Urang vak oh huac kan kandah tal dom labik atah bayah di mik va bangsa takik 

Jiak  20 thun , bhap bini Tày - Nùng di  Bắc Kạn song rilo tỉnh bhum Việt Bắc, dom tỉnh Tây Nguyên atah bayah hu bhian randap song anai  kamei  Tày siam binai angan Hoàng Úy. Gam lac urang vak, urang biên tập – urang lang sap song gam ngak  phát thanh viên, Hoàng Úy haong  ê-kíp ngak bruk brei tabiak yaok pluh ribau danak dak  sap Tày - Nùng di rayo papar sap papar binguk Bắc Kạn. Bruk ngak gleih glar,  pandap panda ngak bruk kurang takik, min, meng hatai  “takre bruk”, Hoàng Úy bhian caik tukvak nao tal dom puk palei bhum ceik glong piah “mboh di meta”, “pang meng tanye” song taom gaok,  ndom menyai nao mai song menuac urang. Hoàng Úy ndom lac: Dom mbang nao tal labik, yaom lac gleih glar, min biak hu yaom, tuk hu pandar sap di bangsa drei  piah ndom nyai nao mai, duah thau piah pabak bre kadha vak:      

  “Langiu di bruk  biên tập, lang sap, phát thanh viên dom danak dak di jabat, kol dahlak bhian nao tal mik va di dom puk palei bhum glong, piah duah thau ka rai duik, adat cambat tanarakun, hatai khin di mik va. Hu tuk, dahlak nao dom harei, hu labik oh ka hu riyak điện thoại atau jalan điện negar. Tuk mai sang, hu tuk hu mik va alin brei dom boh bei, hasit njam glai… nan lac hatai anit di mikva, njauk iek praong, iek glaong”.

Yaom lac tok  hu  11 urang jakar, urang vak, min Jabat sap bangsa, Rayo papar sap, papar binguk  Bắc Kạn taduan ngak dom bruk oh sit ngan song  3 danak dak sap bangsa, papar sap yaok harei lac “Danak dak sap Tày-Nùng”, “Danak dak sap Mông” song “danak dak sap  Dao” di abih  2 janih lac papar binguk song papar sap. Piah ka dom danak dak dui pachreih urang pang, urang maong iek, langiu dom khaw tin  kinh tế, xã hội ye dom urang hadah krah yau kreih camin, dom bruk ngak ilamu, doh tako jeng hu caik hatai ghi hình, thu thanh bahrau. Nhà báo Vương Cầu, Biên tập viên danak dak sap  Mông brei thau:       

“Piah hu danak dak gheih, chreih chrai, drei oh padeih paglaong ilamu, bac megru meng ayut, sahabat, urang hu rilo thun ngak bruk , piah pabak ilamu, sap ndom panuac puac di drei, piah ka bruk bac, langyah song padang ngak danak dak hu gheih, dui pachreh mikva jang”.

“Xa Yên Thổ, khổ Đức Hạnh” lac panuac ndom di dom bhum atah bayah kan kandah abih di tỉnh Cao Bằng… yau nan min, dom labik ni jeng bhain randap song urang kumei phóng viên  Ban Ánh Nguyệt. Ngak bruk di Jabat Bangsa- Rayo papar sap, papar binguk  Cao Bằng, bruk kanal hadar abih di saai dalam bruk ngak  mbao lac dom mbang ndik ceik, tapa chraoh  dom harei piah nao tal dom puk palei atah di abih, kan kandah di abih di labik tapen  negar  Đông Bắc di taneh ia . Lac  urang  Nùng asal Cao Bằng, Ban Ánh Nguyệt mboh drei hu mbuan lagaih jang rilo urang vak karei tuk meda pang song ndom hu rilo sap di mik va bangsa takik. Yaok rituh kadha vak ka bruk ngak mbang, kinh tế xã hội, menuac gheih bruk siam song dom gheih mekre ilamu, khan aow  di bhap bini Tày, Nùng, Mông, Dao, Lô Lô… hu  Ban Ánh Nguyệt yaih khan tal urang pang, urang iek:

“Vak ka bhap bini bangsa takik, bhum glong mbuan ye biak mbuan, min kan jeng biak kan. Mik va biak salut mbut, rap ar tuai, min jeng hu tuk oh sambai hatai, oh mbuan klah rabha. Kayau yau nan ye, piah mik va  khan brei drei thau, urang vak brei ndom nyai nao mai, brei duah thau dahlau ka adat cambat tanarakun di yaok labik, piah mik va mboh drei yau dom urang anek mai palei, oh lac urang tuai mai rivang . Tuk nan, mik va sbui hatai, klah rabha, bruk ngak hu mbuan lagaih jang”.

Labik prong,jien radaih nao mai hu tuk rilo jang  jien vak kadha ... min, dom urang ngak mbao bhum glong tuk halei jeng sahneng lac: Di bhum ceik car, bhum atah bayah  bruk pabak khaw tin dok takik, nan ye dom danka dak papar sap papar binguk meng sap di mik  va dom banga , langiu di bruk pabak khaw tin , daok lac labik khik ramik ilamu meng kan, sap ndom panuac puac, lac bruk hadah mbaok meta ka mik va. Langiu di nan, dom danak dak papar sap papar binguk sap bangsa takik jeng lac jalan ba sarak di Ndang, hukum di karja tame dalam rai duik,  lac  “labik sinya” pambuak sap ndom, hatai khin di bhap bini song pakat  ủy, karja...

Mong mboh bruk ngak mbao di labik tapen negar glai hajao ceik meriah meng thau hu dom gleih glar, kan kandah di dom urang vak, biên tập viên, kỹ thuật viên dom danak dak sap bangsa di rayo papar sap papar binguk dom  tỉnh bhum ceik gah brak. Yaom lac yau nan, min dom urang nan jeng dok harei melam kham merat yam tapa kan kandah, meng hatung hatian song hatai takre bruk, piah nao saong vak ka mik va bangsa takik labik atah bayah dok biak cong pang khaw tin./.

Urang lang: Hanipha- 21/6