Meng sa huyện ngak nong, daok di bhum atah bayah saong kan kathaot di tỉnh Bà Rịa - Vũng Tàu, bruk padang ngak palei pala bahrau tabiak meng labik biak biar, hadei di labaih 10 thun padang ngak palei pala bahrau, huyện Châu Đức hu taong abih 15 xã hu UBND tỉnh brei angan lac mek hu chuẩn palei pala bahrau, lac 100%, dalam nan, hu 7 xã mek hu chuẩn palei pala bahrau paglaong.

Thau lac cakrok bruk ngak mbang, pala drak, paglaong jien mek tame ka bhap bini lac sa bruk praong dalam Danak dak bruk ngak negar padang ngak palei pala bahrau. Huyện Châu Đức hu ba tabiak rilo jalan ngak piah patagok bruk ngak nong, ngak kong, pablei salih - dịch vụ. Rilo bruk salih janih phun pala ba mai kein laba, lagaih haong rami ramik bruk ngak nong di huyện yau ye: amriak kalu, ca cao, phun mbang baoh, tangei, dom janih njam. Dom bruk pambuak gauk ngak, haong labaih 700 ha hu huyện peih ngak hu kein laba, ba jien mek tame tani tanat ka bhap bini.

Bruk pataom mikva urang nong pala thanh long tame HTX di HTX ngak nong – Dịch vụ Xuân Trường, xã Sơn Bình lac sa bruk njauk ndom tal. Urak ini, HTX pataom hu 17 urang, haong jaik 14 ha. HTX jeng hu pabak brei mã bhum pala thanh long pablei tapa Trung Quốc.

Huyện Xuyên Mộc jeng lac sa huyện bhum atah bayah saong lac huyện kan kathaot abih di tỉnh tuk bahrau peih bruk padang ngak palei pala bahrau. Jien mek tame di bhap bini thun 2010 bahrau hu jaik 17 triệu đồng sa urang sa thun. Yau nan min, meng hu Danak dak padang ngak palei pala bahrau, hu daong ka bhum taneh ini mbeik drei khang, sang danaok praong siam, KT cakrok. Abih di nyu nan lac, puac thun 2022, jien mek tame di bhap bini hu 69 triệu đồng sa urang sa thun.

Piah hu yau nan, mikva urang nong kham merat salih janih phun pala, athur raong, pamaong tal dom janih phun, janih athur hu yaom. Rilo bruk pala dom janih phun hu yaom yau darang, thanh long…hu salih ka bein pala oh siam, taneh ngak padai takik kein laba, raong athur praong pandar công nghệ glaong. Rilo HTX, kapul pambuak bruk jeng hu padang tagok, ngak jeng chuỗi pambuak gauk ngak, pambuak gauk pablei khang kajap, meng nan daong ka jien mek tame di urang nong tagok jang biak rilo. Amuk Nguyễn Thị Lan, daok di xã Bông Trang, huyện Xuyên Mộc khan lac, mbaok meta palei pala bahrau di huyện Xuyên Mộc dak harei dak siam mekre, jalan mbak nao mai dak harei dak hu peih praong, gom jalan hadah tuk melam jeng hu karja buh jien ngak siam, raidiuk di urang nong hu sangka, jien mek tame di bhap bini jeng hu glaong jang.

Amuk Lê Thị Trang Đài, Chủ tịch UBND huyện Xuyên Mộc brei thau, anak tal, huyện brei pasang iek veik bruk padang ngak palei pala bahrau, kham merat ngak ka dom xã palei pala bahrau hu jeng palei pala bahrau paglaong, dom xã paglaong hu jeng palei pala bahrau kiểu mẫu. Bruk padang ngak palei pala bahrau hu tame dalam raidiuk, hu daong paglaong raidiuk bhap bini palei pala trei sir, haniem phul jang

Tal urak ini, tỉnh Bà Rịa-Vũng Tàu hu taong abih 47 xã mek hu chuẩn palei pala bahrau; dalam nan hu 30 xã mek hu chuẩn palei pala bahrau paglaong. Tỉnh jeng hu jeng 1 dalam 18 tỉnh, ban di Trung ương, hu taong abih dom xã mek hu chuẩn palei pala bahrau. Abih di nyu lac, tỉnh oh daok sang kathaot, sang jaik kathaot tui chuẩn negar. Jien mek tame kuhria rah tapa tui akaok menuac di dom xã padang ngak palei pala bahrau saong palei pala bahrau paglaong lac 67 triệu đồng tal 72 triệu đồng sa urang sa thun. Urak ini, tỉnh hu 91 pandap ngak nong hu brei angan lac pandap OCOP meng 3 patuk tagok.

Ong Vũ Ngọc Đăng, Phó Chánh Văn phòng tacei ba Danak dak bruk ngak negar padang ngak palei pala bahrau tỉnh Bà Rịa-Vũng Tàu brei thau, piah ngak hu bruk nan, tỉnh hu ba tabiak dom bruk ngak praong yau ye: jhul khang pathau khan, brei thau cambaih jalan ngak di Đảng, sarak, hukum di karja ka bruk ngak nong, bruk urang nong, bruk palei pala, paglaong bruk ngak, labik dang, prein ngak po, salih bahrau abih gah raidiuk, bruk ngak mbang ngak huak di urang nong saong rahra palei pala. Gam haong nan, daok brei jhul khang, cakrok dom gah ngak kong, dịch vụ, salih jalan ngak kinh tế, ba bruk ngak pak di labik ka urang ngak palei pala, patui jalan peih ngak danak dak bruk ngak negar padang ngak palei pala bahrau pambuak haong đô thị hoá, padang ngak palei pala văn minh, hiện đại./.