Thun ini mbang pakacah tamat THPT hu peih tabiak aval jang dut saong thun blaoh, min dom tinh, ban samar padang Mban tacei jalan ka mbang pakacah piah ngak dom bruk caga dahlau yau ye: pandap panda bilik pakacah, khik kajap sron mbon, salamat labik pakacah, pato pasram ka urang jakar iek pakacah, chấm pakacah…

Tal urak ini, tỉnh Sóc Trăng hu caga tani tanat ka mbang pakacah, dalam tinh hu 27 labik pakacah saong 430 bilik pakacah. Sở Pato magru hu pato tacei dom sang bac pambuak bruk haong amaik ame anek saih, khan brei thau tukvak, labik di mbang pakacah; dom puk palei hu padang dom kapul piah daong ka dom anek saih nao pakacah gaok bruk oh lagaih di jalan nao pakacah. Ong Châu Tuấn Hồng, Yam ndok Sở pato magru tinh brei thau lac, thun bac ini, dalam tinh hu 9.946 anek saih bac tal 12, dalam nan anek saih bangsa Khmer hu 1896 adei, meblah labaih 20%. Tal urak ini, dom sang bac hu peih bruk ôn thi biak catang, anek saih jeng thau cambaih ilamo saong adat di mbang pakacah: "Dom sang bac ye So pato magru jeng hu kakei brei pambuak bruk haong amaik ame anek saih piah thau cambaih bruk peih mbang pakacah anak tal, meng nan meda hu bruk pambuak haong sang bac dalam bruk sangka, tui iek anek bhik di drei dalam tukvak ôn thi saong tukvak peih mbang pakacah. Dom huyện jeng hu pato tacei dom xã, phường, ban sit meda hu kapul ngak bruk daong ka dom anek saih dalam tukvak peih pakacah".

Piah khik ka bruk peih pakacah hu siam mekre, salamat, jalan peih pakacah di dom tinh, ban jeng hu kuhria tal bruk hu bala meng langik tasik, jit ruak ngan haong jalan ngak lac khik kajap sron mbon, salamat dalam bruk in sao, pajeng ba kadha pakacah, đề pakacah, saong khik siam mekre, salamt, mbuan lagaih ka anek saih tame pakacah, urang jakar ngak bruk khik iek pakacah. Ong Lê Duy Định, yam ndok Sở Pato magru tỉnh Gia Lai brei thau: "Tukvak peih mbang pakacah tamat THPT ye di Tây Nguyên laik tame bilan hajan. Kayua yau nan ye kadha pakacah hadei di tuk in blaoh hu buh tame dom kadung tui njauk adat. Daok Gia Lai ye hu pabak sa kadung nhựa piah pacang njauk ia pathah. Hadei di tuk anek saih pakacah blaoh, kadha pakacah hu ba mai jao ka mban chấm pakacah jeng hu pabak sa kadung nhựa piah pacang njauk ia pathah".

Piah daong ka dom anek saih tame pakacah rilo di abih, rilo tinh, ban hu jao brei Kapul dam dara tinh padang dom kapul dam dara halain hatain daong prein bilan pakacah, daong ka anek saih saong gauk gar hu mbaok di mbang pakacah. Di dom tinh, ban bhum ceik, bruk nao mai kan kandah, anek saih daok atah labik pakacah jeng hu kanja palei saong sang bac trung học phổ thông rami ramik labik daok jaik labik pakacah dalam dom harei peih mbang pakacah.

Mintri Pato magru hu peih bruk brei dom kapul mai ngak bruk haong dom tinh, ban ka bruk kuhria caga peih mbang pakacah; pato pasram ginup ilamo peih bruk pakacah, paglaong pasang iek di taong abih dom bruk di mbang pakacah piah pacang, cakak dom bruk oh siam meda rahtabiak. Ndom ka bruk ngak di dom kapul hu mbaok tame bruk pakacah, Thứ trưởng Mintri Pato magru Hoàng Minh Sơn kakei lac: "Dom tinh, ban oh iek lap, kayua lac yaok mbang pakacah jeng hu dom bruk tamuh tabiak saong kuhria caga dahlau biak siam ye drei plaih hu dom bruk tamuh tabiak nan. Pathau khan ka nyu biak siam, pato pasram biak cambaih laih, tui iek biak catang saong pasang iek tantu. Saong puac di abih lac taong abih bruk jak jeng di mbang pakacah jeng daok di anek manuac."

Meng ini tal dahlau di mbang pakacah, dom tinh, ban daok pato pasram ilamo langyah dom bruk oh caong tamuh tabiak dalam mbang pakacah saong brei thau cambaih ka bruk ngak, hatai iek praong kỷ luật ka urang jakar, gru pato hu mbaok tame, khik kajap quyen loi ka anek saih saong salamat ka bruk peih pakacah di tanut glaong abih. Gam haong nan, brei peih bruk pasang iek yaok sang bac, yaok anek saih piah hu jalan daong samar drah, oh caik ka anek saih halei njauk klaak pakacah kayua gaok kan kandah./.