Alin radaih juak ka anek saih bangsa takik gaok kan kandah hu nao bac

Bruk bhap bini dom bangsa takik daong prein nao bac hu padang tabiak meng di thun 2018 saong daok dalam Ủy ban MTTQ Việt Nam xã. 24 urang hu mbaok tame bruk ini jeng lac dom urang bangsa takik hu angan je, daok ngak dalam dom kalup, kapul di [puk palei. Yaok bilan, yaok urang eng drei patak pataom 500 ribau đồng piah rik tame kadung jien di bruk ngak ini. Taphia di nan, yaok urang daok hu pambuak haong puk paga, gauk gar di drei piah jak ba rik daong ka bruk pachreih bac.

Di puk Lác Chiếu hu 380 baoh sang ye 51% dalam nan lac bhap bini dom bangsa takik yau ye: Chơro, Khmer, Tày, Nùng, Hoa. Puk urak ini daok 4 baoh sang kan kathaot saong 2 baoh sang jaik kathaot. Min, jeng daok hu biak rilo sang kan kandah hu anek daok nao bac, uranaih matuai caong hu daong. Meng nan, tuk hatai saneng padang bruk bhap bini dom bangsa takik daong prein tal sang bac hu tabiak rai, nyu taduan hu bruk hu mbaok tame di rilo bhap bini, abih di nyu nan lac urang taha, urang hu angan je dalam puk. 

Meng bruk ba tangin tame di bhap bini, tal urak ini bruk ngak ini taduan hu bruk pachreih tui, rik daong yaom jien 62 triệu đồng. Meng nan mai hu 5 mbang alin hadaih ka anek saih bangsa takik kan kandah lac thẻ bảo hiểm y tế, tapuk siphau, radaih juak, pandap bac … ka anek saih, sinh viên bangsa takik gaok kan kandah, ngak jeng prein pachreih ba daong ka dom adei kham marat jang dalam bruk bac taa piah peih tabiak jalan tui hatai caong di drei dalam harei hadei.

Ong Hoàng Thiên Bình, urang hu angan je dalam bhap bini bangsa takik di xã Bảo Quang, urang dalam bruk Bhap bini dom bangsa takik daong preinnao bac, brei thau:  “Dahlau deih, bruk brei ka anek bhik bac da-a tal labik tal dhua dalam bhap bini ka oh hu sangka rilo. Tal urak ini thei jeng caong anek bhik hu nao bac da-a tal labik tal dhua piah harei hadei duah hu bruk ngak tani tanat. Meng nan, bhap bini bangsa takik biak caong khin rik prein tame pachreih ba anek bhik nao bac”.

Adei Thị Ánh Tuyết (bangsa Chơro) urak ini lac anek saih tal 6, Sang bac THCS Bảo Quang khan lac: “Sang anek atah di sang bac jaik 3km. Amaik ame nao ngak meng saboh page tal biar harei sup meng mai sang, nan ye piah tal sang bac, anek nao gam radaih haong ayut saabat atau nao gam haong urang nao jalan. Tuk tame tal 6, anek hu dom anai dom cei alin radaih juak nan ye anek biak uan tabuan kayua drei eng drei nao tal sang bac. Hu tuk daok hu daong ka amaik pajeng adei nao tal sang bac blaoh drei meng nao bac”.

Daok adei Thị Thanh Nga (puk Lác Chiếu, bangsa Chơro), hadei di tuk bac blaoh danak dak tal 5 adei oh khin nao bac. Mban puk palei jeng lac urang dalam bruk Bhap bini dom bangsa takik daong prein nao bac saong gru pato hu mai tal sang pachreih adei nao bac. Piah pachreih adei nao bac, dom urang dalam bruk Bhap bini dom bangsa takik daong prein nao bac hu alin ka adei Nga 1 sruh radaih juak, Ban giám hiệu sang bac jeng hu alin ka adei khan aw, tapuk siphau piah adei sanang hatai nao bac.

Anai gru Nguyễn Thị Ngọc Mẫn, Akaok Sang bac THCS Bảo Quang brei thau, tukvak tapa Ủy ban MTTQ Việt Nam xã saong dom urang dalam bruk Bhap bini bangsa takik daong prein nao bac hu rilo bruk ngak daong ka anek saih di sang bac. Tapa nan, hu 28 thẻ bảo hiểm y tế, 7 paok jien bac, 2 sruh radaih juak hu alin ka anek saih di sang bac. Meng nan hu daong ngak brei trun manieng dom kan kandah mangaok jalan nao tal sang bac di dom adei anek saih bangsa takik.

Tui amuk Lương Thị Bảo Thùy, akaok Ủy ban MTTQ Việt Nam xã, tapa sa tukvak ngak bruk, bruk bhap bini dom bangsa takik daong prein nao bac hu brei mboh bhap bini sangka rilo jang tal bruk bac taa di anek bhik. Gam haong nan hu ngak jeng prein khang daong ka anek saih bangsa takik gaok kan kandah kham marat jang dalam bruk bac taa piah peih tabiak jalan tui hatai caong di drei dalam harei hadei./.

Urang lang: Thu Thao – 30/09