Tui takai sa-ai kamei Đỗ Thị Ngọc Về, Akaok Kapul Urang kamei xa Phú Hội (huyen An Phú, tinh An Giang), khol dahlak hulin duah tal sang sa-ai Phạm Thị Lộc, daok di puk Phú Trung, xa Phú Hội. Baoh sang praong labaih 40m2, baoh sang Balai Bien phong Phú Hội saong Kapul Urang kamei xa Phú Hội alin hadiah brei sa-ai Lộc dalam puac thun 2024.

Sa-ai Lộc ndom meyai lac, sang drei oh hu hamu apuh, dua diuk pasang ngak mbang meng bruk ngak pah, bruk ngak oh hu karo oh hu tai tanat. Baoh sang sit meng dahlau daih kayua amaik ame dua gah padang brei mbiah tal ini oh daok kajap, nyu tanje jaleih taik tahak, langik pandiak ye oh hu gait, tal tuk hajan praong ye lime urang di dalam baoh sang jhal gauk duah labik piah pandaok.

Dalam baoh sang anit ranam, sa-ai Lộc oh padauk hu hatai bui sambai haong haniem phol. Sa-ai Lộc ndom mayai lac: “Kuhria mboh baoh sang ini jien buh tabiak padang blaoh lac labaih 100 trieu dong, paok jien ini biak praong tui dua diuk pasang di drei. Meyah oh hu Kapul urang kamei saong Bol lin Bien phong daong ye oh thau tal tuk halei sang dahlak hulin meng hu sa labik karo kajap tani tanat piah sahnang hatai dalam raidiuk yau ye ini”.

Ngak tui Danak dak “Daong urang kamei bhum di tapen negar”, saong bruk hu angan makna dalam bruk peih ngak, yaok thun, Kapul urang kamei tinh An Giang pambuak haong Bol lin Bien phong tinh An Giang saong dom gah hu pambuak peih ngak rilo bruk lagaih yau ye: “Amaik raong”, “Baoh sang selamat haniem phol bhum tapen negar”; “Khik tani tanat saong padang bahrau dom bruk daok dang mbang ngui hu karo kajap di labik tapen negar”… tapa nan daong klah rabha saong dom kan kandah di urang kamei kathaot bhum tapen negar, daong ka adei sa-ai kamei uak drei tagok patruh kathaot.

Dalam thun 2024, Kapul urang kamei dalam tinh hu jak ba gah ngak pahla dhar phol mai rivang sua tangi, daong prein labaih 2.570 mbang uranaih metui kayua jit ruak COVID-19, alin hadiah labaih 14.260 paok pandap, jien tapak saong ndom ndap nda kaya njauk piah hu ka dom baoh sang kathaot, saong taong abih jien hu yaom labaih 8,3 ty dong.

Langiu di nan, piah daong urang kamei bhum di tapen negar uak drei tagok truh kathaot, Kapul Urang kamei dom xa di tapen negar daong ka adei sa-ai kamei patagok bruk ngak mbang, peih mbang ngui, pablei salih, yau ye: Daong ka 30 urang dalam kapul kan kandah peih bruk pablei salih sit; khik tani tanat 1 kapul urang kamei ngak ndap mbang meng ikan arik thu; daong bruk daok dang mbang ngui ka 20 baoh sang…

Taong yaom ka siam lagaih di Danak dak “Daong urang kamei bhum tapen negar” hu peih ngak di dom labik bhum tapen negar tinh An Giang, Thuong ta Nguyễn Văn Hiệp, Bi thu Ndang uy, Chinh uy Bol lin Bien phong tinh An Giang ndom mayai lac, ini ieu lac sa danak dak hu angan makna praong siam gheih; sa labik pambak, daong prein piah urang dalam kapul saong rahra bhum palei di tapen negar uak drei tagok truh kathaot, pasiam raidiuk. Gam saong di nan, brei kein lagaih piah rilo urang dalam kapul patagok saong brei mboh labik dang, bruk di drei dalam baoh sang saong bol bhap, rahra.

Tapa danak dak daong pathau khan, paglaong ilamo, bruk ngak vajip di jakar, Bol lin bien phong jeng yau urang kamei dalam kapul ka bruk padang saong pacang khik taneh riya, karo kajap di bhum tapen Negar; patagok hatai gul pataom di grauk bangsa, gul pataom bol lin haong rahra, padang majam phun dhan politik bhum tapen tasik hu khang kajap, daong padang hatai pacang khik dalam rahra, hatai caga dalam rahra khang kajap.

Tukvak meng anak mai tal, Kapul Urang kamei tinh An Giang patui bruk duah thau tani tanat hatai caong di co so, piah hu bruk daong ka njauk; gam haong di nan paglaong prein ngak ka jakar, urang dalam kapul, urang kamei dalam bruk hu mbaok tame langyah dom asal kadha di rahra, dom sarak di Kapul, danak dak padang palei pala bahrau, bruk urang likei kamei samu gauk, pacang khik alam langik tasik, pacang caga dom kanjah jhak dalam rahra, padang baoh sang sampurna salamat haniem phol, raong ba pato anek bik, ilamo daong urang kamei patagok bruk ngak mbang, patruh kathaot karo kajap./.