PGS.TS. Nguyễn Thị Liên Hương, Thứ trưởng Bộ Y tế brei thau, kuhria ta-eng thun 2022, dom menuac njauk ruak pandiak tabiak darah dalam taneh ia  lac 372.696 urang, 151 urang metai. Ini lac dom menuac ruak pandiak tabiak darah glaong abih di Việt Nam kuhria dalam 36 thun tapa. Urak ini, di Việt Nam, ruak pandiak tabiak darah jeng oh ka hu vaccine pacang ruak saong jru taong ruak, dalam tuk nan bruk biến đổi khí hậu, đô thị hoá samar drah di dom tỉnh ban saong bruk bhian randap khik piah ia dalam pakon, dalam jeik nyu ngak jeng labik lagaih ka jamaok caih mebaoh saong pambak ruak, mbuan tamuh tabiak ruak saong metai menuac.

Di TP.HCM, amuk Lê Hồng Nga – Phaok Yam ndok Pasak Pasang iek ruak kik (HCDC) brei thau, meng thun 2018 tal thun 2022, pandiak tabiak darah meblah rilo di abih dalam dom ruak njaom mbak, lac labaih 48%, hadei di nan lac ruak tangin takai cambuai, meblah 25%. Thun blaoh, TP.HCM hu 29 urang metai, glaong abih kuhria meng dahlau mai. Yaom lac rilo jalan ngak hu ba tabiak ngak min bruk hu mbaok tame di bhap bini ka oh khang, ka oh hu ilamu kỹ thuật khik ramik pasang iek vector. Amuk Lê Hồng Nga ndom lac: “Biak di nyu kol drei mboh lac jeng oh ka hu sa jalan ngak siam lagaih, khang kadang piah pasang iek jit pandiak tabiak darah, kayua nyu pagam pambak biak rilo tame jalan sahneng di yaok menuac urang. Kol drei jeng daok caong hu, biak caong hu bruk gah kỹ thuật, gah vector, gah miễn dịch cộng đồng piah pacang caga pandiak tabiak darah hu khang kajap”.

Tui PGS.TS Nguyễn Thanh Hùng, Yam ndok Sang iek ruak Nhi đồng 1 TP.HCM, pandiak tabiak darah Dengue lac biak trak damak kayua nyu ngak ka prein yava biak kan kandah. Ruak meda ba tal dom biến chứng trak biak samar saong mbuan ba tal metai meyah oh hu pasang iek njauk tukvak saong taong ruak siam lagaih. PGS Nguyễn Thanh Hùng ndom lac, brei hu sa janih vaccine siam saong salamat piah pacang caga ruak pandiak tabiak darah brei ka bhap bini. Gam haong nan, brei hu bruk pambuak gauk khang kajap di gah taong ruak saong pacang caga: “Brei patrun menuac ruak ye gah taong ruak meng oh tapa prein, meng patrun patakik dom menuac metai. Nan lac got, lac gha di bruk. Nan ye bruk caga ruak meng jalan pathau khan pametai jamaok, pametai lăng quăng mboh lac bruk sit, min labaih 50 thun tapa, dunya saong Việt Nam jeng ngak oh ka hu. Nan ye ruak pandiak tabiak darah jeng daok tagok, blaoh dom thun lac jeng jit”.

Pandiak tabiak darah lac ruak hu mboh luac thun, nan ye bruk pacang, caga brei ngak gam gam, ngak samu gauk dalam bol bhap rahra. Piah hu dom jalan pacang caga siam lagaih, suai lavik, njauk pataom tame ngak palahik dom sruh jamaok, pacang cakak vector, nan lac bruk ngak, lac sarak cambaih laih di yaok tinh, ban. Gam haong nan, tui iek siam dom urang ruak, pandar dom jalan ngak hu ilamu - khoa học, pagap yau vaccine. GS.TS Phan Trọng Lân, Akaok Cục Y tế pacang caga ndom lac:  “Meyah hu vaccine ye kol drei hu mbuan lagaih jang dalam bruk pacang caga. Min dalam pacang caga pandiak tabiak darah ye brei hu mbaok di yaok rahra, kayua urak ini, jalan ngak praong, kuhria gam tukvak hadei ini meyah hu vaccine, ye bruk pasang iek dom sruh bọ gậy, jalan ba tal jamaok lac bruk praong saong daok dalam yaok baoh sang, yaok khu phố”.

Angaok dunya, Gah Y tế Dunya (WHO) yaok pataom mboh lac dom menuac njauk ruak pandiak tabiak darah bahrau, tagok labaih 30 mbang dalam 50 thun tapa. Tui kuhria mboh, yaok thun hu jaik 50 triệu menuac njauk ruak saong 500.000 urang njauk tame sang iek ruak. Dom menuac metai lac 1%, hu dom taneh ia hu menuac metai meng 3-5%.

Akaok thun ini, Gah Y tế Dunya WHO hu tabiak panuac lac pandiak tabiak darah lac ruak nhiệt đới njaom mbak samar abih saong mbuan ba tal jit praong. Nan ye chuyên gia WHO ndom lac, njauk ngak yaok janih piah patagok prein khang pacang caga pandiak tabiak darah, caga pabak bruk siam tuk hu jit tamuh tabiak. Tui nan, brei pasang iek vector, jamaok, loăng quăng, bruk ini brei hu mbaok tame bruk di abih bol bhap rahra. Abih di nyu lac brei thau cambaih ka ruak, ka bruk tamuh tabiak rilo di jamaok. Tuk jit tamuh tabiak, brei hu prein ngak siam gah y tế, hu ginup menuac ngak, ginup jru tavao saong pandap y tế taong ruak ka urang ruak./.