Kayua meng tuk hu danak dak ka 8 bo saai Châu Thị Ngọc Điệp daok di  puk Đại Nghĩa Thắng, xa Đại Tâm hu mbaok tame rilo bruk pathau khan di bhum palei. Meng di nan, saai dakwah brei thau tal dom baoh sang jaik taphia di drei paglaong hatai sahaneng dalam bruk khik ramik, sangka ieik glang ka urang kumei saong uranaih.

“Drei hu mbaok tame danak dak ka 8, ye jeng nao pathau khan ka mikva adei saai drei thau, gam haong nan oh njauk taong paoh anek mbik yau dahlau deih di bhum palei drei.”

 Danak dak 8 hu peih ngak di 3 palei biak kan kandah daok di huyen Mỹ Xuyên. Ye palei Đại Nghĩa Thắng, xã Đại Tâm; palei Sóc Bưng, xa Thạnh Phú saong palei Phú Giao, xa Thạnh Quới ngan haong rilo bruk ngak lagaih hu saong daok peih ngak. Saai Dương Thị Mỹ Nhiên, Akaok Kapul Urang kumei puk Phú Giao, xa Thạnh Quới, huyen Mỹ Xuyên, tinh Sóc Trăng brei thau:

“Di tukvak masa anak tal, Kapul Urang kumei palei Phú Giao, xa Thạnh Quới meda pambuak bruk haong dom kapul di pakat angaok glaong, dom gah dom dhan, peih ngak siam dom bruk ngak di danak dak 8. Ini lac sa dalam dom sarak praong, hu angan siam brei pambuak tal bruk urang kumei saong uranaih, gam tal jalan ba tabiak brei ka likei saong kumei samu gauk saong pataom prein tame langyah hu lagaih dom bruk samar drah di urang kumei saong uranaih bhum palei urang bangsa takik.”

 Tukvak masa tapa, Kapul Urang kumei di huyen Mỹ Xuyên pataom prein tame 3 asal kadha praong. Dalam hu bruk dakwah brei thau, jak ba salih jalan pasahaneng, jalan ngak, daong brei yah klak dom adat cambat oh daok lagaih saong adat tanarakun dalam sang saong rahra, dom adat cambait oh siam saong dom bruk samar drah pambuak tal urang kumei saong uranaih; Padang ngak saong peih praong dom bruk ngak salih jalan sahaneng, jalan ngak, paglaong bruk ngak mbang duah jien, padang ngui ka urang kumei; Jhul khang bruk likei kumei yau gauk saong langyah dom bruk samar drah di urang kumei saong uranaih; khik siam khip kajap sap ndom panuac mayai jeng ye bruk hu mbaok tame di urang kumei saong uranaih dalam dom bruk cak rok patagok kinh te – xa hoi di rahra, pasang iek saong ndem mayai nao mai, daong ka urang kumei hu mbaok tame ngak dalam politik. Amuk Trần Hồng Ni, Akaok Kapul Urang kumei huyen Mỹ Xuyên, tinh Sóc Trăng brei thau:

“Piah peih ngak siam danak dak 8, Kapul Urang kumei Mỹ Xuyên paglaong bruk dakwah pathau khan, peih ngak dom bruk lagaih anak mata di bhum palei saong langyah dom bruk brei ka likei haong kumei samu gauk dalam rilo gah ngan haong urang kumei saong uranaih di bhum palei urang bangsa takik, yah klak dom bruk baoh kadha oh siam oh lagaih brei ka urang kumei, yah klak dom akaok saneng oh njauk brei ka urang kumei jeng ye adat cambat oh daok lagaih dalam bruk cak rok patagok di bhum palei.”

Hadei di tukvak masa peih ngak Danak dak 8, bruk likei kumei do gauk saong dalam raidiuk dalam bac magru, dalam bruk ngak, sangka ieik glang prein yava anek kumei di Sóc Trăng hu mboh siam; dalam nan hu urang kumei di bhum palei atah biyah, bhum mikva urang bangsa takik. Bruk ngak, labik dang di urang kumei dak harei dak hu brei mboh di dom gah dalam raidiuk, rahra saong dalam sang. Bruk paatah di gauk di urang likei saong kumei hu mboh salih bahrau siam lagaih, urang likei saong kumei hu ba kein lagaih dak harei dak siam jang. Tui mboh tal abih thun blaoh, dalam tinh hu 109 xã, phường, ban sit hu peih ngak bruk pacang caga taong paoh gauk dalam sang ngan haong jaik 180 Kalup, jaik 650 kapul nyaom pacang caga taong paoh gauk dalam sang, labaih 800 labik njauk jia tame di rahra, jaik 850 jalan ieu phone pandiak./.