Bruk tok diuk tok pasang tuk ka oh tal umo thun ba tal oh siam ka bruk manek, prein yava di amaik saong anek. Bruk tok diuk tok pasang tuk ka oh tal umo thun meda ba tal bruk tuk matain saong manek anek, urang amaik mbuan gaok dom kan kandah tuk manek yau ye tabiak darah, anek kamar metai dalam tian amaik,… Dalam nan, bruk anek kamar metai dalam tian amaik meda ngak ka urang manek njauk sarau kadau gar darah, sre darah hadei di tuk manek mbuan ba tal matai lahik. Bác sĩ Hoàng Ngọc Thành-Phaok Yam ndok Sang iek ruak Uranaih tỉnh Gia Lai brei thau: "Bruk tok diuk tok pasang tuk ka oh tal umo thun ba tal rilo kanjak jhak di rilo gah, gam prein yava amaik, uranaih gam ngak kan kandah tal xã hội. Ngan haong amaik ye umo thun ka oh lagaih piah hu tain saong manek anek, dom labik rup pabhap manek ka oh siam nan ye tuk manek, dom uranaih manek tabiak ye rup amaik mbuan gaok kanjak jhak hadei di tuk manek, mbuan tabiak darah saong oh khik hu anek ye meda ngak sarau kadhau gar darah, sre darah mbuan metai lahik ka  urang amaik".

Taphia di nan, bruk tok diuk tok pasang saong hu tain di umo thun biak sit meda ba tal bruk manek ka oh ginup bilan, jaoh jo di uranaih saong ba tal rilo kanjak jhak tal prein yava di harei hadei. Uranaih manek oh ginup bilan jeng bhian hu prein yava oh siam, gaok rilo ruak kik gam tui saong dom janih ruak ini bhian lac biak trak, bruk taong ruak jeng gaok rilo kan kandah. Gam haong dom kanjak jhak di prein yava, urang amaik daok biak sit ka oh hu ilamo sangka saong pato ka anek bik, gaok kan kandah dalam bruk ngak, mbuan ngak ka amaik abih prein,  stress, oh siam ka prein yava. Bác sỹ Thành daok brei thau lac: "Ka oh hu ilamo, blaoh gaok trak damak tuk manek, sap hia di uranaih, bruk kan kandah dalam tuk sangka uranaih ngak ka amaik mboh glaih glar jang, blaoh prein yava trun nao. Daok uranaih, ye manek kurang bilan, di tuk manek jeng gaok kanjak jhak di bruk manek kurang bilan saong nyu bhian biak trak saong bruk taong ruak jeng gaok biak kan kandah tuk gaok dom uranaih manek kurang bilan saong urang amaik manek anek tuk umo thun biak sit".

Bác sỹ Thành jeng brei thau lac: bruk tok diuk tok pasang tuk ka oh tal umo thun lac sa dalam dom makna ngak trun chat luong menuac sia. Dom amaik tok pasang tuk ka oh tal thun, manek kurang bilan, uranaih njauk ruak kik, jaoh jo ngak patagok phun jien iek ruak, taong ruak ngak kan kandah, trak damak ka sang saong ka xã hội. Bruk tok diuk tok pasang tuk ka oh tal umo thun jeng ngak ka urang maik klaoh bruk bac ta-a, kan duah bruk ngak saong oh hu jien piah hu mbaok tame dom bruk ngak di xã hội. Salih tame nan, amaik njauk buh vaktu piah sangka  anek bik, oh ngak hagait hu jien ngak ka baoh sang dak harei dak kan kndah jang, patagok bruk eik lipa kan kathaot, daok bruk diuk pasang lac mbuan ba tal  klaak gauk.

" Blaoh tuk anek praong tagok ye hu dom ranaih kayua manek kurang bilan bhian gaok ruak kik, jaoh jo. Gah xã hội ye chat luong rahra jeng trun nao, blaoh kan kandah ka dom uranaih njauk ruak, jaoh jo. Blaoh bruk eik lipa kan kathaot tagok jang, taeng di bruk tok diuk tok pasang dalam talei but pajaih jeng lac bruk oh siam, nyu ba tal jaoh jo di uranaih,  ruak kik kayua gen tamuh ruah  tuk lac gauk gar ralow darah, ye uranaih nan njauk ruak lac biak trak".

Tok diuk tok pasang tuk ka oh tal umo thun saong tok gauk dalam but pajaih lac paga pacang praong ngan haong bruk paglaong raidiuk ka rahra bhum bangsa takik, ba tal dom bruk oh siam suai labik oh lac ka bruk manek bo daok ngak oh siam tal chat luong menuac sia, prein yava di dom rairah hadei saong ngak brei kadun lakuk bruk cak rok patagok di xã hội. Kayua yau nan ye ngak habar piah patrun patakik, pamaong tal palahik bruk ini, lac bruk njauk caik hatai sangka./.