Luac vaktu padang ngak palei pala bahrau, Đồng Nai tuk halei jeng pataom buh jien tame khang ka padang ngak hạ tầng ka dom bhum palei pala. Dalam nan, praong abih lac buh jien tame gah hạ tầng thương mại, abih di nyu lac padang dom chuỗi pambuak bruk meng ngak tal pablei kaya nong hu labik pablei khang kajap jang.

Piah pachreih urang buh jien sangka tal bruk buh jien padang darak pasar palei pala, Đồng Nai hu rilo jalan ngak, sarak pachreih, daong yau patrun jien pah taneh, daong brei mesre phun jien piah ngak, daong ka doanh nghiệp peih bruk roh duah ba brei ilamu công nghệ, daong pato pakai urang ngak piah cak rok patagok darak pasar...

Meda ndom lac, darak pasar palei pala padang tagok meda ba mai labik pablei salih pandap panda di bhum palei pala, abih di nyu lac ngan haong dom labik ngak nong praong yau huyện Xuân Lộc.

Tui amuk Nguyễn Thị Cát Tiên, Akaok UBND huyện Xuân Lộc, huyện hu labaih 100 labik pala, ngak praong, labaih 220 trang trại hu 9 janih kaya nong praong. Tuk vak tapa, huyện padang hu 15 mã bhum pala, 11 chuỗi pambuak gauk ngak kak kajap haong pablei tabiak, labaih 50 mã pandap panda kaya nong. Huyện Xuân Lộc hu brei angan lac huyện mek hu chuẩn palei pala bahrau kiểu mẫu tui jalan cak rok patagok pandap panda kaya nong khang kajap. Kayua yau nan ye, darak pasar palei pala lac labik pataom pandap camereip abih di dom urang pala, ngak dalam huyện.

Gam haong bruk cak rok patagok dom darak palei pala, Đồng Nai jeng pataom tame ngak ka nyu salah tiêu chí padang ngak dom labik daok bahrau, ngak jeng jalan diuk rai văn minh di palei pala. Tal harei ini, dalam tỉnh hu 14 labik daok bahrau hu taduan brei angan. Jak jeng abih dalam bruk padang ngak dom labik daok bahrau di Đồng Nai nan lac pachreih hu bhap bani abih drei hu mbaok tame. Bhap bani oh lac tok ngak 3 hacih sa-at nan lac hacih sa-at sang, hacih sa-at ghing ghaok, hacih sa-at jalan dhuan bo daok jak gauk pala bingu, phun hijao, khik ramik jalan mbak nao mai dalam palei hadah hadai, hijao mekre, hacih sa-at.

Amuk Huỳnh Thị Tuyết San, daok dalam labik daok bahrau di ấp 4, xã Lâm San, huyện Cẩm Mỹ khan lac, urang jakar xã biak abih hatai, tuk halei jeng jak ba mikva ngak tui dom tiêu chí labik daok bahrau. Meng nan, mikva thei jeng kham merat puh ramik jalan mbak nao mai, pala bingu, pala phun kayau saong khik iek ka nyu tamuh siam.

Daok ong Lê Quốc Việt, phường Xuân Thanh, ban Long Khánh ye tuk halei jeng caik rilo tukavk piah mong iek phun bingu, phun cảnh dalam mblang bein sang drei. Ong Việt khan lac, mikva eng drei blei phun, blei bingu mai pala saong jak gauk mong iek, piah ngak jeng dom canah jalan hadah, hijao, hacih, mekre. An ninh jeng hu khik siam nan ye mikva thei jeng abih hatai rik daong tame bruk padang ngak palei pala bahrau.  

Di ấp 1 xã Bình Lộc, ban Long Khánh, labik daok bahrau prong 34 ha, hu labaih 400 sang gam haong labaih 1.900 urang tuk halei jeng hadah tanjak sambo bingu. Kayua lac labik cakrok khang gah rivang ma-in sinh thái bein nan ye bhap bani kham merat piah hu dom jalan bingu, phun kayau, hijao, hacih, mekre. Dom sang bein jeng caik hatai ngak mekre sang bein, padang bein kiểu mẫu piah jeng labik pagun taom gauk dui pachreih tuai damuai mai tal.

Oh lac tok kham merat pambak prong gah số lượng, dom labik daok bahrau di tỉnh Đồng Nai hu rilo jalan ngak hadah krah piah ngak brei jang dom  tiêu chí ba tabiak. Dom puk palei iek tui bruk di drei, pren khang di drei piah peih bruk padang ngak labik daok bahrau ka nyu laghaih. Bruk ini hu brei mboh cambaih dalam bruk padang ngak labik daok bahrau dalam tỉnh./.

Urang lang: Jasi