ini, tỉnh Bình Phước hu patabiak rilo harak gar piah paglaong bruk khik ramik, pacang caga bruk pablei pa-aok blait mada, masaiy phun jien laba glaong, padang taneh riya, pablei taneh dalam bhum mikva bangsa takik di dalam tỉnh. Dalam nan, khang hatai langyah kol pagam pambak tame tuk mikva bangsa takik gaok kan kandah piah palua pagait pablei pa-aok mada, brei masaiy phun jien laba glaong.

Langiu di nan, Mban Bangsa tỉnh hu peih rilo tal pathau khan ka hukum, pasram, pabak ilamo ka labaih 1.000 urang taha angan je dalam rahra. Meng nan, bruk pablei pa-aoak blait mada, padang taneh, masaiy laba glaong dalam bhum mikva bangsa takik hu trun khang.

Piah daong ka mikva yam tagok tabiak truh kan kandah, meng thun 2017 tal urak ini, Gilang paraik sarak kanja tỉnh hu peih ngak yaok piluh danak dak ka urang bangsa takik hu masaiy jien piah ngak mbang, pala drak. Gam tui di nan, dom sở, dom gah jhul khang bruk daong ba, tacei pato ilamo -kỹ thuật, salih janih phun pala, athur raong ka rahar, piah daong ka urang cak rok patagok bruk ngak mbang, pala drak, ba bruk ngak yaok harei, meng nan paglaong jien mek tame, tani tanat raidiuk.

Salih ka bruk pablei pa-aok blait daok mada, padang taneh riya piah mek jien cai pandar, urak ini, saai Điểu SRức (daok di palei Đắk Úy, xã Đắk Nhau, huyện Bù Đăng) hu daong sang daok, limo pajaih, pandap panda ngak nong saong hu masaiy 100 triệu đồng meng Gilang paraik sarak karja huyện. Meng phun jien ini, sang saai buh tame ngak pasiam bein pala, peih bruk pala pablak rilo janih phun mbang baoh, ba jien mek tame labaih 150 triệu đồng yaok thun. Tuk sang hu tani tanat, saai Điểu SRức hu daong ka dom urang kan kandah jang drei. Bahrau ini, saai hu alin 60m2 taneh ka sa baoh sang kan kandah daok dalam palei haong gauk piah kanja palei daong padang ngak sang daok, kuac bingun, dui talei điện.

Meng dom bruk daok rahtabiak urak ini, bahrau ini Ban Thường vụ Tỉnh ủy Bình Phước njauk gauk ba tabiak Danak dak bruk ngak negar cak rok patagok kinh tế-xã hội bhum mikva bangsa takik saong bhum ceik tukvak 2021-2030, dalam nan paglaong bruk jumpataom gauk dalam rahra, hatai caong cak rok patagok saong abih di nyu nan lac hatai kham marat yam tagok dalam raidiuk di mikva dom bangsa, pamaong tal bruk cak rok patagok taong abih gah.

Piah peih ngak bruk ini, Bình Phước daok buh jien tame dom bruk ngak hu makna praong saong khang kajap ka dom xa, puk, palei biak kan kandah. Abih di nyu nan lac iek praong bruk paglaong chất lượng pato ka dom ranaih lac bangsa takik saong brei pabak ilamo dahlau di abih, pandar dom urang ini tame ngak bruk kanja puk, palei.

Ong Điểu Nen, Phó akaok Mban Bangsa tỉnh Bình Phước brei thau, tinh biak sangka tal bruk pato pakai anek bhik  mikva bangsa takik, abih di nyu nan lac anek saih, sinh viên piah ka dom adei hu jalan patagok abih prein khang di drei, kham marat bac megru piah mek hu siam mekre di abih, piah harei hadei hu jeng rahra siam, naih joi, hu ilamo, hu đạo đức. hadei di tuk bac tamat blaoh, tinh rami ramik bruk ngak piah daong ka dom adei patagok hu prein khang daong ka bhap bini drei yam tagok ngak kaya mada./.