Dom tinh, ban dalam bhum Đông Nam Bộ mboh lac daok pataom hu ginup 3 siam lagaih tui sap Yuan lac: “thiên thời – địa lợi – nhân hòa” piah pambuak gauk cak rok patagok du lịch. Ini lac bhum kinh tế praong, ba akaok nao dahlau gah kinh tế di taneh ia, bruk đô thị hóa glaong abih di dalam taneh ia, cơ sở hạ tầng biak siam, jalan mbak pambuak dom bhum dak harei dak siam tagok. Bhum taneh ini hu biak rilo janih, gam hu tasik, hu ceik, gam hu taneran, langik tasik biak siam lagaih. Urang par akaok di 6 tinh, ban dalam bhum tuk halei jeng halain hatain ka bruk pambuak gauk, gam cak rok patagok. Nan jeng lac siam lagaih ka bruk pambuak gauk ngak du lịch. Min, jeng daok hu dom bruk daok tavak tavaiy, dalam nan hu bruk ka oh samu gauk gah cơ sở hạ tầng, labik tal, labik daok, dịch vụ saong prein manuac ngak di dom tinh, ban, ngak ka bruk pambuak gauk di dom tour gaok kan kandah. Ong Trần Quang Duy – Yam ndok Công ty du lịch Chim Cánh Cụt ndem lac:“Hu dom tỉnh hu bloh jalan cak rok patagok meng lavik mai yau ye Bà Rịa - Vũng Tàu atau Tây Ninh, min taphia nan jeng hu dom tỉnh yau ye Bình Phước atau Bình Dương bahrau tamuh tabiak nan ye gah sarak, cơ sở hạ tầng atau bruk yaih khan labik tal daok takik. Bruk ini ngak ka rilo tuai damuai saong dom công ty du lịch oh khin pilih ruah kayua bruk duah thau khau tin labik tal daok biak takik, oh thau nao tal bloh nyu yau habar”.

Tui dom chuyên gia, bruk camriep bo yaok tinh, ban njauk ngak lac brei duah saong ngak cambaih laih dom prein khang, dom kein lagaih di drei, padang angan je karei, hadei di nan meng pambuak gauk ngak jeng dom tour tuyến, pandap panda pambuak gauk hu rilo janih, plaih bruk deih yau gauk. Pagap yau, dalam sa tour pambuak gauk, tuai damuai tal Bà Rịa- Vũng Tàu piah ma-in di tasik, mbang dom kaya tasik, tapa Bình Phước piah rivang iek glai Bù Gia Mập, mbang pandap mbang haong njam glai; tapa Tây Ninh piah nao du lịch tâm linh di ceik Bà Đen, mbang pandap mbang chay di agama Cao Đài....  Phó Giáo sư - Tiến sĩ Trần Đình Thiên, Akaok Viện Kinh tế Việt Nam ndem lac: “Yaok tỉnh brei thau hu prein khang saong dom kein lagaih di drei piah oh njauk lai srau. Njauk brei ka yaok tinh, ban sa labik piah patagok dom prein khang di drei. Tuk pambuak gauk hu yau nan, ye tuai mai tal khol drei meda brei ka tuai iek bản đồ du lịch di bhum, mayah caong khin bruk nan ye nao pak deih, daok TP.HCM ye hu bruk ini.”

Ong Nguyễn Minh Mẫn – Yam ndok truyền thông Công ty TST Tourist caong lac, dom tinh, ban di bhum Đông Nam Bộ pambuak gauk catang jang dalam bruk yaih khan pandap panda, pato pakai menuac ngak, klah rabha ilamo, roh duah darak pasa, padang pandap panda saong TP.HCM njauk khik bruk pato tacei di drei dalam dom bruk  ini: “Dalam bruk pambuak gauk ye khol drei meda pamaong tal bruk ba ka gauk dom kein lagaih, abih di nyu nan lac dom bruk pato ilamo ka urang ngak habar piah ka deih yau gauk dalam dom tinh, ban. Ka dua lac paglaong hatai sahaneng ka darak pasa piah caga ka dom labik tal saong ngak habar piah ngak tabiak dom pandap panda rilo urang takre. Dom doanh nghiệp lữ hành di TP.HCM meda gam haong dom doanh nghiệp dom tinh, ban meda taong yaom hu hatai caong di tuai damuai, ngak habar piah padang ngak pandap panda lagaih di abih.”

Dom chuyên gia, doanh nghiệp jeng mboh lac, dom tinh, ban di bhum Đông Nam Bộ njauk paglaong bruk peih ngak dom danak dak pambuak gauk, ginum biai, dom tour pasang iek, dom kapul famtrip piah ka dom công ty du lịch saong dom jabat, dom gah pambuak tal hu tukvak piah ginum biai haong gauk, klah rabha khau tin, ba gauk padang ngak pandap panda saong ngak tabiak dom jalan ngak lagaih ka bruk pambuak du lịch bhum./.