Pandiak bhang dui atah rilo bilan tapa ngak ka rilo danao ia di tỉnh Bình Thuận jaik thu abih. Pandiak khang ngak ka bhap bini kurang ia pandar saong ia pala drak. Trak damak di abih lac huyện Hàm Thuận Nam, binek Tà Mon thu lagu, daok binek Tân Lập ia daok 300.000 m3 min. Ong Nguyễn Hữu Phước, Phaok Yam ndok Sở Ngak nong saong Patagok palei pala tỉnh Bình Thuận brei thau, pandiak bhang dui atah ngak kan kandah trak ka bruk pala drak, bruk ngak mbang ngak huak di bhap bini: “urak ini hu 24 xã kurang ia, jaik 90.000 sang rahra kurang ia pandar. Daok phun pala ye labaih 1.000ha thanh long kurang ia pruh, jaik 300ha thu matai. Anak mata Cty khai thác thuỷ lợi dang tabiak parabha ia, dom puk palei pambuak gauk piah ba ia, dom ribaong dalam mblang hamu brei kuac raok ka ia nduac mbuan, brei pruh ia kali kalih, pruh sit sit abih takik ia.”

Daok di tỉnh Bình Phước, pandiak bhang, kurang ia pruh daok ngak kan kandah ka bein phun mbang baoh, bein mariak kalu, bein pa-ok blait di mikva urang nong di 4 huyện: Hớn Quản, Lộc Ninh, Bù Đăng saong Bù Gia Mập. Urak ini hu jaik 7.900 ha phun pala thu, matai. Pandiak bhang daok ngak brei dom bingun ia thu abih, ngak ka jaik 1.200 sang bhap bini kurang ia pandar. Amuk Nguyễn Thị Bạch Lan daok di palei Bù La, xã Bù Gia Mập, huyện Bù Gia Mập, tỉnh Bình Phước brei thau, sang hu bingun ia min urak ini thu abih ia nan ye brei nao blei ia mai pandar. Sa radaih ia sit yaom 200.000 đồng, sang pandar hu 4 harei. “Meyah hu ia ye pandar nyu bingi jang, ia takik nan ye pandar kali kalih. Urak ini mek pako praong ka anek taco nyu tame nan manei, blaoh mek ia manei blaoh nan papah khan ao piah patak pataom ia, abih takik jien blei ia”

Tui kuria mboh dahlau di Pasak khí tượng thuỷ văn negar, thun ini, dom tỉnh, ban dalam bhum Đông Nam bộ bilan hajan mai tal suai jang, lac di jhung bilan 5, nan ye bruk pandiak bhang daok dui atah. Anak bruk ini, UBND dom tỉnh, ban hu tacei pato dom gah pambuak tal duah jalan pacang caga pandiak bhang, kurang ia piah pabak ka bruk ngak nong saong bruk ngak mbang ngak huak.

Ong Đỗ Xuân Thảo, akaok Chi cục Thuỷ lợi, Sở Ngak nong saong patagok palei pala tỉnh Bà Rịa–Vũng Tàu brei thau, tukvak ini, ia di dom binek, kavei daok hu 30 triệu m3, ginup pruh ka 6.300ha bilan Đông Xuân, pruh daong ka phun pala karei lac 2.900ha saong pabak ka bruk pandar ia di bhap bini. Langik pandiak yau ini mbuan ngak brei dom binek, kavei ia trun daok takik, nan ye tỉnh hu caga jalan ngak piah khik ia pruh ka mikva.

Daok di Bình Dương, urak ini 31 sang mac ia palei pala di dom xã ngak bruk gam gam nan ye oh rah tabiak bruk kurang ia pandar. Ong Nguyễn Khánh Trường, akaok Chi cục Thủy lợi tỉnh Bình Dương brei thau, binek Đá Bàn ia daok hu ginup ka mikva pruh phun pala tal abih bilan thu, daok danao Dốc Nhàn mbuan si kurang ia:“Gah ngak nong hu kakei gah khik ramik danao, binek peih ngak dom jalan khik ramik, ba ia pruh patak pataom, piah khik ginup ia pruh mbiah tal bilan hajan. Gam haong nan, dom ribaong jeng hu kuac raok ka ia nduac samar piah patagok prein ba ia, pabak ia pruh ka yaok labik pala caong hu ia pruh”

Di tỉnh Đồng Nai, pandiak bhang dui atah ngak ka ia di dom danao daok labaih meteh min. Nan ye Sở Ngak nong saong patagok palei pala hu daong ka puk palei salih janih phun pala, pajaih phun pala di dom labik mbuan kurang ia di bilan pandiak. Piah pacang caga pandiak bhang, karja jeng caong hu bruk ba tangin tame di taong abih bol bhap rahra dalam bruk pandar ia patak pataom, kali kalih, siam lagaih./.