Hadei di dom mon bac di tal bac, adei Y Minh Tuyết, anek saih tal bac 5B di labik sang bac PT Bangsa Bán trú Tiểu học Măng Cành, xã Măng Cành, huyện Kon Plông saong 187 ayut anek saih 8 tal bac karei pataom gauk di labik mbang huak di sang bac. Var lisei hu dom cei gru, anai gru ngak ka dom adei huak, jala pandiak ini hu ikan, ralow saong ia bai. Adei Y Minh Tuyết ndom lac yau ini: “Sang anek daok di palei Măng Pành. Anek caong hu daok di sang bac, hu pato pakai jeng menuac jeng urang, saong hu  huak dom var lisei biak bingi. Pak ini lasei bingi jang di sang, kayua di sang bhian oh hu ralow mbang yau labik ini”.

Thun bac ini, sang bac PT Bangsa Bán trú Tiểu học Măng Cành hu 272 anek saih, dalam nan bahrau hu 57 adei anek saih hu mbang tui Sarak ka 116 thun 2016 di Rajaei. Anak bruk dom adei anek saih daok veik oh hu mbang tui sarak, min sang kan kandah, daok atah di sang bac, nan ye mBan Giám hiệu kham merat khik var lisei jala pandiak  ka taong abih dom adei, kuhria gam 85 anek saih di 6 labik bac sit. Gru Trần Thông, Hiệu trưởng Sang bac PT Bangsa Bán trú Tiểu học Măng Cành brei thau, tahanek huak glaih glar min bui sambai kayua dom var lisei ini nyu pachreih dom adei mai bac: “Khik var lisei jala pandiak ka anek saih. Dalam bilan hajan bo oh hu lisei huak tuk jala pandiak ye biar harei dom adei oh mai bac veik. Ngak lisei huak jala pandiak ka dom adei ye dom adei hu mbaok bac ginup var biar harei”.

Thun bac ini, gam haong bruk peih bac bán trú ka labaih 1.900 anek saih hu mbang tui sarak ka 116 thun 2016 di Rajaei, piah khik hu var lisei jala pandiak brei ka jaik 1.250 anek saih bán trú di 4 xã, ban sit, lac: Măng Cành, Pờ Ê, Đăk Tăng saong ban sit Măng Đen, gah Pato Megru huyện Kon Plông hu peih ngak rilo jalan ngak saong taduan hu bruk pachreih tui di karja, dom kapul nyaom, dom urang ngak pahla. Tapa nan, danak dak raong adei di kapul halan hatian “Niềm tin” saong Danak dak raong adei Tây Nguyên hu daong brei 397 anek saih, yaok anek saih hu daong 17.000 đồng sa harei. Kadung jien Anek saih kan kathaot bhum glaong Danak dak “Lisei huak hu ralow” hu daong lisei huak jala pandiak brei ka 850 anek saih, dalam nan hu 412 anek saih mầm non, yaom daong yaok adei lac 8.000 đồng, saong 438 học sinh Tiểu học, THCS lac 10.000 đồng. Dalam tuk pok jien daong oh hu rilo, piah khik ka var lisei hu pandap mbang bingi brei ka dom adei anek saih, gru Nguyễn Minh Cường, Akaok Jabat Pato Megru huyện Kon Plông brei thau: “Dom hiệu trưởng jak ba dom amaik ame di anek saih daong padai, brah, dom janih njam patam. Amaik ame halei oh hu padai brah njam patam ye daong njuh. Meyah oh hu hagait ye rik prein mai daong tahanek lisei ka dom adei. Daok bruk xã hội hóa ye Jabat Pato Megru pambuak haong dom xã, ban sit, dom hiệu trưởng ieu dom urang hu jien padai ngak pahla daong brei, saong bhian hu daong meng pandap, yau ye mì tôm, ikan pandam, menyek mbang”.

Langiu bruk daong di bol bhap rahra, dom gru pato di sang bac jeng hu rik daong prein yava meng bruk raong menuk ada…meng pandap mbang labaih di dom adei, pala njam patam dalam mblang bein sang bac… piah pabak var mbang ka anek saih. Dom anek saih di dom sang bac bhum atah bayah, bhum bhap bini bangsa takik di huyện bhum III Kon Plông khang hatai nao tal sang bac meng hu dom var lisei bak hatai anit ranam./.