Tui yaok pataom pathau khan kinh te yaok thun di thun 2022, meng 17,3 triệu menuac, bhum taneran kraong Cửu Long (ĐBSCL) hu menuac labik karei mai daok bier di abih min menuac tabiak nao daok di labik karei glaong di abih dalam taneh ia. Dalam bhum urak ini hu labaih 10 triệu urang ngak dalam umo ngak bruk, meblah jaik 20% dom urang ngak dalam umo thun di dalam taneh ia. Min, dom urang ngak daok ngak bruk di pak ini bier jang rilo dut saong dom taka ini.

Kurang urang ngak, kan pilih ruah urang ngak, abih di nyu nan lac urang ngak hu ilamo glaong lac bruk daok rahtabiak biak rilo di rilo puk palei dalam bhum taneran kraong Cửu Long. Lac sa dalam dom labik ủy quyền di hãng radaih Ford di bhum Tây Nam Bộ, Cần Thơ Ford daok duah dom urang ngak langiu di dom ilamo hu bac magru di sang bac dalam gah pablei salih, daok brei hu ilamo thực tế, ba dom ilamo, jalan saneng tame bruk ngak, hu ilamo ndem puac, ginum biai siam piah dui pachreih tuai damuai. Min tui Yam ndok Nhân sự Cần Thơ Ford Nguyễn Thị Kim Chi lac urang miền tây brei thau, dom urang ngak di ĐBSCL oh kurang, min urang ngak hu ilamo glaong daok gaok kan kandah dalam dui pachreih saong khik takai urang.

Bahrau ini, di Nyaom biai pakat dunya patagok khang kajap bhum ĐBSCL ngan haong kadha "Ilamo saong công nghệ - prein khang ka salih bahrau saong cak rok patagok" GS, TS Hà Thanh Toàn, Akaok Sang bac đại học Cần Thơ brei thau, dahlau deih bhum ĐBSCL rik tame 25% GDP dalam taneh ia, min jaik di ini trun daok 18%. Urang ngak di pak ini urak ini rilo meng lac ka oh tapa bac bruk ngak, njauk daok labaih 7% di abih tih dom rahra di pakat đại học, dut saong dalam taneh ia lac 63%, brei mboh bruk pato pakai saong ilamo di menuac ngak di bhum lac biak bier.

Dahlau di thun 2000, bhum taneran kraong Cửu Long bahrau hu sa Sang bac đại học Cần Thơ. Hadei di thun 2000 tal urak ini hu veik 10 sang bac đại học, min menuac ngak di dom sang bac ini daok bier, kayua yau nan ye ka oh pachreih hu rilo urang tui bac, ba tal bruk dom urang bac tamat blaoh jeng biar gah chất lượng.

Yam ndok Jabat pablei salih saong Công nghiệp Việt Nam (VCCI) Cần Thơ Nguyễn Phương Lam brei thau lac: sa tukvak suai atah bhum ĐBSCL oh pachreih hu rilo urang buh jien tame ngak mbang, pablei salih dalam dom gah hu ilamo glaong; nan ye ngak jeng bruk bhian randap lac tok hu dom gah ngak mbang pandar urang ngak hu ilamo mbaih. Kayua yau nan ye di darak pasa urang ngak ka oh hu bruk ba tabiak jalan ngak saong buh jien tame ngak piah cak rok patagok. Dom urang ngak hu pato bruk ngak dalam abih tih dom urang ngak di dom tỉnh dalam bhum daok di nyaom bier abih di dalam taneh ia (meblah 11 dalam abih tih 20 tinh bier abih dalam taneh ia); abih di nyu nan lac hu 6 tinh dang puac abih di dalam taneh ia ngan haong dom urang hu pato bruk ngak meng 3-6%.

Dalam pathau khan bruk quy hoạch cak rok patagok bhum ĐBSCL tukvak 2021-2030, pamaong tal thun 2050, Rajaei brei thau cambaih bruk pamoang ba bhum ini jeng pasak kinh tế ngak nong khang kajap, sami samar saong siam lagaih glaong di taneh ia, di bhum saong di dunya; hu jalan tagok kinh te tui kuhria labaih 6,5% sa thun gam haong tanut kadung jien kanja buh tame 45 ribau tỷ đồng. Meng bruk buh jien tame, abih di nyu nan lac dom doanh nghiệp dalam bhum, sarak urang ngak di ĐBSCL njauk lac jalan ngak ka abih bhum oh lac taeng di sa tinh, ban halei.

Bruk pato bruk ngak tuk halei jeng lac bruk praong saong njauk ngak chip. Pato pakai njauk pambuak haong bruk patagok di bhum palei; abih di nyu nan lac sangka pato pakai, dui pachreih dom chuyên gia daok lavik di pak in, thau cambaih, pambuak kajap haong bruk urak ini. Langiu di nan, njauk jhul khang bruk pambuak gauk di doanh nghiệp saong sang bac, njauk padang dom bruk ba drei tame ma-in gam bac gam ngak, daong ka sinh viên samar ngak randap haong labik ngak bruk di doanh nghiệp.

Bhum ĐBSCL daok dalam tukvak jhul khang công nghiệp hóa, hiện đại hóa saong mbeik drei tame dunya, bruk takik urang ngak njauk hu langyah dahlau di abih piah ngak jeng prein khang rik daong ka bhum taneh ini tagok khang di anak tal./.