Rilo thun tapa, mikva Islam daok di palei Cam, xã Suối Dây, huyện Tân Châu, tỉnh Tây Ninh tok randap haong jalan diukrai tui adat cambat meng kal. Meng tuk hu Bộ Tư lênh Quân khu 7 padang ngak brei labik ilamo, pasram padhih dalam mblang sang Masjid Nourul Niamah, labik ini hu jeng labik me-in, pasram prein yava, pasram padhih, pambuak talei rohim yaok menuac urang hadei di tuk nao ngak glaih glar. Amuk Thị Amina, Palei Cam, xã Suối Dây, huyện Tân Châu khan lac:

"Mikva pak ini biak bui sambai saong haniem phol tuk hu mblang me-in siam mekre ka dom anek kamuan, uranaih jeng yau urang praong hu labik pasram padhih paglaong prein yava ka drei".

Daok dom sang tui agama Tin Lành di Tiểu khu 119, xã Phú Nghĩa, huyện Bù Gia Mập, tỉnh Bình Phước, dom harei puac thun 2023, biak bui sambai tuk hu Kapul Kinh tế Quốc phòng 778 saong karja huyện Bù Gia Mập jao brei labik ilamu padhih langiu mblang saong 23 baoh sang “Tình nghĩa quân - dân” (yaok baoh sang praong 60m2), hu ginup ndien ia saong dom pandap pandar yaok harei, abih tih jien buh tame ngak labaih 2,5 tỷ đồng. Rilo urang praong thun, hu baoh sang bahrau praong gheih biak lac sa bruk caong khin. Amuk Hà Thị Lan Dung, urang tui agama Tin Lành daok di xã Phú Nghĩa, huyện Bù Gia Mập, tỉnh Bình Phước drut drui lac:

"Ngak sa rai menuac jeng oh hu sa baoh sang yau ini. Dahlak biak thau phol Ndang, thau phol Bol lin, dom pakat dang akaok".

Ngak tui bruk pambuak talei rohim, daong bhap bini bangsa, agama, meng thun 2019 tal ini, yaok thun, Quân khu 7 padang ngak brei labaih 300 baoh sang saong labik ilamu, labik pasram pahat prein yava. Ta-eng thun 2023, Bộ Tư lệnh Quân khu hu daong 5 tỷ đồng, haong dom bhum palei, doanh nghiệp, dom agama padang ngak, alin hadiah labaih 400 baoh Sang “Tình nghĩa quân - dân”, abih tih jaik 40 tỷ đồng; 34 labik ilamo, pasram padhih ka dom labik agama saong bhum bhap bini bangsa takik, yaom abih tih labaih 13 tỷ đồng.

Hu mbaok tagok jalan nao ngak lin yaok thun, Quân khu 7 hu jaik 4.000 lakei dam dom agama, meblah labaih 24%. Linh mục Trần Quang Vinh, Chánh xứ Đông Quang, Quận 12 dalam Giáo hạt Hóc Môn, Tổng Giáo phận Ban Raya Hồ Chí Minh ndom lac:

"Drei pasram ka rup drei jeng menuac jeng urang jang, thau sahneng kuhria jang ka taneh ia, anek menuac saong ka rup drei. Nan ye dom adei brei kham merat bac pasram siam, jeng sa urang lin gheih, hadei ini daong hu rilo bruk siam mekre dalam raidiuk di kol drei".

Yaok thun, tuk Tết tal mai,  Quân khu 7 hu peih ngak danak dak “Xuân chiến sĩ”; “Tết Quân - Dân”.  Meng dom bhum tapen negar, tasik, pulao hu rah tabiak rilo bruk ngak hu makna ndung bak ilamo bangsa, peih bruk adaoh tamia, pasram padhih, dom kadha me-in ilamo bangsa; paik bingu dân chủ…haong yaom jien peih ngak labaih 20 tỷ đồng sa thun. Ong Vũ Hoài Bắc, Akaok mban Agama Rajaei brei thau:

"Dom bruk Quân khu 7 peih ngak dalam tukvak tapa, abih di nyu nan lac dom bruk pambuak tal pasram padhih, patagok prein yava di dom labik hu rilo rahra tui agama. Yau nan ngak hu talei pambuak gauk khang kajap".

    “Gul pataom, gul pataom, praong gul pataom. Jak jeng, jak jeng, praong jak jeng”, panuac pato di Chu tich Hồ Chí Minh miat miat lac jalan tacei ka Đảng ủy, Bộ Tư lệnh Quân khu 7 haong dom tỉnh, ban pamedeih tagok saong pambak tabiak dom yaom glaong đạo đức, ilamo siam mekre di dom agama…Nan lac halau gha prein khang piah pambuak gauk dak harei dak khang kajap bruk gul pataom bangsa, padang “thế trận lòng dân” angaok bhum taneh miền Đông dak harei dak khang kajap, ngak brei jayah bruk rahra kaya meda, taneh ia khang kajap, xã hội dân chủ, samu gauk, gheih ghang siam mekre, kajap takai yam tagok chủ nghĩa xã hội./.