Mintri Ilamo, Thể thao saong Du lịch hu tabiak jalan peih ngak danak dak du lịch dalam taneh ia siam mekre, salamat

Thun 2022, bruk du lịch hu kuhria mboh dahlau lac daok gaok kan kandah kayua jit COVID-19 jeng daok rahtabiak sarau kadhau. Dalam tuk nan, du lịch dalam taneh ia meda lac jalan ngak praong abih. Tổng cục Du lịch Việt Nam ba tabiak bruk ngak di thun 2022 lac gah du lịch dalam taneh ia meda roak labaih 65 triệu mbang tuai, dalam nan hu 5 triệu mbang tuai dunya hu “passport vaccine”. Taong abih jien mek tame meng du lịch dalam taneh ia tui kuhria lac labaih 400.000 tỷ đồng.

Mintri Ilamo, Thể thao saong Du lịch hu tabiak jalan peih ngak danak dak du lịch dalam taneh ia siam mekre, salamat, pasang iek hu jit ruak COVID-19; pamaong tal bruk pasiam viek du lịch tui jalan meng darak pasa dalam tinh, dalam bhum tal dalam taneh ia. Danak dak hu maong lac meda padang hu veik hatai jia di darak pasa ka bruk du lịch dalam taneh ia salamat, dui pachreih hu tuai.

Taong abih gah du lịch brei khik kajap salamat ka tuai ma-in saong rahra, gam haong bruk peih ngak siam lagaih dom danak dak pasiam viek du lịch dalam taneh ia saong dunya. Thứ trưởng Mintri Ilamu, Thể thao saong Du lịch Đoàn Văn Việt brei thau lac, jit praong COVID-19 ngak brei salih karei dom bruk bhian randap dalam raidiuk di anek manuac, dom bruk du lịch hadei di tuk jit praong meda hu kuhria mboh dahlau, yau ye: du lịch nao tal dom labik salamat piah plaih jit ruak; pandar công nghệ piah khik kajap salamat, jang yau dom dịch vụ takik taom gaok gauk; du lịch tui dom kapul takik menuac, du lich katut panak harei saong kakei nao jaik harei; pilih ruah dom bruk padieh padai, daok jaik haong langik tasik….

Brei panuac di Nyaom biai “Du lịch Việt Nam – pasiam veik saong patagok”, di harei 25/12/2021, Phó Thủ tướng Vũ Đức Đam ndom lac, Việt Nam meda peih pambah mbang du lịch siam mekre, salamat, khang kajap, kayua biến thể Omicron biak kan kandah saong njom mbak biak samar: “peih tabiak blaoh kariek viek daok kan kandah jang, kayua yau nan ye gah du lịch njauk caga siam, peih pambang ka nyu khang kajap, oh ngak tui hatai pandiak. Mayah Việt Nam oh salamat ye tuai du lịch jeng oh mai. Daok meyah dom tinh, ban dalam taneh ia oh salamat ye oh hu tuai dalam taneh ia”.

Langiu di bruk khik hu salamat bruk pacang caga jit ruak, Phó Thủ tướng Vũ Đức Đam ieu kakei gah du lịch caga siam ka bruk salih số, peih ngak siam sarak daong doanh nghiệp, urang ngak saong padang dom pandap panda chất lượng piah raok tuai dunya. “Njauk ngak du lịch rahra, ba tuai tame dalam bhum atah bayah, piah ka tuai main iek dom labik langik tasik daok tamo. Nan meng lac dom bruk main iek hu yaom glaong, bo tukavak tapa, khol drei salih meng dom bruk bahrau jang, saneng lac siam bo suai lavik ye oh siam”.

Akaok mban pablei salih Tập đoàn Sun World Trần Nguyện jeng mboh lac, jit praong COVID-19 ngak ka gah du lịch njauk ba tabiak dom jalan ma-in bahrau, dom sahneng kuhria bahrau saong dom asal kadha bahrau, dalam nan hu bruk: du lịch sa labik tal – rilo bruk ngak iek meda hu tagok glaong.

Thun 2022, dom sarau kadhau di jit ruak COVID-19 jeng daok lac kan kandah praong ka gah du lịch Việt Nam. Brei panuac di mbang ginum biai “Du lịch Việt Nam – pasiam viek saong patagok”, Thứ trưởng Mintri Ilamu, Thể thao saong Du lịch Đoàn Văn Việt brei thau lac: "dalam tukvak bahrau, du lịch Việt Nam meda samar drah ba drei tame piah pasiam veik,  lagaih haong bruk salamat, jeng labik nao tal hu angan je saong hu labik dang mariak gauk angaok dunya"./.

Urang lang: Thu Thao – 25/01