Bia harei, langik sup, taginum jhuk yau brei thau mada hu hajan praong, muk Vũ Thị Thanh Tâm, umo 75 thun, urang daong gah y te  bhap di phường 27, quận Bình Thạnh, sa gah tangin pan ao hajan, gah tangin diah pan hala harak nao sa drei tame jalan sit dalam puk paga. Kayua bilan hujan harei halei jeng yau ini, tukwak ini meng hu manuac daok di sang yau nan ye njauk kabak nao.

Taih pabah mbang yaok baoh sang, muk Tâm sua tangi, vak abih khau tin dom uranaih, jak ba nao klaukh vaccine caga ndik baoh tagok. Muk caik hatai tame dom labik hu ralo uranaih dalam umo klauk jru caga. Muk Tâm brei thau lac, dahlau si klauk jru jaga jit, muk jeng ieu phone kakei piah oh klaak tapa urang halei:“Labik drei nao tal lac sang rah ra daok dalam dom palei, labik nan  giniuk katil, hu rilo menuac daok. Ini lac dom baoh sang kan daman, urangt pataom tame ngak mbang duah jien, oh hu  tukwak pang rayo piah thau ka bruk klauk jru jaga jit ruak”.

Daok muk Phạm Thùy Tố Uyên, akaok khu phố 2, phường Hiệp Bình Chánh, Ban Thủ Đức kak kajap haong bruk ini labaih 2 thun tapa saong hu mboh bruk salih barau dalam pacang jit. Meng nan, muk Uyên jeng khin ba tangin haong gah y tế palei daong khik  prein yawa ka puk paga di drei. Kayua puk paga di drei hu ralo baoh sang brei papah haong menuac urang meng rilo labik mai daok, nan ye muk bhian pilih ruak tuk halei meda taom hu mikwa bhap bini, oh kuhria hagait hangin hajan, muk Phạm Thùy Tố Uyên khan lac: “Bhap bini di drei urang nao ngak, malam meng hu mbaok di sang,  hadah mai mikwa nao ngak, anek taco nao bac, nan ye drei oh nao vaktu page. Nao jak ba, waktu malam lagaih jang, mbuan si taom mbaok mikwa dalam puk paga palei pala. Vaktu nan hei jeng tawak bruk, drei jeng yau nan, min drei kham merat klaak bruk hit piah nao taom mbaok  mikwa, ngak bruk brei ka bhap bini rahra”.           

Bác sĩ Nguyễn Gia Phương, Akaok Balai Y tế phường Hiệp Bình Chánh brei thau, bruk jakba gauk klauk jru vaccine hu ralo cuang kandah, abih di nyu lac tukwak saong bruk klauk ginup abih ka urang njauk klauk jru vaccine. Dalam tukvak panak, bhum palei njauk klauk pabak 2 mbang ka labaih 700 uranaih umo meng 1 tal 5 thun. Min  jeng hu urang ngak amaik ame oh thau cambac kein raba di bruk klauk jru vaccine caga ruak mbang baoh, nan ye urang jaka y tế mboh kan dalam mek bruk. Meng hu kapul urang daong bruk ka Balai Y tế, bruk jak ba, khan brei thau tal bhap bini rahra sanang lagaih jang. Dom urang daong bruk ini hu ralo thun daok di palei, hu ralo urang palei jia tui  nan ye jak bambuan sanang. Bác sĩ Gia Phương lac: “Dom urang daong bruk gah siam mekre prein yawa ka bhap bini rahra hu taom mikwa dalau di jaka y tế mai, nan ye khau tin di bhapbini hu mbuan lagaih jang, caik hatai jia tame. Urang hu angan di palei, daong bruk palei jeng ye daong jak ba mbuan sanang, drah samar jang ye tantu siam mekre jang brei ka gah y tế”.

Muk Phạm Huế Thanh, Akaok Bala Y tế xã Vĩnh Lộc B, huyện Bình Chánh brei thau, xã urak ini hu 62 palei, yaaok urang daong bruk di palei  hu tui iek meng 150-200 baoh sang. Urang pambuak bruk brei tame angan dalam harak brei ieik glang brei thau tantu piah mbuan si thau dom baoh sang karei di gauk, abih di nyu lac sang urang ngak công nhân. Meng nan meng hu cambac lac tantu thau dom bruk hit brei ka klauk jru vaccine caga tagok mbang baoh: “Dom menuac daong bruk biak abih hatung hatian. Hu dom adei saai daong bruk ye kol dahlak hu mbuan lagaih dalam bruk ngak. Dom adei saai daong bruk biak glaih min jien daong oh hadom. Dalam tuk nan, bruk hagait di karja ba tabiak  jeng hu vak lac dom urang pambuak bruk peih ngak.  Bruk bhap bini lac urang pambuak bruk njauk ngak min urang ngak oh truh”.

Ban raya HCM lac labik camereip dalam nagar ba tabiak bruk ngak di urang daong ka gah prein yava bhap bini. Tui sarak di HĐ bhap bini Ban raya HCM, urang pambuak bruk ka gah prein yawa bhap bini di Ban Thủ Ðức haong 16 quận hu brei daong 500.000 đồng sa urang sa bilan, saong urang daong bruk prein yava di 5 huyện hu  daong 550.000 đồng sa urang sa bilan. Gam haong nan, Ban daok hu daong meneing jien blei the bảo hiểm y tế ka dom baoh sang hu urang daong preih yawa oh ka hu the bao hiem y te lac labaih 300.000 đồng sa urang sa thun./.