Duk haong daok trọ ye labik ini siam jang, hu labik me-in ka uranaih, khik kajap sron mbon, salamat

Urak ini tỉnh Đồng Nai hu 13 danak dak sang daok xã hội, sang daok công nhân daok hu peih ngak haong taneh praong abih tih jaik 60 ha, pabak hu 10.746 baoh sang. Rilo thun tapa, bruk padang ngak sang daok xã hội di tỉnh Đồng Nai jeng oh hu yau bruk ba tabiak kayua dom danak dak rilo meng peih ngak suai damuai. Tal akaok thun ini, bahrau hu jaik 3.800 baoh sang hu ngak salah blaoh.

Dalam tuk sang daok xã hội oh ginup pabak, ye dalam tỉnh Đồng Nai urak ini hu jaik 150.000 bilik trọ brei ka labaih 450.000 urang ngak. Dom bilik trọ rilo meng sit, giniuk, klak. Min dalam tỉnh hu tal 620.000 urang ngak nan ye dom labik daok trọ yaom lap jeng hu menuac pah abih.

Huyện Nhơn Trạch hu 6 labik ngak kong, jaik 13.000 urang ngak. Ini lac labik hadah ka sang daok xã hội dalam labik ngak kong. Sa-ai Nguyễn Thị Thu blei sa baoh sang daok xã hội di labik ngak kong Nhơn Trạch 1 meng kreh thun. Duk haong daok trọ ye labik ini siam jang, hu labik me-in ka uranaih, khik kajap sron mbon, salamat. Tui sa-ai Thu, yaom pablei sa baoh sang daok xã hội lac 320 triệu jeng daok dalam prein bayar hu di rilo urang ngak.

Dom puk palei hu rilo labik ngak kong, caong hu rilo sang daok xã hội lac Nhơn Trạch, Long Thành, Trảng Bom saong ban Biên Hòa. Tui ong Nguyễn Hữu Nguyên – Chủ tịch UB bhap bini ban Biên Hòa, labik ini daok peih ngak 4 danak dak sang daok xã hội hu 1.669 baoh. Anak tal, ban pachreih ba dom po đầu tư peih ngak samar danak dak saong pok panuac tagok UB bhap bini tỉnh brei pabak rilo jang dom danak dak sang daok xã hội di dom jalan bahrau peih, hu quy hoạch labik đô thị: “Ndom ka taneh padang ngak sang, jabat khik ramik đô thị hu pasang iek abih dom labik taneh di karja, taneh hacih bo quy hoạch taneh daok ginup kadha piah padang ngak sang daok xã hội ye pok panuac tagok tỉnh. Daok dom labik taneh di bhap bini, abih di nyu lac dom labik taneh rahra daok ngak sang trọ, meda rami ramik ngak jeng sang daok xã hội, piah rahra labik nan rik daong buh jien tame padang ngak”

  Hadei di tuk mek panuac dom sở, ngành saong puk palei, Sở Padang ngak tỉnh Đồng Nai hu tacei tabiak 104 labik piah peih bruk padang ngak sang daok xã hội. Ong Lê Mạnh Dũng – Phaok Yam ndok iek gah Sở Padang ngak tỉnh Đồng Nai brei thau, dom urang đầu tư urak ini daok sangka gilac veik haong sang daok xã hội: “Dahlau daih, takik thei sangka tal sang daok xã hội kayua nyu tok mek hu laba hadei meng kak je lac 10%, nan ye dom urang đầu tư oh mbak carak rilo. Min tuk Sarak 100 tabiak rai, brei adat pablei salih 20% dom sang daok xã hội, nan ye tal tukvak ini, hu biak rilo urang đầu tư mai veik hu mbaok tame đấu thầu pilih ruah urang buh jien tame padang ngak sang daok xã hội”.

Tui bruk cakrok sang daok xã hội di tỉnh Đồng Nai, tui kuhria tal thun 2025 meda ngak hu 2.500 baoh, yaok palei hu rilo labik ngak kong meda peih ngak meng 1-2 danak dak sang daok xã hội. Yaom lac bruk ba tangin tame ngak sang daok xã hội di tỉnh Đồng Nai lac suai damuai, min ini jeng lac bruk njauk pok meyaom piah daong palagaih ka urang ngak kak kajap suai lavik haong tỉnh./.

Lang sap: Mousa Phương – 07/04