Yaok adit, di sa labik sit dalam mblang bein KTX Đại học Quốc gia atau di Sang ilamu sinh viên ban raya HCM, sa kapul dam dara pataom gauk daoh đờn ca tài tử, daoh cải lương haong dom janih daoh karei di ragu daoh bhap bini Nam Bộ. Dom dam dara nan daok dalam kalup kapul Giai điệu phương Nam. Labaih 6 thun padang tabiak, kalup kapul dui pachreih hu rilo rai sinh viên pataom mbaok tame, urak ini hu labaih 60 urang. Ini hu maong lac mblang me-in, lac baoh sang di dom dam dara hu hatai takre ragu ragam bangsa. Yaok urang mai tal kalup kapul jeng ba tui hatai takre ragu ragam bangsa, dalam nan hu rilo dam dara hu thau, hu patoa veik meng amaik ame di drei. Minh Tuấn – sa dalam dom urang dalam kalup kapul Giai điệu phương Nam brei thau: 

 “Meng tuk bac pakat 3, drei mboh takre cải lương, đờn ca tài tử bloh paje. Tapa 1 ayut sahabat, drei thau tal kalup kapul, hadei di dom mbang tame me-in, drei mboh biak takre, blaoh tut angan tame kalup kapul. Drei hu mbaok tame kalup kapul meng thun 2016, tal harei ini lac hu 6 thun.”

Yaom lac kalup kapul hu angan ieu lac Giai điệu phương Nam min jeng pachreih hu oh takik urang mai meng gah barak saong bhum kreh negar. Rilo urang tapa bloh saman sinh viên, bac tamat bloh saong daok nao ngak bruk, min jeng daok mai hu mbaok haong kalup kapul saong tacei pato dom rai hadei drei. Urang dalam kalup kapul rilo meng lac sinh viên min dom ayut thau kali kalih, patak pataom jien piah blei ka drei dom alat ragam yau ye: đờn tranh, đờn kìm, ghita,... piah me-in, piah pasram, piah nao parang me-in haong kalup kapul saong piah pabak hatai takre ragu ragam bangsa.  Thanh Trinh – Chủ nhiệm kalup kapul Giai điệu phương Nam khan lac:

 “Tuk drei hu tagok sân khấu saong hu daoh ragu daoh bhap bini, ragu bolero atau đờn ca tài từ ye drei mboh biak uan tabuan, biak hadah mbaok meta. Drei takre lo panuac lac “Daok ilamu bangsa lac daok taneh ia”. Sa ragu daoh njuan njac, lai la-an, brei mboh bruk tapak tapaiy, slut mbut, saong dalam nan daok hu hatung hatian siam mekre, ndung bak hatai anit ranam.”

Meyah di Khu đô thị Đại học ban Thủ Đức hu kalup kapul Giai điệu phương Nam ye di Sang bac ĐH Kinh tế ban raya HCM jeng hu kalup kapul Dân ca hu biak rilo dam dara thau tal. Bruk njauk tatuak drei lac dom sinh viên bac gah kinh tế, sahneng lac gah bac biak "thu lagu" min urang biak takre dom ragu daoh ka puk paga, palei negar, saong lac menuac abih drei haong sa kalup kapul hu meng labaih 26 thun. Piah hu mbaok saong cakrok  suai lavik, dom dam dara oh padeih sahneng duah, salih bahrau jalan ngak, jalan me-in saong jalan pasram habar ka nyu chreih chrai, peih dom bruk pakacah, taom gaok haong dom kalup kapul karei atau da-a dom nghệ sĩ hu angan je mai tacei pato.

Yaom lac dom urang dalam kalup kapul rilo meng lac dom dam dara “không chuyên”, min meng tari taring, kham merat bac megru, nan ye ilamu chuyên môn di dom kalup kapul yau Giai điệu phương Nam, Dân ca di ĐH Kinh tế TP.HCM oh padeih hu pok glaong. Dom kalup kapul ini hu da-a nao parang me-in di rilo danak dak daoh tamia di sang bac, di Thành đoàn, di dom quận huyện saong ban raya, hu tuk daok hu mbaok di dom rayo papar sap, papar binguk. Rilo urang di kalup kapul daok hu mbaok saong taduan hu giải thưởng di dom mbang pakacah yau Harei pataom đờn ca tài tử, Chuông vàng vọng cổ...

Đinh Thị Kim Ngân - Phó chủ nhiệm iek gah pathau khan di kalup kapul Dân ca ĐH Kinh tế ban raya HCM brei thau, caong khin di kalup kapul lac padang mblang me-in ka dom sinh viên anit ragu daoh bhap bini, ranam alat ragam bangsa, bo daok caong pambak tabiak hatai anit ranam, brei thau ka ragu ragam meng kan tal abih menuac sia:

 “Kalup kapul ragu daoh bhap bini ye dom danak dak praong di kol drei jeng pamaong tal bangsa. Kol drei kham merat pambak tabiak hatai anit saong daong ka menuac sia thau jang ka ragu ragam bangsa, saong ba ragu daoh bhap bini nao tal rilo dam dara jang.”

Kalup kapul Giai điệu phương Nam atau kalup kapul Dân ca di ĐH Kinh tế TP.HCM lac 2 dalam biak rilo kalup kapul pataom hu dom dam dara takre ragu ragam bangsa daok di TP.HCM. Ini biak lac bruk njauk iek praong, kayua di sa ban chreih chrai, jar var haong bruk hit, min jeng daok hu dom dam dara thau iek praong, thau khik ramik ilamu di bangsa tapa dom ragu daoh bhap bini, ragu ragam bangsa.

 Caong lac dom kalup kapul sinh viên ini meda taduan hu rilo sangka, daong prein di sang bac, di dom kapul nyaom xã hội saong karja, piah dak harei dak hu rilo menuac thau tal, pataom mbaok tame, ba gauk khik ramik ilamu siam mekre biak hu yaom glaong di bangsa Việt Nam./.

Urang lang: M.Phuong