Mik va bangsa takik dok khik ramik alat ragu meng kan di bangsa drei

Sap ndom lac sa dalam dom kadha praong di ilamu bangsa  song jeng lac kadha piah brei thau bangsa nan urak ni dok dang anak bruk mbuan si lahik nao. Ni lac sa bruk hu brei mboh cambaih tapa Pathau khan bruk duah thau 53 bangsa takik  thun  2019. Tui nan, hu labaih  88% urang bangsa takik meng  5 thun tagok ndom hu sap bangsa. Bruk njauk caik hatai lac, hadei di  4 thun (meng thun  2015 tal thun 2019), dom urang bangsa takik  meng umo  5 thun tagok ndom hu sap bangsa  trun 7,3%, kuhria rah tapa yaok thun , trun labaih 1,8%. Tui nyaom umo thun, urang bangsa takik thau ndom sap bangsa mboh daok trun nao. Di nyaom umo 65 thun tagok hu  92,8% ndom hu sap bangsa , min, di nyaom umo ala  18 thun , bruk ni, trun dok labaih  58%.

Sa bruk njauk ndom tal tra lac dom urang bangsa takik  meng 15 thun tagok thau puac , thau vak  haroh bangsa biak beir , tok hu 15,9%. Dut song thun  2015, bruk ni trun 0,9%. Tok hu 3 bangsa takik  hu urang thau puac, thau vak haroh bangsa labaih  30% nan lac  Ê Đê, Ba Na song  Hoa. Hu tal  17 bangsa takik  hu urang thau puac, thau vak haroh bangsa mala 10%.

Gam song sap ndom, haroh cih, akhar vak, dom inem krung ilamu karei di dom bangsa takik yau: rija roya  , khan aow, kadha doh, lagu tamia... jeng dok lahik nao biak khang.

Tapa duah thau 53 bangsa takik di  thun  2019 jeng brei mboh , tok hu  5,5% urang bangsa takik thau main dom alat ragam meng kan. Tok hu  5 bangsa hu  urang thau pandar alat ragam meng kan di bangsa drei labaih  10%. Dalam tuk nan hu tal  35 bangsa hu urang thau pandar alat ragam meng kan di bangsa drei mala  5%.

Tui yaok pataom, tok dok  13% urang bangsa takik  thau tamia lagu meng kan di bangsa drei. Rơ Măm lac bangsa dok khik ramik ilamu bangsa drei siam di abih  , min tok hu  48% urang thau tamia lagu tamia meng kan di bangsa. Biak damen lac, dok 5 bangsa hu urang thau tamia lagu tamia meng kan di bangsa drei  labaih  30% (lac Cơ Tu, Lào, Ba Na, Khmer, Rơ Măm). Dalam tuk nan, hu tal  31 bangsa hu urang thau tamia lagu tamia meng kan di bangsa drei mala 10%, abih di nyu nan lac  17 bangsa tok hu mala  5%. 

Dom urang thau doh kadha doh meng kan di bangsa drei jeng biak beir . Khmer, Ba Na, Chăm, Cơ Tu, Pà Thẻn lac  5 bangsa hu urang thau doh kadha doh meng kan di bangsa drei  meng 20% tagok. Hu tal  31 bangsa hu  urang thau doh kadha doh meng kan di bangsa drei mala 10%. 9 bangsa tok hu mala 5%.

Tapa nan mboh lac, bruk khik ramik ilamu bangsa takik lac bruk njauk ngak samar drah  . Thau hu bruk ni, dom thun tapa, Đảng song karja  hu rilo sarak, danak dak piah khik ramik ilamu bangsa meng Trung ương tal cơ sở. Bruk khik ramik ilamu jeng hu dom tỉnh ban iek prong song pablak tame bruk patagok du lịch. Rilo rija roya, adat cambat, kadha main bhp bini, ragu tamia di dom bangsa takik hu padang ngak veik  . Dom tỉnh, ban jeng hu peih rilo tal tacei pato doh , tamia ragu bhap bini... Min bruk ngak hu oh ka yau hatai caong khin, nan ye bruk khik ramik ilamu brei hu jhul khang jang, ngak ka nyu siam lagaih meng pakat  trung ương tal puk palei .

Anak meta mboh lac, di labik halei, bhap bini hu hatai sahneng njauk , iek prong ilamu meng kan di bangsa drei, labik nan ngak hu siam. Labik halei langyah siam bruk pambuak gauk di khik ramik song patagok ye meda tagok hu ilamu meng kan./.

Urang lang: Hanipha- 19/4