Dom bruk ngak di dom urang nan dalam joa kandang, takik menuac thau tal, min yaok harei, yaok tuk daok daong pambak tabiak dom siam mekre dalam raidiuk. Kadha vak di urang pambuak bruk haong danak dak, lac Trọng Danh, brei thau ka dom baoh sang Khmer njauk ndom tal, abih hatung hatian brei ka puk palei, ka bhap bini. 

Yaok harei, tal puac biar harei, di mblang bein anak sang sa-ai Thạch Kên daok di palei An Phú, ban sit Kế Sách, huyện Kế Sách, tỉnh Sóc Trăng lac labik uranaih mai pataom gauk biak rilo piah caga tame tal bac. Dom adei tuk tame tal bac, hu bac sap Khmer meng biar tal glaong. Hadei di mon bac, gru Kên daok hu pato dom kadha me-in, daoh tamia, ngak jeng mblang me-in khang kadang saong daong ka dom adei bac ta-a hu siam jang. Adei Thạch Lâm Hoàng Phúc – anek saih di tal bac ini, khan lac:  “Adei thun ini bac tal 12, meng dahlau mai adei oh thau akhar haroh Khmer, tuk tame tal bac ini, adei bac hu, vak hu saong lang hu meng sap Việt tapa sap Khmer, adei caong khin bac tra…”

Bruk peih tal bac lac oh mbuan, min piah khik hu dom anek saih mai bac, ngan saong sa-ai Thạch Kên lac bruk dak kan kandah jang. Kayua lac, rilo adei mai bac hu thar vak karei di gauk. Hu adei sang kan kandah, njauk nao ngak mbang pah piah duah jien daong ka amik ame. Tuk nan, dua diuk pasang ginum haong gauk jalan ngak lagaih piah jak ba dom adei mai bac, sa-ai Kên brei thau: “Dahlak kham merat pato dua - dua sap Việt – Khmer ka dom adei, kayua hu dom adei jeng oh ka thau sap Việt nan ye dahlak jak ba dom adei mai bac. Tuk camereip jeng gaok kan kandah, hu menuac ndom lac sap Khmer thau atau oh thau jeng oh hu hagait, nan ye drei nao jak ba, langyah brei mikva thau ka yaom glaong di bruk bac ta-a. Hu tuk gaok sang kan kandah lo, drei daok brei jien saong brah”.

Meng hatai caong ba sap ndom panuac puac, akhar haroh di bangsa nao tal dom adei daok di bhum palei kan kathaot piah khik ramik saong patagok yaom glaong sap ndom biai, akhar haroh di bangsa; hu bruk pachreih tui di diuk kumei di drei, nan ye diuk pasang sa-ai kham merat khik ramik tal bac mbiah tal harei ini. Sa-ai Lâm Thị Kiều My – diuk kumei di sa-ai Thạch Kên bui sambai khan lac: “Mboh pasang likei ngak bruk hu kein ka mikva, dahlak bui sambai lo, nan ye tuk halei jeng pachreih tui pasang likei peih tal bac, kayua dahlau daih drei oh hu nao bac sap Khmer yau dom adei urak ini”.

 Daok di bhum palei Phước Thuận, xã Phú Tân, huyện Châu Thành hu diuk pasang sa-ai Triệu Thị Vui eng drei peih tal pato cih rup cih angaok kreih camin ka mikva. Hu karja daong jien nan ye 30 urang bac di tal bac ini oh bayar jien hagait. Sa-ai Triệu Thị Vui khan lac: hu rilo menuac khik bruk ngak meng kan nan ye sa-ai bui sambai lo: “Caong lac dom adei bac ta-a siam, dhar phor Đảng saong Karja hu daong jien ka tal bac, daong kik, papan.. ka dom adei”.

Langiu di bruk pato cih rup cih angaok kreih camin, diuk pasang sa-ai Vui daok hu pato urang bac ngak pa-op caik hala paneing, caik pandap paling yang. Ini lac pandap oh kurang hu dalam adat cambat di urang Khmer. Meng hatung hatian di drei, diuk pasang sa-ai Vui kham merat khik ramik bruk ngak meng kan saong pato veik ka dom menuac hu hatai takre yau drei piah khik ramik saong patagok janih ilamu cih hội họa ini.

Dom hatung hatian caong khin ngak bruk pahala daong ka bol bhap rahra di mikva Khmer daok di Nam bộ tuk halei jeng hu menuac sia iek praong, iek glaong. Urang pilih ruah bruk khik ramik saong patagok dom yaom glaong ilamu meng kan di bangsa yau sa jalan ngak piah khik ramik ilamu meng kan di bangsa, rik daong dak padang jalan diukrai bahrau, siam mekre, piah ka puk palei dak harei dak tani tanat, hadah hadai jang./.