Mik va Cham pok paling dom janih pandap har 

Urang Cam hu panuac ndem lac “tapei nung caik pak mala –sakaya dak mangaok" mboh makna praong di sakaya. Har sakaya bhian hu ngak dalam harei Kate di urang Cam saong hu rahra Cam daok di Ninh Thuận biak takre. 

Langiu di har sakaya, har danong riya jeng hu urang Cam ngak piah pok tagok ka yang, muk kei di drei dalam dom harei ilamu. Har danaong riya hu ngak meng tapung ndiuk, saradang, baoh manuk saong tape alak. Har ini hu ngak saong pandar meng kan tal urak ini, brei mboh hatai caong ka raidiuk trei sil haniem phul di urang Cam.

       Ong Quảng Đại Đức, xã Phước Hậu, huyện Ninh Phước, tỉnh Ninh Thuận brei thau: “abih tih dom janih har nan, urang Cam piah pok tagok ka po yang, ong muk ong kei di drei, piah caong ka po pajeng brei ka sa thun hajan hangin siam lagaih, ngak mbang hu kaya mada, ngak padai hu padai, ngak tangei hu tangei, selamat haniem phul. Harei Kate oh hu dom janih har kaya kan nan ye lac oh daok harei Kate njauk hatai caong khin di urang bangsa Cam”.

       Dalam gilang ilamo Cam, dom janih har meng kan hu angan praong, pambuak tal dom adat cambat ieu yang dalam harei mbang Kate. Langiu di nan, tuk ngak dom janih har ini dalam harei Kate jeng ye lac tukvak masa piah ka dom mikva brei mboh tangin gheih makre saong ba dom yaom glaong ilamo tame pandap mbang di urang bangsa Cam.

            Dom janih har meng kan di urang bangsa Cam hu ngak tabiak mai meng dom kaya kan hu di ini. Dom pandap panda pok tagok po yang, ong muk ong kei di urang Cam jeng njauk ngak tui kadha di jalan saneng akaok kuhria di anek manuac, brei mboh di pandap panda, caik hadom saong rami ramik caik yau habar dalam dom adat cambat. Ini lac dom yaom ilamo praong glaong di urang Cam saong jeng lac angan je di dalam ilamo ngak pandap mbang di urang bangsa Cam./.

Urang lang:Samad Han -23-10