Di bhum ĐBSCL dak harei dak hu rilo jalan mbak praong, palahik nao bruk “tapa kraong njauk pambak tame ghe gilai”, bruk atah gauk di labik dom puk palei yau hu jaik veik meng jalan mbak nao mai mbuan lagaih. Meng tatua Mỹ Thuận, tatua Cần Thơ, jalan nduac samar Trung Lương- Mỹ Thuận, jalan nduac samar Lộ Tẻ - Rạch Sỏi, tatua Rạch Miễu tal tatua Vàm Cống, tatua Cao Lãnh, tatua Cổ Chiên, tatua Mỹ Lợi...

Abih di nyu nan lac, meng akaok thun 2022,  tuk jalan nduac samar Trung Lương - Mỹ Thuận hu peih tabiak brei ka radaih nduac, ye bruk gar radaih di angaok jalan roya 1 labik meng Tiền Giang- Vĩnh Long trun hu rilo mboh di anak meta. Ong Phạm Nguyên Khang, yam ndok Công ty TNHH Thép Minh Trang, ban Mỹ Tho, tỉnh Tiền Giang khan lac:  “ Meng di tuk jalan nduac samar Trung Lương- Mỹ Thuận hu ngak salah, radaih nao mai mbuan lagaih, plaih hu bruk gar jalan. Dahlau deih, tuk nao di jalan roya 1 gam njauk gar radaih gam njauk suai bruk pajeng pandap panda. Meng di tuk hu jalan nduac samar blaoh, rahra nao mai biak lagaih, pandap panda pajeng ba jeng hu lagaih jang. Anak tal tuk tatua Mỹ Thuận 2 hu peih tabiak brei ka radaih nduac ye bruk pambuak pagam jalan nduac samar Trung Lương-Mỹ Thuận saong Mỹ Thuận- Cần Thơ  ye bhum ĐBSCL hu cak rok patagok jang”.  

Bến Tre bhian hu maong lac “kaoh pulao” urak ini hu padang ngak rilo mbaik tatua nduac tapa kraong Tiền, kraong Hàm Luông saong Cổ Chiên, daong ngak palahik bruk tapa ghe gilai gaok rilo kan kandah. Urak ini, tỉnh daok hu Rajaei buh jien padang ngak tatua Rạch Miễu 2 saong meda ngak salah di thun 2026 piah pasiam veik bruk gar jalan di mangaok tatua Rạch Miễu urak ini. Ong Trần Ngọc Tam, Akaok UBND tỉnh Bến Tre brei thau lac, bruk kinh tế- XH di palei li-u jaik di ini hu cak rok patagok, lac meng hu bruk rik daong praong meng dom mbaik tatua kayua TW buh jien tame ngak:  “Tatua Rạch Miễu biak lagaih, dalam tukvak meng blaoh bruk cak rok patagok KTXH di tỉnh Bến Tre saong dom tinh tapen tasik gah timur ini, lac meng hu tatua Rạch Miễu saong dom mbaik tatua Hàm Luông, Cổ Chiên. Bến Tre hadei di tuk hu dom mbaik tatua, kinh tế xã hội hu cak rok patagok cambaih laih. Piah pasiam bruk gar jalan yau urak ini, ye hu mbaik tatua Rạch Miễu 2, dom thun tra tuk ngak salah tatua Rạch Miễu ka 2, ye meda langyah hu bruk ini”.

Di tỉnh Vĩnh Long, hadei di jaik 3 thun peih tabiak ngak tal urak ini, jalan nduac samar Mỹ Thuận Cần Thơ daok ngak jaik salah, tui kuhria, hu peih tabiak  brei nduac radaih di puac thun ini. Ini lac danak dak praong pakat negar, hadei di tuk hu ngak salah saong ba tame pandar meda daong jhul kinh te di abih bhum cak rok patagok.

Dom thun tapa, Quốc Hội, Rajaei biak caik hatai, brei ngak dahlau bruk buh jien tame cak rok patagok jalan mbak nao mai; jaik di ini hu rilo jalan nduac samar hu buh jien tame padang ngak piah pabak ka bruk nao mai, pajeng ba pandap panda hu samar jang, siam lagaih jang.

Dalam tukvak 2016-2020, abih tih phun jien buh tame ka danak dak jalan mbak nao mai di bhum ĐBSCL lac labaih 65.000 tỷ đồng, meblah 15,15% abih tih phun jien buh tame ngak di dalam taneh ia. Tal urak ini, bhum ĐBSCL hu ngak salah saong ba tame pandar 171 km jalan nduac samar  tukvak 1 (4 jalan radaih nduac). 

Jalan mbak nao mai dak harei dak hu ngak siam saong cak rok, lac prein khang piah jhul tagok kinh tế- xã hội bhum taneran kraong Cửu Long dak harei dak nao tgaok. Bhum ĐBSCL lac sa dalam dua bhum kinh te bo taong abih dom bhum palei jeng mboh hu bruk patagok. Ini lac jak jeng biak njauk pok meyaom dalam tuk kan kandah di bruk suy thoái di gah kinh te dunya. Meda ndem lac “jalan mbak nao dahlau, kinh te tagok tui hadei”; bhum ĐBSCL biak njauk haong angan lac pasak padai, baoh kayau saong kaya ikan praong abih di taneh ia./.