Hadei di 4 thun mai daok dalam baoh sang jaik taphia gauk di labik daok tapen negar xã Thanh Hòa, huyện Bù Đốp, tỉnh Bình Phước, sang ong Dương Danh Sơn, ndih tapui thun 1962, palei daok di Hương Khê, tỉnh Hà Tĩnh hu raidiuk ginup meda jang.

Ong Sơn khan lac, meng hu Trung đoàn 717, Binh đoàn 16 saong Quân khu 7 sangka tal dom baoh sang kan kandah, oh ka hu sang daok, oh ka hu bruk ngak tani tanat bo sang ong hu tame daok di labik ini. Meng tuk mai daok di labik tapen negar ini, ong Sơn nao kuah katak, salah bruk blaoh, ong daok di sang daong diuk anek pablei tạp hóa, jien mek tame hu tani tanat labaih 10 triệu đồng yaok bilan. Abih gauk dalam sang hu daok dalam baoh sang siam praong labaih 70m2, hu điện, hu ia, hu jalan nhựa samu tapak meng labik daok nao tal pasak xã.

Bruk bui sambai di sang ong Sơn jeng lac bruk bui sambai di labaih 50 sang bhap bini haong 177 menuac daok di labik tapen negar xã Thanh Hòa, huyện Bù Đốp. Ong Sơn lac: "Tuk roya rija karja palei saong trung ương jeng hu brei pandap, sangka raidiuk ka mikva labik ini hu ginup abih. Yau nan mikva urak ini sahnang hatai kuhria ngak mbang, tani tanat raidiuk. Mikva urak ini daong ba gauk, kak kajap haong karja dom pakat di tapen negar piah khik taneh, khik caga bhum tapen negar".

Angaok dom labik daok jaik tapen negar, rilo rahra kan kandah, bhap bini bangsa takik hu brei sang, tani tanat raidiuk bo daok hu ba brei bruk ngak. Tui ong Nguyễn Văn Lành, Phó Bí thư Đảng ủy xã Thanh Hòa, huyện Bù Đốp, langiu dom labik dalam tỉnh hu rami ramik taneh piah mikva pala drak, biak caong hu Quân khu 7 saong dom gah daong taneh pala drak ka mikva dalam palei: " Piah ka mikva hu raidiuk dak harei dak tani tanat, tagok glaong jang, jeng caong hu sangka jang labik bac ta-a ka dom anek kamuan hu bac ta-a jaik sang jang, blaoh padang bilai iek ruak. Abih di nyu lac daong ka mikva taneh riya piah jhul khang jang bruk pala drak ".

Urak ini, bruk padang ngak dom labik daok di bhum tapen negar huyện Bù Đốp jeng yau di Bình Phước, hu ngak brei salih  bahrau mbaok meta bhum tapen negar. Đại tá Nguyễn Thành Ruân - Phó Chính ủy Bộ Chỉ huy quân sự tỉnh Bình Phước brei thau, hadei di 4 thun peih ngak danak dak, angaok jalan tapen negar tỉnh ini padang ngak hu 150 baoh sang brei ka 150 sang bhap bini di 11 labik daok tapen negar haong yaom jien abih tih labaih 54 tỷ đồng. Dalam nan, kadung jien karja tỉnh labaih 34 tỷ đồng, Bộ Tư lệnh Quân khu 7 daong labaih 9 tỷ đồng, Bộ chỉ huy Quân sự tỉnh rik tame labaih 3,5 tỷ đồng. Langiu di nan, yaok sang hu brei meng 360 - 5.000m2 taneh daok saong pala drak…

" Bộ Chỉ huy quân sự tỉnh Bình Phước saong dom doanh nghiệp labik ini sanya peih ngak dom bruk hu mbaoh tangin blaoh. Abih di nyu lac khik kajap an ninh chính trị, daong ka bhap bini cakrok bruk ngak mbang kinh tế gam haong padang ngak labik pacang khik tỉnh dak harei dak khang kajap…"

Meng thun 2019 tal urak ini, Quân khu 7 hu pambuak bruk haong dom puk palei padang ngak hu 43 labik haong 411 baoh sang daok jaik tapen negar di Bình Phước, Tây Ninh saong Long An. Abih tih yaom jien padang ngak jaik 128 tỷ đồng. Dalam nan, Bộ tư lệnh Quân khu 7 buh tabiak jaik 34 tỷ đồng, daok veik lac di dom puk palei dalam labik quân khu saong rahra rik daong tame.

Dom labik daok di bhap bini jeng hu karja rami ramik taneh padang ngak sang, taneh pala drak, jalan mbak, điện, ia, internet saong pambuak dom danak dak kein laba ka bhap bini, yau ye sang ilamu, sang bac, bilai iek ruak, gam haong nan, sangka ba bruk ngak ka bhap bini. Menuac sia bhum tapen negar jum pataom gauk, tani tanat raidiuk, sa hatung hatai haong gauk daong khik caga bhum tapen negar di taneh ia./.