Lac urang đảng daok ranaih, umo bahrau labaih 30 thun, min sa-ai Vàng Giá Trừ, bangsa La Hủ daok di bản Nậm Sả, xã Bum Tở, huyện Mường Tè, tỉnh Lai Châu hu labaih 10ha phun quế. Piah patruh kathaot ka sang saong brei ka mikva mboh piah ngak tui, sa-ai Trừ nao mesre phun jien di gilang pariak sarak karja  piah raong limo, pabe, pabui. Kuhria rah tapa yaok thun, saong hu jien mek tame meng 200-300 triệu đồng. Mboh sa-ai Trừ tabiak truh hu kathaot, bhap bani dalam bản Nậm Sả chreih hatai buh jien tame ka janih phun bahrau, athur raong bahrau.  

Meng hatai suh sah ka bruk ngak mbang pala drak tui jalan klak oh daok lagaih di bhap bani La Hủ drei, sa-ai Phùng Giò Xó daok di palei Phìn Khò, xã Bum Tở, huyện Mường Tè eng drei peih taneh balau saong ba dom mblang hamu thu lagu takik kein laba tapa pala riềng saong quế. Tui jalan ngak lac urang đảng njauk ba akaok ngak dahlau piah ka mikva dalam palei bac megru saong ngak tui, sa-ai Xó pala labaih 4ha quế saong riềng, pambuak haong bruk raong athur. Meng sang kan kandah, sang urang đảng bangsa La Hủ ini yam tagok jeng baoh sang kaya meda. Hu jien padai, drap ar, sa-ai Xó hu klah rabha jalan ngak mbang saong daong ka rilo sang dalam palei tabiak truh kathaot. Sa-ai Xó hu bhap bani dalam palei jia tui saong pok ngak urang dang akaok palei tuk umo bahrau 23 thun: “Lac urang đảng bo daok lac urang dang akaok palei nan ye drei tuk halei jeng ba akaok nao dahlau dalam yaok bruk, hadei di nan pathau khan ka mikva ba gauk ngak. Urak ini, mikva jeng pala rilo quế. Dut haong dahlau diah, hatai saneng di mikva hu glaong jang rilo, mboh hu kein laba mikva meng jia tui drei jang”.

Bum Tở lac xã hu 100% bhap bani bangsa La Hủ. Rilo thun dahlau, eik lipa tuk halei jeng nao gam tui mikva, dalam tuk nan akaok palei saong bí thư chi bộ lac urang taha prong thun, oh thau akhar, kayua yau nan ye bruk pathau khan, jak ba saong caik hatai tui pang piah peih ngak dom bruk patagok kinh tế gaok biak rilo kan kandah. Meng hatai kham merat salih janih phun pala, daong ka mikva duah tabiak jalan cak rok patagok kinh tế bahrau, Đảng ủy, karja xã khang hatai salih bahrau jalan saneng, duah dom urang daok ranaih, abih hatung hatian daong ka bhap bani.

Meng jalan ngak ini, Bum Tở hu rilo salih bahrau, meng 100% bí thư, akaok palei hu thun menek meng thun 1985-1999. Dom urang jakar ranaih umo ini hu pathau khan, jak ba, tacei pato bhap bani ilamu pala quế, raong glang rilo athur saong pataom tame palahik dom adat cambat tanarakun oh daok laghaih haong rai diuk bahrau. Ong Đỗ Văn Khải, Bí thư Đảng ủy xã Bum Tở, huyện Mường Tè brei thau:“Abih di nyu lac hadei di nyaom roya vaktu 2020-2025, pren pambak prong di urang jakar ranaih umo, abih di nyu lac pakat puk palei taong abih jeng lac menuac di puk palei hu bruk salih bahrau cambaih laih dut haong dom thun dahlau”.

Meng bruk pato pakai, pasram megru paglaong ilamu ka dom urang jakar daok ranaih umo, huyện Mường Tè, hu brei jaik 200 bí thư, akaok palei dalam rai 8X, 9X ngak hạt nhân, ngak jeng pren khang di puk palei piah ka bhap bani bac megru, ngak mblah tui. Meng hatai khin saneng, khin ngak di urang ranaih umo dalam bruk jhul patagok kinh tế, xã hội bhum urang bangsa takik biak kan kandah, dom bruk ngak mbang kinh tế bahrau hu mboh, dak harei dak rilo, bruk pagam pambak tame karja dak harei dak lahik nao, mbaok meta dom puk palei dak harei dak hadah hadai. Ong Trần Đức Hiển, Phaok Bí thư Thường trực Huyện ủy Mường Tè, tỉnh Lai Châu khan lac:“Dahlau diah dom akaok palei lac dom urang hu angan je, prong thun, hu ilamu min urak ini ngan haong dom urang ranaih umo hu bac megru, hu bac tamat meng tal 12 tal đại học ye kasa dom urang ini hu pren yava, hu ilamu saong jalan diuk rai cak rok patagok harei ini ye dom urang ranaih ini bo ngak bí thư chi bộ, akaok palei ye dom urang ini meda hu pren pambak tabiak prong dalam bruk cak rok patagok kinh tế, xã hội di puk palei”.

Di dom puk palei, xã biak kan kandah di tỉnh Lai Châu, dom urang đảng ranaih umo urang bangsa takik daok dak harei dak kham merat daong ka bhap bani tabiak truh kathaot, padang cơ sở đảng khang kajap. Dom urang ini, lac dom dalah apui hadah peih jalan, daong pren ka bhap bani yam tagok dak padang rai diuk trei sil angaok bhum glaong Tây Bắc./.