Pulao Hòn Chuối urak ini hu 68 sang gam haong 200 urang diukrai meng bruk raong ilan lồng bè saong taong cap kaya ikan. Piah nao tal urang jakar, urang lin saong bhap bini angaok pulao, kol dahlak brei pataok kapal gilai di langiu tasik, blaoh tapa ghaiy sit piah tame pulao kayua pulao urak ini ka oh hu tatua tame. Blaoh hadei di nan, kol dahlak nao takai labaih 1km tra, tapa labaih 300 takai kanyan glaong piah nao tal dom đơn vị daok angaok pulao.

Angaok jalan ndik kanyan, kol dahlak caik hatai tal sa baoh sang sit daok tapen jalan, hu pacang halui meng dom dhar kayau. Ini lac tal bac anit ranam. Bruk njauk menyai nan lac, tal bac hu tal 3 baoh bảng pagam tame 3 baoh daning, yaok baoh bảng hu asal bac karei gauk. Anak saih dalam tal jeng hu parabha jeng 3 kapul. Gru pato nao vil val piah pato ka anek saih tui yaok kapul.

Gru pato lac Thiếu tá Trần Bình Phục, Phaok akaok kapul jak ba bhap bini Đồn Biên phòng Hòn Chuối. Sa-ai tabiak pulao Hòn Chuối ngak bruk meng thun 2010 saong meng nan tal harei ini, hu brei bruk pato bac ka dom  adei sit angaok pulao meng tal 1 tal tal 7. Khan ka bruk 1 tal bac bo hu rilo umo thun, rilo danak dak bac karei gauk, thiếu tá Trần Bình Phục brei thau: “Lac tal bac pablak gauk, dahlau di tuk peih bac, dahlak brei bài ka dom adei tal bac sit, blaoh brei bruk ka dom adei tal bac praong mai sang tacei pato dom adei tal bac sit. Gam haong nan, dahlak pato pablak dom môn haong tukvak lagaih piah ka dom adei hu tukvak kuhria caga. Dom adei daok pak ini takik taom gaok haong gah langiu, takik thau bruk gah langiu nan ye tuk soạn giáo án, dahlak jeng pilih ruah dom bruk katut panak, mbuan mboh, mbuan thau piah pato ka dom adei”.

Tal bac anit ranam di Đồn Biên phòng Hòn Chuối hu peih tabiak meng thun 1995. Tuk camereip, tal bac lac sa baoh sang hala daning haluk, oh hu bàn, tok hu dom baoh khagaiy katak klak haong 4 adei sit tame bac. Tal thun 2016, Kapul dam dara tỉnh Cà Mau hu panuac ieu daong padang tal bac jeng baoh sang pakat 4 haong dom pandap pato bac yau ye: Bàn, ghế, bảng, phấn...

Bruk njauk uan tabuan di abih lac meng tal bac anit ranam labik pulao atah nan tal harei ini hu 7 adei hu tame baoh taneh bac saong pakacah tame đại học. Adei Nguyễn Văn Nguyên, sinh viên thun ka 3 sang bac Đại học Cần Thơ khan lac: “Adei biak thau dhar phor Gru Phục, meng hu Gru bo meng sa uraniah sit oh thau akhar haroh, adei hu tui jalan bac ta-a mbiah tal harei ini. Dalam dom thun bilan adei tame baoh taneh piah bac, Gru Phục jeng oh padeih sangka pachreih ba  adei kham merat bac ta-a. Gru Phục oh lac sa urang Gru bo daok yau menuac ralow darah dalam sang adei”.

Langiu bruk ngak di drei, dom urang lin biên phòng angaok pulao Hòn Chuối daok nao jak ba dom sang ba anek bhik di drei mai bac akhar haroh. Tapa nan, tal harei ini, taong abih dom adei sit jeng hu nao bac. Kayua jalan nao kan kandah, bilan hajan ribuk jalan jangar labuh mbuan ba tal bala, nan ye meng mon 6 meteh yaok dah mesup, anek saih pataom gauk di mala takai pulao piah hu urang jakar, urang lin ba tagok tal bac. Adei halei sit lo ye hu glăm angaok bara nao tal labik bac. Tui nan, harei harei, urang jakar, urang lin Đồn Biên phòng Hòn Chuối ba dom kamuan tame bac blaoh ba mai sang gilac veik.

Trung tá Lê Quốc Cường, Akaok Đồn Biên phòng Hòn Chuối brei thau: “Palahik bruk oh thau akhar haroh, paglaong akaok sahneng bol bhap rahra di dom bhum taphia negar, pulao kaoh, lac jalan ngak praong, bruk ngak praong dalam khik kajap bruk khik caga quyền ngak po bhum tapen negar di taneh ia. Nan ye, rilo thun tapa, Đồn Biên phòng Hòn Chuối tuk halei jeng sangka tal bruk pato pakai, bac ta-a ka dom uraniah sit angaok pulao. Thiếu tá Trần Bình Phục oh lac hu ayut sahabat anit ranam bo daok hu rahra angaok pulao abih hatai jia tui. Ngak siam bruk jak ba hu daong patagok talei jum pataom, kak kajap Ðảng haong bhap bini, pakhang bruk "thế trận lòng dân" pak di labik dak harei dak khang kajap”.

Urak ini, tal bac anit ranam hu pok angan lac sa labik pato bac di gah pato megru ban sit Sông Đốc, huyện Trần Văn Thời, tỉnh Cà Mau. Min labik pato daok sit sot, kurang rilo janih, nan ye rilo sang caong khin karja palei daong padang ngak sa sang bac praong siam piah ka dom adei sit angaok pulao nao bac ta-a hu siam jang, daong pambuak seok ka dom adei ngak hu dom caong khin di drei./.