Ong Nguyễn Trung daok di xã Phước Tỉnh, huyện Long Điền hu 2 sruh gilai taong ikan di tasik atah, brei thau, oh ka mboh tuk halei bruk nao tasik nyu kan kandah glaih glar yau urak ini. Bhum tasik hu kaya ikan dak harei dak takik, taong cap oh hu rilo dalam tuk kaya ikan laik yaom nan ye hu mbang tabiak tasik ong Trung khat jaik 1 tỷ đồng. Kayua yau nan ye meng biak lavik, gilai ikan di ong Trung gam gam tagok thu ndih cang ba tal gilai khut, jamriak mac moc jeng khut tui.

Dua sruh gilai di ong Trung 10 thun dahlau hu ngak bahrau saong yaom jien abih jaik 10 tỷ đồng, urak ini menuac blei ve chai blei veik haong yaom oh ka tal 500 triệu đồng: “Gilai oh ngak bruk ye oh hu jien pasiam veik, abih jaik 10 tỷ ngak dua sruh gilai urak ini pablei oh ka tal 1 tỷ dahlak jeng pandik harao lo. Glaih glar lo dahlak meng ngak yau nan, pataok cang miat gilai jeng khut, jamriak mac moc lavik harei oh peih nduac jeng khut abih.. Pablei ve chai hu du halei uan du nan”.

Tui ong Sáu, urang blei gilai ikan klak di xã Phước Tỉnh huyện Long Điền, tỉnh Bà Rịa– Vũng Tàu brei thau, meng akaok thun 2023 tal ini, kayua gilai ikan klak pablei rilo nan ye ong tok blei mai kaoh tabiak pablei ve chai. Yaok gu gilai ong blei yaom meng 400 triệu tal jaik 1 tỷ đồng. Tal urak ini, ong hu blei jaik 20 sruh gilai taong ikan mai kaoh pablei ve chai. Rilo menuac ieu pablei gilai kayua lavik harei ndih cang angaok thu ngak brei jamriak mac moc khut abih. Jeng hu rilo po gilai mesraiy jien blei jamriak bahrau mai salih ka jamriak klak piah tabiak tasik. Min po gilai oh tut angan đăng kiểm hu ka dom gilai salih jamriak mac moc ini nan ye laik tame tavak sraiy: “Di Phước Tỉnh ini hu 50 - 60% menuac abih phun jien, mbong patih tangin kayua gilai. Hu rilo menuac klaak sang nduac dauk sraiy, sang danaok njauk phát mãi abih. Piah daok hu tabiak tasik, kadha praong abih di urak ini, lac UBND tỉnh brei adat ka mikva hu salih jamriak mac moc bahrau”.

Ong Nguyễn Hữu Thi, Phaok akaok Chi cục iek gah Chi cục Kaya ikan tỉnh Bà Rịa– Vũng Tàu brei thau, kayua bruk ngak “lưới kéo” lac bruk brei takik ngak saong pakauk cakrok nan ye tỉnh pachreih urang taong ikan ramik veik kanduh gilai salih tapa ngak dom bruk pachreih patagok. Gilai tok hu salih jamriak mac moc tuk nyu khut trak, oh peih nduac hu atau oh pasiam veik hu.

Urak ini, dom jabat chuyên môn, karja palei peih bruk pasang iek dom gilai ikan hu bhap bini pablei salih, oh daok ngak bruk piah kakei po gilai ngak harak “xóa đăng ký” gilai tui njauk adat. Daok bruk suai lavik, tỉnh Bà Rịa– Vũng Tàu njauk daong palagaih ka urang taong ikan hu salih gilai ikan tui njauk adat hukum, piah daok hu tabiak tasik taong cap kaya ikan./.