Cuah tuh ngak pasiam mbaok taneh hu yaom labaih 230 ribau đồng/sa met khối, cuah padang sang jeng tagok tal tanut 320 ribau đồng/khối, min abih tih dom labik pablei pandap panda padang ngak jeng daok kurang. Labaih 2 adit ini mai, rilo urang ngak mbang pablei salih pandap panda dalam tỉnh Tiền Giang rahtabiak bruk kurang cuah piah tuh di mbaok taneh. Ong Nguyễn Minh Hải, po doanh nghiệp pablei salih pandap panda padang sang danaok di xã Bình Đức, huyện Châu Thành, tỉnh Tiền Giang jeng dreih yau dom urang ngak mbang pablei salih karei brei thau lac:“Atah di ini mateh bilan paje, dahlak hulin oh pablei salih hagait, hu. Dom harei ini oh hu cuah piah blei, urak ini likau caong ka dom labik kuac mek cuah di dalam tinh peih biak aval. Abih tih dom labik drei dak abih cuah. Dom urang ngak mbang blei salih hu harak pambuak gauk njauk taduan, oh njauk biyar jien dalam harak pambuak gauk min tapi oh peih ngak hu yau dalam harak pambuak gauk min”.

Cuah ieu lac sa janih pandap panda oh kurang hu dalam bruk ngak sang danaok, dalam nan hu dom danak dak ngak jalan mbak nao mai, pacang ar ribaong kraong… kayua kurang cuah yau nan ye ngak ka dom danak dak jalan mbak, ribaong kraong di dalam tỉnh Tiền Giang gaok biak rilo kan kandah, tui kuhria ba tal bruk suai damuai dut saong jalan ba tabiak. Ong Võ Văn Khánh, Yam ndok công ty TNHH Padang ngak Khánh Khanh di ban sit Cái Bè, huyện Cái Bè, tỉnh Tiền Giang – lac po thau padang ngak rilo danak dak jalan mbak ndem lac: “Meda lac hu kurang cuah min drei hu bruk karei piah plaih njaik, min tapi hagaik ngak meng cuah njauk suai tui masa caong khin . Thun ini, abih tih dom danak dak ye hu 99% danak dak cang hu cuah lam. Tui dahlak dom tinh, ban di ĐBSCL tỉnh halei kuac mek hu cuah ye daong ka dom tinh, ban jaik taphia klah rabha haong gauk tuk kan kandah. Yang ka dua di nyu ieu lac hu Rajaei brei ngak dahlau jalan nduac samar, tinh halei jeng rik tame sa manieng min, daok brei ngak dahlau jalan raya nduac samar, blaoh dom danak dak jeng phun jien nagar buh tame di tinh biak kan kandah”.

Di danak dak ngak tatua Rạch Miễu 2 pambuak pagam tỉnh Tiền Giang saong Bến Tre, bruk kurang cuah piah lam ngak pasiam mbaok taneh biak susah trak, rilo paok thau daok peih ngak njauk mateh dhua saong njauk brei padeih kayua kurang cuah. Ong Võ Quốc Cường, Phó Yam ndok Cty cổ phần xây dựng Tân Nam, dang ngak danak dak tatua Rạch Miễu 2 brei thau: “Di ini daok kan kandah susah mai mang kurang cuah, urak ini njauk brei padeih 2 adit paje kayua ka oh duah hu cuah piah ngak. Dom kapul di dom tinh, ban njauk pataom mek harak gar nan ye oh kuac mek hu, ba tal bruk ngak kan kandah tal jalan ba tabiak. Di ini jeng duh hatai khan tagok po buh jien tame ieu po buh jien tame daong duah cuah”.

Tỉnh Tiền Giang saong Bến Tre urak ini hu biak rilo danak dak daok padang ngak meng phun jien nagar buh tame di Kanja dom danak dak praong, yau ye tatua Mỹ Thuận 2, tatua Rạch Miễu 2, kênh Chợ Gạo, jalan tỉnh 864 Cái Bè- Gò Công (Tiền Giang). Masa mang anak di bhum ini daok hu rilo danak dak praong, yau ye danak dak pambuak jalan dalam bhum, pambuak bhum ini haong bhum diah yau ye danak jalan tapen tasik; danak ngak tatua Đình Khao (pambuak tinh Bến Tre haong tinh Vĩnh Long); jalan Đồng Tháp Mười (Tiền Giang), dom danak dak padang ngak labik ngak Kong, dom labik langyah labik glut labik jaleih takai kraong, ar tasik… kayua yau nan ye, gah pandap panda cuah pabak ka bruk pruh cuah ngak pasiam mbaok taneh, cuah padang ngak tatua ieu lac sa janih biak praong biak hana susah. Dalam tuk nan, dom labik kuac mek cuah hu blaoh danak dak, pasang iek di mangaok dom kraong praong di tỉnh Tiền Giang saong tinh Bến Tre suai peih ngak, dom jalan ngak, adat piah peih ngak dom labik mek cuah ka oh hu peih ngak samar drah, caong hu kanja saong dom gah karja di bhum palei sangka tal njauk bruk njauk ngak./.