Angaok bimon kalan Champa daok di bhum taneh Nam Trung Bo, urang Cam peih ngak  adat Yuer Yang, Katê, Cambur saong Peih Ba-mbeng Yang. Dom adat cambat hu peih ngak di angaok bimon kalan brei mboh ka dom yaom lingai ilamo oh mboh di meta di urang bangsa Cam. 

Bruk ngak adat cambat hu peih akaok meng dom adat peih pabah ba-mbang bimon, menei ka rup patau, acuk khan ao ka yang saong pok paling pandap panda.Halau janeng dang ngak dom adat hu Po Adhia, ong Kadhar, amuk Pajau, ong Camanei saong rilo bhap bani mikva atah jaik ba dom janih ndap nda kaya kan di puk palei kayua drei raong pala, ngak tabiak jeng dom kaya mbang bingi paling tagok ka po yang.

Dom adat cambat angaok bimon kalan biak gingeih sahanak pambuak pagam haong ar thak di harei nyaom ngak brei ka tuai damuai biak chreih chai, bui sambai yaok mbang nao tagok bimon kalan yol yang. Ta-eng di bimon Po Dam daok di tinh Bình Thuận peih ngak adat Yuer Yang, pambuak pagam haong rilo adat cambat karei yau Rija Nagar, Rija Harei saong Rija Praong ba mai sa harei nyaom bak ragam ragu sahanak ginreih.

Dalam bilan Ramưwan saong adit Suk Yeng, dom sang megik di urang Cam Bini gah Meraong mboh bui sambai jang bhian harei. Dom baoh sang kuhria caga blei tame dom janih pandap panda, ngak mbang ngak huak dom janih kaya mbang meng kan piah ndua tame ka dom ong Car, ong Imum daok eik dalam sang megik.

Tame bilan eik Ramưwan, hadei di tuk nao jirah riwang kabo ghul mek hareik, mbang amuk akei, dom halau janeng urang Cam Bani nao tame sang megik eik, bac megru ilamu saong brei mbang menyum hadei di tuk aia harei tame ceik. Thaik binguk dom urang Cam ndua salao lisei nao tame sang megik, nao jeng talei tapak tui takai gauk angui cuk khan ao urang bangsa Cam hu talei tabak bak khan mbram biak gheih ghang.

Sang megik yau ye baoh pasak piah peih ngak bruk pataom mbaok ginum biai nao mai gah agama di bhap bani urang Cam Bini, labik nyaom pataom di puk palei. Dom bruk daoh tamia meng kan di urang Cam hu peih ngak dalam mblang bein di sang megik piah uan raok bilan Ramưwan saong adit Suk Yeng.

Rija Nagar nan lac adat cambat dalam bhap bani hu rah tabiak di palei Cam Ahier saong Cam Awal piah likau kadha siam bruk laghaih. Urang dang angaok adat hu ong Maduen, peih ngak bruk likau daa po Yang, pah baranưng saong adaoh kadha daoh iew Yang khan ka dak rai saong bruk rik daong di dom po yang. Nao gam haong ong Maduen nan lac ong Ka-ing hu labik dang yau sa urang dang tamia piah paling yang. 

Yaok po yang hu sa angan, sa mbo khan ao. Kayua yau nan ye, tuk tamia, ong Ka-ing hu pambuak pagam saong ba tui dom kaya ngui tamia karei di gauk piah tamia tui di dom po yang. Taong alat ragam ka ong Ka-ing tamia, nan lac sa kapul ginang caing, hu dua urang taong ginang, sa urang yuk saranai saong sa urang taong chieng. Tuk ong Ka-ing ba drei tame p yang halei ye mban nhac taong tagok dom mban nhac brei ta-eng dom po yang nan.

Tamat adat ngak Rija Nagar, dom thaik binguk hu ngak meng tapung brah (Salih) hu sa urang likei saong sa urang kamei meda ba nao palao trun aia kraong nao tabiak tasik ba tui asal kadha saong panuac kakuh likau di mikva dalam palei. Rija Nagar hu peih ngak dalam tukvak masa panduan salih di bilan pandiak bhang tapa bilan hajan. 

Rai diuk di urang Cam pambuak pagam haong dom bruk ngak nong, ndam gam haong hamu taneh rah meng rilo rai mai. Kayua yau nan ye, tuk halei mikva urang bangsa Cam jeng caong khin hu angin siam hajan laghaih, pala hagait hu nan, mek hu rilo padai brah. Adat ngak Rija Nagar nan lac bruk ngak tui hatai jia di urang Cam pambuak pagam haong ilamu daoh tamia ngak ka ar thak di thun bahrau chreih chai saong bui sambai.

Khik ramik saong patagok dom yaom lingai inem krung ilamo urang bangsa Cam di bhum  Nam Trung Bo piah ngak brei prein khang ka bruk patagok bruk ngak mbang blei salih kinh te, ilamo saong rah ra. Ngak brei paglaong hatai saneng ka bruk khik ramik saong pacang khik inem krung ilamo dalam bhap bani, nan lac jalan cak rok patagok khang kajap. 

Ini jeng lac jalan ngak di Dnak dak 6 ka bruk khik ramik dom janih ilamo siam gheih di bhap bani dom bangsa takik piah patagok bruk jirah rivang ma-in, dalam danak dak jalan ngak pakat negar patagok kinh te – rah ra bhum urang bangsa takik saong bhum ceik tukvak 2021- 2030./.