Huyện Thống Nhất lac labik raong glang rilo. Ta-eng di xã Lộ 25, dalam 52 mblang bein raong pabui, menuk ye hu tal 18 mblang bein brei padeih raong kayua oh khik siam ka môi trường. Bahrau di ini, jabat chức năng hu mboh sa mblang bein di xã Lộ 25 tathuak nerak suan adat hukum tabiak gah langiu. Ong Trần Thanh Tùng – Urang raong glang brei thau: “Dahlak padeih raong lavik paje. Bahrau palao pabui raong veik jaik di ini. Urak ini pasang iek môi trường ye oh njauk haong harak gar bahrau. Dahlak jeng ngak tui, oh cagar veik ngak hagait. Tapa ini jeng caong khin karja palaghaih, tacei pato cambaih laih dom kadha njauk ngak ka môi trường ye khaol dahlak jeng ngak tui ka nyu njauk.”

Raong mbang pah ka dom doanh nghiệp FDI daok lac bruk ngak mboh rilo di huyện Thống Nhất. Yau nan min, rilo mblang bein raong mbang pah daok ngak suan adat khik caga alam môi trường. Meng akaok thun 2023 tal ini, huyện Thống Nhất hu taong phạt dom labik raong glang ngak suan adat gah môi trường 1,2 tỷ đồng. Ong Lê Quang Hoà – Phaok kaok UBND xã Lộ 25, huyện Thống Nhất brei thau: “Tapa pasang iek mboh lac mikva jeng ngak tui, saong jeng thau hu bruk siam mekre di khik caga alam môi trường. Urak ini dom trang trại hu taong phạt vi phạm hành chính saong daok kuhria pablei pabui avar jang piah pasiam dom hậu quả. Anak tal xã daok nao tal dom labik pandiak saong khang hatai langyah dom bruk ngak suan gah môi trường”.

Bahrau ini, UBND tỉnh Đồng Nai hu tabiak sarak panduan ba labaih 3.000 labik raong pabui, menuk tabiak truh labik oh hu adat raong. Dom labik ini njauk panduan ba nao dahlau di harei 31/12/2024. Dom labik raong glang njauk panduan ba nao labik karei atau padeih raong meblaih labaih meteh dom mblang bein raong glang di tỉnh. Dom labik raong ini pataom rilo di dom huyện Trảng Bom, Long Thành, Thống Nhất, Vĩnh Cửu. Ndom ka bruk panduan ba nao labik karei, ong Võ Văn Phi – Phaok akaok UBND tỉnh Đồng Nai brei thau: “Raong glang brei tui jalan khang kajap suai lavik. Urak ini, tỉnh hu rilo xã mek hu angan palei pala bahrau paglaong, palei pala bahrau kiểu mẫu. Jalan ngak di tỉnh Đồng Nai lac meda cak rok patagok du lịch, nan ye bruk môi trường hu iek prong.”

Pasak raong glang Đồng Nai urak ini hu tapol pabui abih tih lac labaih 2,6 triệu drei saong abih tih tapol menuk jaik 26 triệu drei. Kuhria ta-eng thun 2022, sản lượng gah raong glang mek hu labaih 644.000 tấn. Bruk pasang iek catang gah môi trường nan lac sa dalam dom bruk njauk ngak piah khik ka gah raong glang cak rok patagok khang kajap./.