Rilo mblang radaih dok pataok cang tuai 

   Meyah dahlau daih, jien xăng menyek meblah 40% yaom phun jien pajeng ba, ye urak ini nyu tagok tal jaik 80% tuk yaom xăng tapa tanut 33.000 đồng sa lít. Tuk yaom xăng menyek tagok yau urak ini, DN pajeng ba halei rilo takik daok ngak bruk hu, lac biak patuah, min rilo meng lac piah khik mối hàng ngak mbang. Ong Hoàng Tuấn Anh, Yam ndok Cty pajeng ba Phú Anh brei thau: Dom DN dalam taneh ia jeng gaok kan kandah nan ye kol dahlak kan piah tagok yaom pajeng ba.

        Dahlak sahneng mboh lac dom DN jeng gaok kan kandah, caong hu Karja daong. Pandap takik, radaih takik nao, min jien phí jalan mbak 1 thun jeng abih 18 triệu đồng sa radaih, gam haong nan, lac bảo hiểm dom janih. Urak ini pajeng ba angaok jalan abih jien phí đường bộ biak rilo, dahlak mboh lac Karja njauk daong ka DN piah yam tapa kan kandah.

      Meng akaok thun tal ini, yaom xăng menyek dalam taneh ia tagok 12 mbang, trun 3 mbang, ngak ka dom DN taxi dang anak bruk lac brei tagok yaom atau taduan khat. Tagok yaom atau oh, tagok yau habar ka nyu lagaih, lac bruk daok ngak brei dom DN pandik akaok kuhri kuhria. Kan kandah abih urak ini lac urang peih radaih taxi chạy khoán, atau taxi công nghệ, tuk yaom xăng menyek tagok glaong, gam haong rilo jien chi phí karei tagok tui, min gah DN jeng mek tame hu labaih 30%, nan ye radaih dak peih dak khat. Ong Nguyễn Công Hùng, Yam ndok Mai Linh bhum I, Chủ tịch Hiệp hội taxi Hà Nội brei thau: Meyah oh tagok yaom, DN njauk daong jien xăng ka urang peih radaih. Meyah oh daong, urang peih radaih njauk padeih peih.

       Bruk ramik veik yaom, kol dahlak daok kuhri kuhria ka nyu lagaih. Urak ini yaom pajeng ba di ban raya HCM saong Đà Nẵng daok glaong jang meng 1 rabau tal sa rabau 500 đồng sa km. Kol dahlak daok pambuak bruk haong dom DN ramik veik yaom ka nyu lagaih haong dom ban Trung ương

       Tui kuhria, xăng menyek tok meblah 2 - 3% chi phí di abih nền kinh tế taneh ia drei, min nyu pambak biak praong tal yaok gah dalam bruk ngak kinh tế, abih di nyu lac ngan saong urang hu jien mek tame takik. Tuk xăng tagok yaom, dom janih pandap panda, pandap tamo piah ngak jeng tagok tui, ngak trak damak ka DN, kan kandah tal bruk pasiam veik sản xuất, bruk pablei tabiak negar langiu saong blei tame taneh ia dom pandap panda hadei di jit praong Covid-19. Dom gah gaok kan kandah rilo abih meng bruk tagok yaom xăng menyek lac gah pajeng ba, logistics, taong cap ikan di tasik atah saong gah ngak nong. Ong Bùi Danh Liên, Phó Chủ tịch Hiệp hội pajeng ba Hà Nội, brei thau hatai sahneng di drei yau ini:

Hu biak rilo jalan ngak hu sahneng tal, dom jalan ngak nan jeng oh ngak brei yaom xăng menyek trun hu hadom. Tal tuk ini, Karja njauk hu pok jien daong hu  yaom xăng menyek saong sản xuất meng tani tanat hu.

Bahrau ini, sarak di Mintri Jien padai trun jien je khik caga môi trường xăng menyek meng 500-1.000 đồng sa lít lac sa kham merat piah daong yaom xăng menyek dalam taneh ia di tuk kan kandah. Tui dom chuyên gia kinh tế, yaom xăng menyek oh ka dang veik di tanut yau urak ini, bo daok tagok gac. Tuk yaom xăng menyek dunya tagok, kadung jien khik tani tanat oh naong hu lavik tuk yaom xăng menyek dunya tagok glaong. Chuyên gia kinh tế Nguyễn Minh Phong ba tabiak dom jalan ngak yau ini: taphia bruk kham merat di Rajaei, ye dom DN jeng brei hu dom kham merat, klah rabha kan kandah haong dom DN pajeng ba saong urang ngak.

Bruk di Karja lac duah rilo labik pabak brei haong yaom lap, duah hu labik pablei brei haong yaom lap. Patagok labik pabak dalam taneh ia tui jalan pasiam veik công suất sang mac Nghi Sơn haong dom gah karei. Khik ramik siam darak pasar, meyah yaom tagok gac njauk pasang iek brei trun gac dom yaom jien mek tame kadung jien karja.

Hu thau, Liên đoàn Thương mại saong Công nghiệp Việt Nam (VCCI) jeng hu harak njauk hatai haong panuac ba tabiak di Mintri jien padai ka bruk trun kak je xăng menyek piah pabak bruk pasang iek lạm phát, tani tanat kinh tế, daong ka DN saong pasiam veik kinh tế dalam tukvak urak ini./.

Urang lang: Mousaphuong- 3/7