Tui Sở Kế hoạch saong Dang akaok Đầu tư tỉnh Đồng Nai, kuhria tal puac bilan 6 thun ini, bruk brei masraiy phun jien buh tame dang akaok di dalam tinh mek hu labaih 15% jalan ba tabiak, bier jang rilo tanut kuhria brei masaiy di dalam taneh ia lac 27%. Bruk njauk caik hatai nan lac, kuhria tal harei 31/5, di dalam tỉnh hu 7 kapul hu bruk brei masraiy phun jien buh tame đầu tư công lac 0%. Ong Nguyễn Hữu Nguyên – Yam ndok akaok Sở Kế hoạch saong Dang akaok Đầu tư tỉnh Đồng Nai brei thau lac, jalan mang anak njuak paglaong bruk pambuak, tui iek brei jhul samar saong samu langyah dom cuang kandah, tavak tavaiy: “Tapa bruk peih ngak, yaok bilan jeng yau 2 adit sa mbang, Sở Kế hoạch saong Đầu tư dang akaok gam haong dom sở mban, dom gah, bhum palei, po buh jien tame nyaom biai piah taong yaom bruk brei masaiy jang yau dom kan kandah, tavak tavaiy. Tapa nan, padang jalan ba tabiak ka yaok danak dak piah langyah”

Sa di dalam dom phun jien mek tame hu makna praong ka gilang paraik bhum palei lac phun jien mek tame meng taneh riya. Kuhria tal luac thun 2022, phun jien jak ba hu mai meng bruk taong yaom taneh riya bahrau hu labaih 5.600 tỷ đồng. Dalam tuk jalan ba tabiak đầu tư công trung hạn tukvak 2021 – 2025 ba tabiak jalan ngak lac 45.000 tỷ đồng. Kayua yau nan ye, phun jien mek tame meng taneh riya tukvak 2021 – 2022 ka mek hu hatai caong saong tui kuhria tal luac thun 2025 meda oh ginup pabak ka caong phun jien tui jalan ba tabiak.

Ong Đặng Minh Đức – Akaok Sở Tài nguyên saong Môi trường tỉnh Đồng Nai brei thau lac: di bruk ngak, tukvak masa tapa dom jabat, dom tinh, ban ka oh ngak cambaih laih bruk ngak di yaok urang khik ramik bruk. Ong Đức likau njauk padang kapul ngak bruk, dalam nan njauk ba tabiak cambaih laih bruk ngak di yaok urang. Anak mata, ong Đức likau njauk parabha kapul brei ngak dahlau di abih bruk langyah: “Urak ini dalam nyaom dom danak dak hu ndem lac, njauk ba tabiak pilih dom danak dak halei piah ngak dahlau. Brei thau cambaih laih anak mata hu 8 labik taneh lac taneh cao su, ngak siam bruk peih mbaik jalan samar drah, dom adat harak gar njauk patui veik ba tabiak to yaom. Parabha tui yaok nyaom, pilih ruah brei ngak dahlau nyaom halei tui kuhria mbuan peih ngak saong hu kein lagaih abih piah ngak”.

6 bilan akaok thun 2023, paka di bruk ngak kong hu patagok labaih 3%. Ini lac tanut tagok bier abih dalam rilo thun ini mai. Tỉnh Đồng Nai yau lac bhum palei hu prein khang di abih ka labik ngak kong daok laik tame bruk dak harei dak kurang kadung taneh duh ka gah ini.

Urak ini tỉnh Đồng Nai daok samar drah pambuak haong dom mintri, dom gah jhul samar bruk ngak salah adat padang ngak dom labik ngak kong bahrau hu Thủ tướng brei tapa. Amuk Nguyễn Thị Hoàng – Phó akaok UBND tỉnh Đồng Nai brei thau lac: “8 labik ngak kong urak ini daok jhul samar ngak adat. Hadei di tuk ngak salah adat ye tinh meda jhul khang bruk peih mbaok taneh, biyar jien. Ini lac bruk ngak kan abih, nan ye njauk pataom tame bruk ngak ini meda samar drah ba tame pandar di dom labik ngak kong bo jaik atal hu quy hoạch”.

 Bahrau ini, di mbang nyaom biai mbang ka 12, HĐND tỉnh Đồng Nai mbang X hu brei tame bruk miễn nhiệm bruk ngak akaok UBND tỉnh Đồng Nai ngan haong ong Cao Tiến Dũng. Bruk ini dak harei dak ngak catang tagok tame dom kan kandah di urak ini. Đảng bộ, kanja saong rahra tỉnh Đồng Nai njauk patui veik kham marat rilo jang, hu rilo bruk ngak siam lagaih jang piah yam tapa kan kandah, jhul samar drah bruk patagok./.