Urang ngak cong mbang jien dong pah sang 

Tui nan, piah khik kajap an sinh xã hội saong daong bruk ngak, Rajaei hu ba tabiak dom jalan ngak, lac: daong 3 bilan jien pah sang ka urang ngak hu pambuak bruk ngak, daok daok sang pah, daok trọ, ngak bruk dalam dom labik ngak kong, labik chế xuất, labik kinh tế praong. Yaom daong ka urang ngak mai veik ngak bruk lac 1 triệu đồng sa bilan saong urang ngak daok ngak bruk dalam dom doanh nghiệp lac 500.000 đồng sa bilan. Tukvak peih ngak lac dalam 6 bilan akaok thun 2022.

Tui sarak 11, Rajaei meda pandar jaik 6.600 tỉ đồng meng jien patagok mek tame, patak pataom pandar cai kadung jien pakat negar thun 2021 piah daong jien pah sang ka urang ngak. Rajaei brei bruk ka Mintri Lao động - Thương binh saong Xã hội dang tabiak, pambuak bruk haong dom tỉnh, ban pambuak tal, padang ngak, pok tagok Thủ tướng rajaei patabiak sarak ka bruk daong jien pah sang ka urang ngak tui bruk ba tabiak di sarak 11 pak di dalam bilan 2-2022.

Ong Lê Đình Quảng, Phaoak akaok mBan Sarak - Pháp luật Tổng LĐLĐ Việt Nam brei thau, sang daok lac bruk biak caong hu di urang ngak, abih di nyu lac urang ngak di dom labik ngak kong, labik chế xuất di dom ban praong. Jien pah sang meblah sa binah oh sit dalam dom yaom jien bo urang ngak njauk buh tabiak. Nan ye bruk rajaei brei daong 3 bilan jien pah sang lac bruk njauk ngak saong biak hu yaom ngan saong urang ngak.

Ong Lê Đình Quảng hu panuac lac : "Piah peih bruk daong ini, brei hu tacei pato cambaih laih meng dom mintri, dom gah. Ngan saong urang ngak daok ngak bruk di dom labik ngak kong, labik chế xuất, labik kinh tế praong…, njauk padang angan urang hu mbang tui saong hu jalan peih bruk yar jien daong. Bruk daong njauk peih ngak samar drah, pambuan dom janih harak gar piah palagaih ka urang ngak".

Tui ong Trần Văn Lâm, UV Thường trực UB jien padai – kadung jien di Quốc hội, dom sarak yau daong jien pah sang, brei mesraiy phun jien bac megru bruk ngak… lac piah langyah bruk daong ka urang ngak mai veik ngak bruk, ba bruk hit ngak mbang duah jien, khik kajap an sinh xã hội. Sarak ini daong ka urang ngak tani tanat bruk ngak, bo daok hu daong ka dom DN oh njauk klaih klaoh bruk hu pabak urang ngak. Ini lac sa jalan ngak samar, drah, lagaih, njauk haong bruk praong lac piah peih veik bruk ngak mbang kinh tế hadei di tuk jit praong Covid-19 hu pasang iek.

Ong Trần Văn Lâm ndom lac: "Bruk daong jien pah sang ka urang ngak lac bruk pambuak tal sarak, nan ye brei hu peih ngak samar drah, oh caik brei kurang, labaih saong brei njauk menuac, njauk urang". Rilo urang ngak biak bui samai tuk thau ka bruk daong ini. Ngan haong dom urang nan, yaom jien daong yaom lac oh rilo, min nyu hu makna pachreih ba biak praong tuk urang mai veik ngak bruk hadei di Tết. Saai Lê Thị Chi (daok di labik sang pah angaok jalan Tỉnh lộ 43, khu phố 2, phường Bình Chiểu, TP Thủ Đức, TP HCM) lac urang jhik di Cty TNHH Sprinta (KCX Linh Trung II), daok pasang likei lac jieng cơ khí di sa labik tư nhân. Luac dalam 4 bilan jit ruak, oh hu bruk ngak saong oh hu jien mek tame nan ye diuk pasang saai njauk payua anek sit (umo 12 thun saong umo 5 thun) nao palei ka gauk gar iek glang. Tukvak ini, diuk pasang saai diukrai meng hu brah, njam patam, baoh manuk ada kayua kanja saong dom kapul nyaom, dom urang ngak pahla daong brei. Urak ini, mahit lac hu jien daong pah sang trọ, diuk pasang saai uan tabuan lo.

Ong Wang Chen Yi, Tổng Yam ndoc Công ty TNHH EverWin (KCN Bình Chiểu, TP Thủ Đức), taong yaom glaong sarak daong ini di rajaei. Tui ong, nan lac bruk daong prein samar drah ka DN hadei di jit praong.

Ong Huỳnh Tấn Tài, Akaok Công đoàn Công ty TNHH Hong Ik Vina (KCX Tân Thuận, quận 7, TP HCM) brei thau, jit Covid-19 ngak ka rilo sang urang ngak laik tame kan kandah kayua lahik bruk ngak, trun takik jien mek tame. Rilo sang urang ngak lahik nao urang duah jien raong sang tuk diuk atau pasang metai lahik nao, anek jeng uranaih matui madar atau njauk payua nao palei ka ong muk, gauk gar daong raong. Ong Tài brei thau: "dahlak mboh ini lac sa sarak biak siam, klah rabha naong trak pah sang ka urang ngak hadei di sa thun bak kan kandah. Hu labik daok tani tanat, urang ngak meng sanang hatai ngak bruk, rik daong cak rok doanh nghiep saong rik daong ka bruk patagok di ban raya"./.

Urang lang: Mousaphuong -1/5