Cty Cổ phần Tôn Đông Á urak ini hu jaik 1.300 urang ngak daok ngak bruk di dom sang mac di tỉnh Bình Dương. Yaom lac padang hu blaoh angan je saong hu darak pasar pablei tapa negar langiu rilo, min kayua pambak meng bruk mesruh metak, lạm phát, Cty jeng lahik nao rilo đơn hàng. Anak bruk yau nan, Cty samar drah brei duah jalan peih praong darak pasar dalam taneh ia saong pablei tapa negar langiu, khik bruk ngak tani tanat ka urang ngak. Ong Nguyễn Thanh Trung, Chủ tịch Hội đồng quản trị Cty Cổ phần Tôn Đông Á khan lac: "Prein blei di darak pasar dalam taneh ia trun 30%, Tôn Đông Á pabak veik meng bruk patagok bruk pablei di darak pasar negar langiu. Tal urak ini, Cty patagok bruk pablei tabiak negar langiu labaih 60%, khik kajap hu prein ngak labaih 95%, khik kajap bruk hit ngak mbang saong rik tame kadung jien karja.

Lac sa doanh nghiệp ngak nding katak pabak ka dom danak dak padang ngak dalam taneh ia min 2 thun mai ini darak pasar sang danaok taneh riya dang kandang, ngak ka Cty Cổ phần Nhựa Thiếu niên Tiền Phong gah Meraong daok di tỉnh Bình Dương gaok rilo kan kandah. Ong Hồ Phi Hải, Taong Yam ndok Cty Cổ phần Nhựa Thiếu niên Tiền Phong gah Meraong brei thau, Cty daok salih jalan pablei tabiak negar langiu, oh lac taok pablei dalam taneh ia yau dahlau daih:“Cty jeng daok kuhria ngak dom pandap bahrau piah pablei tapa negar langiu. Tui kuhria tal puac thun 2024 meda pablei nao Mỹ. Caong lac tal puac thun 2023, bruk meda hu siam jang tuk hu dom bruk ngak di Rajaei taoh talaih doanh nghiệp sang danaok taneh riya ye bruk meda hu hadah hadai jang”

Dalam tuk kan kandah haong gauk, doanh nghiệp caong khin tỉnh Bình Dương daong palagaih piah ka dom danak dak đầu tư công pandar pandap kayua dom Cty dalam taneh ia ngak tabiak. Gam haong nan, dui katut panak tukvak ngak harak gar ka doanh nghiệp.

Klah rabha kan kandah ka doanh nghiệp, urang pan akaok tỉnh Bình Dương jeng hu panuac ieu dom po đầu tư labik ngak kong pasang iek, daong patrun jien pah sang-xưởng ka doanh nghiệp. Urak ini dom po đầu tư labik ngak kong dalam tỉnh jeng hu trun yaom jien pah sang - xưởng ka doanh nghiệp meng 30-70%. Anak dom panuac caong di doanh nghiệp, bí thư Tỉnh ủy Nguyễn Văn Lợi brei thau: “Anak tal, Bình Dương meda salih bahrau adat ngak harak gar ka nyu siam jang, ba mbuan lagaih jang piah đầu tư, ngak pandap, cakrok, patagok. Urang pan akaok tỉnh bhian taom gaok dom doanh nghiep, dom hiệp hội ngành hàng, dom po đầu tư piah taoh talaih kan kandah, tavak tavaiy, meng nan ba mbuan lagaih di abih ka Bình Dương cakrok patagok.

Meng bruk daong prein di karja saong bruk kham merat yam tapa kan kandah piah yam tagok di doanh nghiệp bo kuhria tal harei ini, Bình Dương hu labaih 62 rabau doanh nghiệp dalam taneh ia tut angan haong yaom phun jien labaih 658 rabau tỷ đồng. /.