Atah truh labaih 1km, adei Katơr Minh Thuận daok di palei Suối Vang, bac tal 3, hu mbaok di tal bac tuk 16h. J’ Thuận khan, dei bac di baha chùa Long Cát 3 thun ini, dalau si bac 30 minit dom nai gru di baha brei mbang huak. Yaok harei adei tagok tal bac ieu lac sa harei bui sambai kayua hu mbang hu manyum, hu bac magru hu taom sahabat ayut cuai.

Bui sambai yau ye adei Katơr Minh Thuận, adei Chamaléa Thị Mai Trang, di palei Ba Hồ, bac tal 5 khan brei thau: labaih 4 thun tui bac sang bac uranam ini, rup adei mboh tuan gru ni sư di chùa Long Cát oh uak kan daman pato jeng ye dom sahabat yut cuai jeng kham marat bac: "Adei biak uan tabuan hu bac di nini gam haong dom ayut bac. Cei Nai gru di ini salut gheih ghang, yaok tal tuk 17h khol adei pataom di baha mbang huak mbiah tal tuk 17h30 tame bac. Tung trei khol adei kham bac."

Muk Trần Thị Bạch Như, Phaok Chủ tịch UBND xã Công Hải, huyện Thuận Bắc, tỉnh Ninh Thuận brei thau lac, tal bac uranam ini hu Ni sư Thích Nữ Đức Thịnh, pan akaok chùa Long Cát, xã Công Hải peih meng thun 2002. Meng camereip, sang baha mboh di bhum palei hu ralo adei oh thau akhar huruh jeng meng peih pato akhar: "Anek kamuan bac di chùa Long Cát jeng hu dom dom nai ieik glang baha trụ trì, jeng ye hu dom mikwa daong, dom kamuan meng 120 tal 150 adei mai bac. Ralo dom adei di ini kan kathaot, kan daman si nao bac, dom anek kamuan hu dom nai di baha brei mbang brei huak brei tapuk baar, mbut klam."

Yaok thun, dom adei anek saih urang bangsa Raglai kathaot di xã Công Hải, huyện Thuận Bắc, tỉnh Ninh Thuận mai bac di chùa Long Cát dak harei dak ralo. Yau ye thun bac 2023-2024 hu labaih 100 adei, thun bac 2024 - 2025 ini jaik 150 adei bac meng tal 1 tal tal bac 5.   

Yaom lac daok ralo kan daman min tapi kham marat daong brei ka dom adei thau akhar thau huruh, chùa Long Cát, xã Công Hải, huyện Thuận Bắc, tỉnh Ninh Thuận jeng sa labik brei ka dom cei nai gru buh hatai mai pato. Kayua anek saih ralo, baha jeng jak ba brei padang bilik bac dan haong pambuak haong gru pato oh mek jien brei ka dom adei.

Gru Tưởng Văn Vui, pato di sang bac Tiểu học Công Hải hu pato di baha, lac: Anek saih di ini anek urang bangsa Raglai, ilamu bac magru di dom adei mboh njauk mayaom. 

" Dom adei di ini daok dalam bhum kan kathaot yau nan ye bruk bac magru di dom adei jeng hu ralo kan kandah. Dom adei bac mboh ganap, langiu di harei hu hajan meng mboh dom adei padeih. Nao bac mada hu kurang hasit dut tui dom adei sa umo thun dalam nan jeng hu dom dei bac magru siam. Dalam tal bac jeng hu 4 tal 6 adei bac magru siam."

Ong Nguyễn Hữu Trí, Chủ tịch UBND xã Công Hải, huyện Thuận Bắc brei thau lac, di bhum palei hu 1 sa baoh sang bac THCS, 2 sang bac tiểu học dan 1 baoh sang bac uranaih mẫu giáo. Dom thun tapa, tal bac uranam di chùa Long Cát hu daong ka bhum palei brei ka dei gauk dom uranaih oh hu tagok sang bac thu akhar huruh: "Mboh biak siam. Tal bac di chùa Long Cát, meng masa tuk wak blaoh dom adei halei oh tagok sang bac hu ye mbiah tal ini thau bac puac, thau cih wak, thau ganap nao duah bruk ngak, ganap hu ngak di dalam huyện Thuận Bắc jeng ye dalam tỉnh"

Karei di anek saih harat jat, di sang bac tal bac uranam chùa Long Cát, xã Công Hải, huyện Thuận Bắc oh ralo magei praong, oh sap loa praong, oh gar sang bac,…min tapi hu bui sambai oh kurang. Labaih 20 thun tal ini, sang bac uranam tuk halei jeng hu ê a sap papaoh akhar yaok malam. Mai meng nan, ralo adei anek bangsa Raglai khan kathaot thau bac, thau puac, thau cih wak thau taong tih thau kuria daong hu ilamu ngak bruk daok dang dalam rai diuk./.