Rilo DN di Binh Duong takik don dat hang, urang ngak lihik bruk 

Dahlau deih, ong Nguyễn Hữu Thanh (umo 42 thun, palei daok di An Giang) lac urang ngak di  sa công ty kayau di ban sit  Tân Uyên, tỉnh Bình Dương, min hadei di nan padeih ngak kayua Cty brei urang ngak padeih meneing. Ong nao likau bruk di sa công ty kayau karei, min jeng hu dom bilan bloh padeih. Urak ni, yaok bilan ginup janih jien pandar cai, yau mbang, dok, anek bhik bac daa, nan ye oh hu bruk ngak harei halei lac harei nan ong Thanh mbang, ndih oh bingi:

“Dom bilan ni mai, oh hu jien, nan ye, hulin khin duah bruk ngak tani tanat, abih di nyu nan lac di dom  công ty hu  tăng ca piah tagok jien mek tame , kuhria ka rai duik pak ni song amaik taha di palei ”)

Rai duik sang muk Lý Cẩm Vân (umo 35 thun, palei di Sóc Trăng) rilo bilan tapa jeng kurang anak kurang likuk. Kayua công ty takik bruk, tok taduan hu  70% jien bilan, samu 3 triệu đồng, nan ye, muk padeih bruk. Klaak  công ty klak, sahneng lac mbuan duah hu bruk ngak bahrau, min, nao tal halei, muk jeng oh hu thei pah ngak hagait. Pan di mangaok tangin harak likau bruk, dang anak sa công ty di Khu công nghiệp Kim Huy, ban  Thủ Dầu Một, muk  Lý Cẩm Vân lac:

“Urak ni urang ngak oh hu bruk ngak rilo lo, nao likau bruk rilo, min công ty oh palih ruah. Hu  công ty ni palih ruah, min meng mesup mai tok palih ruah dom urang, meda lac hu menuac krein payua tame. Hu rilo menuac daok dang cang, bo oh mboh thei palih ruah".

Dahlau deih, tuk drak pasa urang ngak di Bình Dương chreih chrai, doanh nghiệp nao duah urang ngak; bruk  palih ruah biak mbuan, oh cang hu bằng cấp, oh cang thau ngak. Min, urak ni, nyu cagar veik, urang ngak, eng drei nao duah bruk , song bruk palih ruah di doanh nghiệp nyu glong jang, ieu urang ngak brei thau bruk ngak. Nan ye urang ngak phổ thông di  Bình Dương ba harak gar nao likau bruk di grauk labik, min, oh duah hu bruk ngak.

Di mbang taom gaok haong urang pan akaok tỉnh Bình Dương di bilan 8/2022, dom doanh nghiệp brei thau, darak pasar praong yau Mỹ, châu Âu hu đơn hàng trun daok takik. Taphia di nan, yaom pandap tamo piah ngak, pajeng ba  jeng tagok khang, ba tal bruk rilo sang mac ngak takik veik, daok meng 30-50% prein ngak min. Ong Nguyễn Liêm, urang dang akaok Hiệp hội ngak kayau Bình Dương brei thau doanh nghiệp gah kayau daok kham merat duah đơn hàng, khik bruk ngak:

“Kol dahlak nao duah dom đơn hàng sit jang hasit song trun menieng  chuyền, atau trun tuk vak ngak, cang darak pasa siam veik . Kol dahlak jeng kham merat pambuak bruk song gauk, klah rabha đơn hàng piah khik takai urang ngak”

Tui kuhria mboh dahlau di Sở Lao động-Thương binh song Xã hội tỉnh Bình Dương, quý 4/2022, bruk caong hu urang ngak di doanh nghiệp lac meng  5.000 tal 10.000 urang ngak di taong abih gah ngak, takik jang dom thun dahlau meng  20.000-30.000 urang ngak. Ong Phạm Văn Tuyên, Phaok Yam ndok Sở brei thau, kayua bruk  trun urang ngak, nan ye, 9 bilan tapa hu rilo urang ngak caong hu mbang jien thất nghiệp song hu  68.000 urang hu bayar brei bloh. Ong Tuyên lac

“Kol dahlak kham merat jhul samar bruk dong jien pah sang ka urang ngak tui sarak  08 di  Thủ tướng rajaei. Urak ni, Pasak  Dịch vụ bruk ngak bhian tacei jalan, yaih khan bruk ngak bahrau ka urang ngak, tuk urang mai tut angan tame likau mbang bảo hiểm thất nghiệp”.

Bình Dương hu mong lac “Pasak ngak cong” ngan song yaok ribau  doanh nghiệp, dui pachreih hu rilo urang ngak. Piah dong ka urang ngak yam tapa kan kandah di anak meta, jabat hu dong jien pah sang  tui sarak 08 ka labaih  80% urang. Dalam tuk kan kandah yau urak ni, langiu di bruk kham merat di doanh nghiệp, ye karja brei hu rilo jang sarak dong. Ni jeng lac, bruk dong ka rilo urang buh jien tabiak ngak mbang palih ruah Bình Dương ngak labik tal, dui pachreih urang ngak biak rilo, tuk bruk kinh tế tani tanat./.

Urang lang: Hanipha- 21/9