Meda ndom lac, sarak bangsa di Đảng drei tuk halei jeng hu ba tabiak khan brei thau cambaih saong peih ngak dahlau hadei oh salih karei dalam labaih 90 thun tapa tui jalan ngak lac: samu gauk, gul pataom, daong gauk tui jalan iek prong gauk, pamaong tal bruk padang talei gul patom taong abih bangsa.

Dom thun tapa, Đảng, Karja saong Raja-ei hu patagok bruk pal akaok, tacei pato saong paglaong akaok saneng, bruk ngak di dom pakat ủy, tổ chức Đảng ka bruk bangsa, abih di nyu lac di bhum urang bangsa takik  saong bhum ceik dalam tukvak bahrau. Kuhria tal harei ini, hu 118 sarak daok hu peih ngak di bhum urang bangsa takik saong bhum ceik, dalam nan hu 54 sarak brei peih ngak tapak ka dom bangsa takik, bhum urang bangsa takik saong bhum ceik; 64 sarak haong gauk hu brei peih ngak dahlau ka bhap bani urang bangsa takik. Kayua yau nan ye, kinh tế- xã hội bhum urang bangsa takik saong bhum ceik hu rilo salih bahrau biak siam. Akaok Mentri, akaok Ủy ban Bangsa Hầu A Lềnh brei thau:  " Bruk bangsa saong sarak bangsa oh njauk lac trừu tượng, bo lac bruk praong, hu makna praong ngan saong bruk patagok taneh ia, paglaong raidiuk bhap bini, lac dom kadha bo mikva daok suh sah hatai, nan ye trách nhiệm di khaol drei tuk peih ngak bruk hagait ye jeng njauk ngak brei ka bhap bani, ini lac bruk bo khaol drei njauk ngak. Gam haong nan, njauk duah bruk ka mikva, duah jalan ka mikva cak rok patagok piah peih ngak siam sarak, bruk ngak bangsa dalam tukvak anak tal".

Tal urak ini, dalam negar hu 255 jabat pakat huyện di 58 tỉnh, ban daok dalam trung ương hu Thủ tướng Raja-ei pok angan lac mek hu tanut chuẩn palei pala bahrau, meblah jaik 40% taong abih jabat pakat huyện dalam negar. Bhum bangsa takik saong bhum ceik hu 1.052 xã (meblah 22,3%) mek hu chuẩn palei pala bahrau. Yaok thun, dom baoh sang kathaot bhum urang bangsa takik saong bhum ceik trun 2 – 3%. Baoh sang kathaot, jaik kathaot dalam bhum trun 1,2%; hu 22 huyện, 125 xã, jaik 1.300 puk palei tabiak truh angan biak kan kandah.

Sa dalam dom puk palei hu bruk salih bahrau khang nan lac tỉnh Sóc Trăng. Tui ong Phan Thanh Nhã, daok xã Vĩnh Tân (ban sit Vĩnh Châu), dom sarak bangsa yau Danak dak pakat negar ka patrun kathaot, ka padang ngak palei pala bahrau hu ngak brei salih bahrau mbaok meta palei pala di labik ini: "Dom bruk yau điện, jalan, sang bac, balai iek ruak, dom danak dak ba mai kein laba ka bhap bini hu sangka buh jien tame ngak dalam bhum hu rilo bhap bani bangsa takik. Mikva urang bangsa takik, hu taom gaok dom kadha biak siam piah cakrok patagok kinh tế baoh sang, meng nan baoh sang kathaot yaok thun dalam xã hu trun, jien mek tame kuhria rah tapa tui akaok manuac yaok thun jeng hu tagok".

Bruk patagok pato megru, paglaong chất lượng urang ngak lac urang bangsa takik hu Đảng, Karja caik hatai sangka. Urak ini, dalam negar hu 316 sang bac Phổ thông Bangsa gam bac gam daok di 49 tỉnh, ban ngan haong labaih  109.000 anek saih; dom sarak daong pato megru, pato bruk ngak ka urang bangsa takik hu peih ngak samar drah. Vaktu 2016-2020, hu labaih 800 ribau urang bangsa takik hu pato bruk ngak, dalam nan hu jaik 412 ribau urang ngak palei pala lac urang bangsa takik hu daong pato bruk ngak dalam 3 bilan. Ong Đào Trọng Độ, Akaok Vụ pato pakai gam gam, Tổng Cục pato bruk ngak (Mentri Lao động thương binh saong xã hội) brei thau, meng dom bruk ngak hu, jalan ngak lac tal thun 2025, dalam negar hu 50% urang ngak lac urang bangsa takik hu pato bruk ngak: "Di khoản 3 paka 62 Hukum pato bruk ngak ye urang kamei bangsa takik saong urang ngak palei pala tuk hu mbaok tame bac trình độ sơ cấp saong ala 3 bilan ye hu daong tui quy định di Thủ tướng. Daok bruk palih anek saih trình độ trung cấp cao đẳng bac megru pataom sa labik ye jeng hu dom kadha brei daong dahlau ka bhap bani bangsa takik".

Gam haong dom salih bahrau, cak rok patagok kinh tế, xã hội bhum urang bangsa takik saong bhum ceik, ye rai diuk ilamo di puk palei jeng hu salih bahrau mboh di anek meta. Dom thiết chế ilamo hu patagok, cơ sở vật chất, dom inem krung ilamo di bhum urang bangsa takik hu iek praong. Dom bruk taom gaok ilamo nao mai hu peih ngak pakat negar, pambuak bhum, hu daong khik ramik saong cak rok patagok dom yaom glaong ilamo dom bangsa./.