Rilo anek saih palih ruah sang bac biak kan kandah 

Urak ini rilo sang bac Tiểu học hu labaih 45 anek saih sa tal bac, lac oh lagaih ka bruk khik ramik saong ka chất lượng pato pakai. Gam haong nan, mblang me-in, mblang pasram, gilang tapuk jeng brei ngak sit veik, srau kadau tal dom tal daok bac. Bruk tagok rilo anek saih ba tal tagok dom urang jakar, gru pato, menuac ngak saong tagok biên chế ba tal tagok jien buh tabiak di kadung jien karja ban raya.

Ong Hồ Tấn Minh - Chánh văn phòng Sở Pato Megru ban raya Hồ Chí Minh brei thau, urak ini dom huyện bhum atah bayah yau Bình Chánh, Cần Giờ, Củ Chi, Hóc Môn kan pilih ruah hu gru pato sap Anh saong Tin học. Gam haong nan, thun bac ini, lac thun bac camereip ban raya Hồ Chí Minh peih ngak Danak dak pato pakai phổ thông 2018 di tal bac 10, nan ye bruk pilih ruah gru pato di gah nghệ thuật yau Âm nhạc, Mỹ thuật, Công nghệ jeng gaok rilo kan kandah.

Ong Hồ Tấn Minh mboh lac, ban raya Hồ Chí Minh kurang gru pato sap Anh saong Tin học lac kayua kurang menuac piah pilih ruah. Kayua lac tuk hu pato megru tamat blaoh, dom sinh viên bhian nao ngak gah langiu jang nao pato bac. Kol dahlak jeng daok kham merat peih rilo jalan ngak piah khik kajap quyền lợi di anek saih hu mbang tui rilo di abih.

Daok ngan haong bruk gru pato di dom môn nghệ thuật, ong Hồ Tấn Minh mboh lac, ini bruk kan kandah yau gauk di dalam taneh ia. Dahlau daih, dom sang bac pato pakai gru pato, oh mbak carak haong bruk pato pakai gah ini. Dom sang bac pato pakai cử nhân di gah ini ye tavak quy định ka nghiệp vụ sư phạm. Piah langyah bruk kan kandah ini, urak ini Sở Pato Megru daok pambuak bruk haong dom sang bac đại học sư phạm di ban raya Hồ Chí Minh pato pakai nghiệp vụ sư phạm ka dom nghệ sĩ, nghệ nhân hu bac tamat bloh đại học chuyên ngành piah tabiak pato pakai.

Jeng tui ong Hồ Tấn Minh, piah hu ginup gru pato ka Danak dak pato pakai phổ thông thun 2018, Sở Pato Megru daok ba tabiak rilo jalan ngak. Tui nan, Sở tacei pato hiệu trưởng sang bac công lập trực thuộc padang bruk nhân sự iek tui bruk hu parabha brei, tui tanut ba tabiak saong tui bruk di anak meta piah pathau khan bruk caong khin ka langyah salih labik ngak, ka pilih ruah bahrau viên chức.

Taphia nan, peih bruk pilih ruah 2 mbang ngan saong dom sang bac oh ka hu parabha pakat pilih ruah. Daok dom sang bac hu parabha pakat pilih ruah saong tự chủ jien padai ye peih bruk pilih ruah tui prein di drei saong tui bruk caong hu. Brei thau cambaih bruk caong pilih ruah di taong abih dom sang bac di mangaok blah web di Sở pato Megru.

Langiu di nan, di dom gah gru pato kurang menuac piah pilih ruah yau Công nghệ, Tin học saong gru pato môn bahrau lac Âm nhạc saong Mỹ thuật, Sở Pato Megru tacei pato taong abih dom sang bac brei thau pambuak gauk piah klah rabha gru pato thỉnh giảng atau mbaoh tangin pambuak bruk katut panak tukvak min dom sang bac ini brei pabak hu tanut ka ilamu pato, pasram paglaong ilamu ngak bruk, ilamu pato pakai lagaih haong pakat bac./.

Urang lang: Hanipha- 18/8