Gru Nguyễn Văn Tiến (umo 62 thun, daok di xã Mong Thọ A, huyện Châu Thành, tỉnh Kiên Giang), dahlau daih ngak Hiệu phó Sang bac Tiểu học Mong Thọ A, khan lac, dahlau di tuk ngak jalan, uranaih dalam palei bhian nao bac meng ghe. Sang bac Tiểu học Mong Thọ A hu 2 labik sit, yaok labik atah di gauk 5-6km. Bilan thu ye anek saih nao takai tal labik bac, daok bilan hajan ye brei nao ghe. Harei halei hu amaik ame daok di sang ye ba anek nao bac, min amaik ame bhian nao ngak nan ye jao bruk ba, raok anek bhik ka gru pato.

Tacei tame jalan bê tông samu-tapak anak pabah mbang sang, ong Thái Văn Bảnh (umo 65 thun, daok di xã Phong Hòa, huyện Lai Vung, tỉnh Đồng Tháp) lac, jalan ini dahlau daih sit lo, lac jalan haluk piah tabiak jalan roya 54, atau piah ka urang blei salih nduac radaih patuh tame blei baoh kayau di mikva dalam bhum. Bilan thu daok nao hu, daok bilan hajan ye tok nao meng ghe angaok kraong.

Tui ong Bảnh, ngak jalan lac bruk praong kayua nyu abih rilo jien padai, min hu jalan ye uranaih nao bac hu mbuan jang, baoh kayau hu ba tabiak darak lagaih jang. Sang halei hu menuac ruak kik pajeng nao sang iek ruak jeng hu samar jang. Ong Bảnh brei thau: “Tuk camereip abih rilo jien padai, min drei hu kein laba tuk hadei. Urak ini mikva ruak kik, radaih cấp cứu tame hu tal labik piah pajeng nao, biak lagaih… Nan ye meng mboh lac, drei abih hasit di anak meta, min hu kein laba ka rahra, nan ye oh damen hagait hasit taneh rik daong ka puk paga, palei negar”.

Ong Võ Minh Luận (daok di xã Mỹ Lộc, huyện Cần Giuộc, tỉnh Long An), lac urang dahlau daih ngak bol lin, jeng lac urang đảng ba akaok nao dahlau di palei brei thau, tuk thau lac karja peih praong jalan tapa palei, ong ginum haong diuk anek, halan hatian alin hadiah taneh piah ngak jalan. Blaoh ong Luận alin hadiah abih tih 500m² taneh hamu saong 350m² taneh thổ cư, yaom jien tỷ.

Akaok Mintri ngak nong saong patagok palei pala Lê Minh Hoan rilo mbang ndom lac, jalan ngak bahrau lac salih meng ngak nong tapa ngak kinh tế ngak nong. Kham merat ngak hu 3 bruk, lac: “Ngak nong sinh thái – palei pala bahrau – urang nong văn minh”. Piah ngak hu bruk ini, ye bruk ngak jalan palei di dom bhum atah bayah lac hu makna biak praong. Tuk jalan mbak nao mai mbuan lagaih, ye bruk ngak mbang, nao mai, raidiuk di mikva salih karei biak rilo.

Ong Dương Văn Hùng (dahlau daih ngak bol lin daok di xã Bàn Tân Định, huyện Giồng Riềng, tỉnh Kiên Giang) khan lac: “Nao angaok dom jalan bê tông samu tapak, radaih nduac 50-60km sa mon yau harei ini, takik thei sahneng mboh ginup yaom glaong bo jalan mbak ba mai ka puk palei. Kol drei sahneng veik iek, zaman ini bo daok vah ghe di kraong ye habien palei pala meng tagok hu. Brei hu jalan meng hu. Dua gah takai kraong ini, sa gah jalan praong, sa gah jalan sit, lac mboh karei di gauk ye. Gah jalan praong cakrok jang, radaih du lịch, radaih pajeng pandap tame tabiak oh padeih, jeng hu makna lac pandap panda hu pajen ba miat, rahra hu jalan tagok kinh tế rilo jang”.

Tui Mintri ngak nong saong patagok palei pala, dalam labaih 10 thun tapa, abih tih phun jien buh ka ngak jalan palei di bhum ĐBSCL lac jaik 49.000 tỷ đồng, padang ngak bahrau hu 13.562km jalan dom janih. Langiu di nan, dom palei daok padang ngak bahrau hu 5.369 mbaik tatua saong rilo cống pacang ia mbak…

Tapa nan, nyu brei mboh bruk salih bahrau di bhum taneh ngak nong praong abih di taneh ia. Yaok jalan, yaok mbaik tatua di mblang hamu, bein phun, danao ikan, pambuak pagam haong hatai caong salih bahrau raidiuk di jaik 20 triệu urang nong bhum ĐBSCL.

Jalan lac prein khang jhul patagok palei pala, paglaong raidiuk urang ngak nong. Bruk “Karja haong bhap bini ba gauk ngak” jalan palei hu jak jeng jang hatai caong. Patui di nan lac bruk abih bhap bini jum pataom gauk padang ngak palei pala bahrau, hu peih tabiak sa zaman bahrau cakrok patagok bruk ngak nong – palei pala di bhum ĐBSCL siam mekre jang, khang kajap jang./.