Pablei kaya nong tabiak negar langiu tukvak tapa hu patagok, dak harei dak hu rilo jang pandap panda hu pablei tapa dom darak pasa kan tame. Min, bruk yaok piluh tal yaok ratuh container kaya nong Việt Nam njauk biyar mai veik kayua oh pabak hu tanut chuan salamat jeng lac bruk oh kan mboh.  

Tui amuk Hồ Đức Minh, Phó yam ndok Công ty TNHH Pablei tabiak negar langiu Vạn Xuân Phát – sa dalam 25 labik tame paok, hu pabak mã số pablei baoh durain tui jalan chính ngạch tapa Trung Quốc, caong hu labik pablei tani tanat ye urang nong brei ngak njauk gah chất lượng, abih di nyu nan lac bruk salamat di pandap panda. Min urak ini, bruk “ban thei - thei ngak, ban thei - thei pablei” daok rahtabiak biak rilo, ba tal bruk oh pasang iek hu chất lượng, ngak patrun yaom kaya nong Việt saong patrun angan je di gah pablei tabiak negar langiu. Amuk Minh lac: “Bruk salamat, thau pasang iek saong taduan bruk ngak di drei lac dom bruk bo urang pablei salih njauk taduan. Mayah ndem lac urang nong oh thau cambaih bruk ngak di drei dalam chuỗi cung ứng lac oh njauk, urang nong biak thau janih baoh kayau bo drei pala lac bruk camriep dalam harak pambuak bruk bo urang blei meda pablei hu. Min biak di nyu urang nong jeng ka oh thau hu pandap panda hu tanut chuan meng pambuak hu haong yaom glaong”.

Tuk pablei pandap tapa Trung Quốc, jaik di ini gah blei di taneh ia ini ngak catang jang, pasang iek tani tanat yaok janih pandap, tanut njaom nerak vi sinh... Taneh ia ini jeng ieu kakei dom pandap panda kaya nong njauk cih vak cambaih harei paik, harei tame paok, harei ba tame kho laar. Daok dom darak pasa, yau ye: Mỹ, EU, Úc, Nhật, Canada... ye kaya nong Việt daok dang anak rilo paga pacang gah kỹ thuật biak catang, abih di nyu nan lac bruk salamat, chất lượng, asal di pandap. Ong Henry Bùi, Tong Yam ndok Cty công nghệ Hoàn Vũ – lac sa dalam dom labik pasang iek  taong yaom pandap panda ka darak pasa Mỹ, EU brei thau lac, rilo darak pasa dak harei dak catang jang ngan haong dom pandap panda di Việt Nam: “Tal tukvak ini bo khol drei jeng daok pandar tal bruk dut iek tanut phân tử piah taong yaom bruk bleik saleik dalam pablei salih. Gah pambuak bruk urang ngak catang tal tanut oh lac blei sa pandap salamat bo daok caong thau pandap ini mai meng halei”.

Tui ong Phạm Quốc Liêm, Tong Yam ndok Cty Cổ phần ngak nong Unifarm, jalan ngak siam di abih meda salih bruk bhian randap di urang nong lac pandar bruk “cambaih laih ka salamat – cambaih laih ka kein laba”. Nan lac, urang nong haong doanh nghiệp "blei haong gauk, ngak haong gauk, pablei haong gauk”. Cty di ong Liêm hu peih ngak bruk ini haong dom sang urang nong pala patei, dưa lưới pablei tabiak negar langiu di tỉnh Bình Dương. Doanh nghiệp, hợp tác xã blei veik abih pandap haong yaom tani tanat dalam tukvak suai lavik: “Hu tukvak yaom tagok glaong ye urang nong pablei tabiak gah langiu, atau hu tukvak yaom bier ye HTX, doanh nghiệp ngak kan kandah meng bruk ba tanut chuan tagok glaong. Bruk nan ngak ka dua gah oh jia tame gauk, ba tal talei pambuak bruk nyu jaoh jaleih. Dahlak hu pambuak gauk haong urang nong piah ba tabiak bruk ngak, cambaih laih yaok janih jien buh tame, daok veik lac parabha ka urang nong”.

 Piah kaya nong Việt Nam meda pablei tabiak negar langiu dak harei dak rilo tame dom darak pasa kan tame, njauk langyah bruk ban thei thei ngak, pandap panda oh yau gauk. Kayua yau nan ye, bruk ngak njauk jalan “cambaih laih ka salamat – cambaih laih ka kein laba” lac sa jalan ngak siam, pachreih dom manuac urang, kapul nyaom pambuak gauk buh jien tame, pambuak gauk ngak jeng chuỗi pablei pandap panda, gam eng drei taduan bruk ngak saong hu khik ramik cambaih laih./.