Pabe hu palao tabiak gah langiu duah mbang 

Hu Pasak Dịch vụ ngak nong yaih khan ka bruk raong pabe pablei rilow, ong Nguyễn Văn Luận daok di palei  Công Tạo, xã Bình Phú, huyện Tân Hồng padang var ro saong hu jao brei 60 drei pabe meng danak dak  “Padang bruk raong pabe rilow di dom tỉnh Bhum taneran kraong Cuu Long” kayua Pasak pachreih nong pakat negar peih ngak. Tuk tame danak dak, hu daong meteh anek pajaih, meteh pandap mbang saong jru vaccine ka pabe, daok veik sang ong Luận  saong dom sang karei buh tame 50% jien blei anek pajaih saong ngak var raong. Yaok mbang raong pabe meng 3 tal 4 bilan lac pablei hu, tuk nan pabe trak meng 30 tal 40kg sa drei, yaom meng 115.000 tal 125.000 đồng sa kilo, kuhria tabiak yaok drei pabe rilow laba hu labaih 1,5 trieu dong. Tapa dom mbang pablei, ong Luận mboh hu cambaih kein laba meng bruk ini ba mai, saong biak lagaih haong dom baoh sang bhum tapen negar, patagok jien mek tame saong tani tanat raidiuk baoh sang urang ngak nong:

“Kein laba kinh te urak ini  kuhria tui yaom darak pasa mboh jeng hu, jien mek tame jeng glong. Raong tal tuk pablei hu  1,5 trieu. Prein drei buh tabiak gam hareik drei pala, pandap mbang jeng takik min, yaok drei var page mbang 100 gram, lac hareik hu blaoh saong drei nao kaoh patei brei mbang. Drei mboh lagaih, hu daong, hu taneh brei ka urang nong raong lac biak siam.”

Meng 100 drei pabe hu jao brei meng danak dak, tal urak ini taphon pabe di sang sa-ai Phan Thị Bích Tuyền, xã Tân Hộ Cơ, huyện Tân Hồng tagok tal 450 drei. Sa-ai pablei hu 3 mbang, yaok mbang raong meng 3 tal 4 bilan, kuhria rah tapa  pabe pablei trak meng 30 tal 40 kg sa drei. Meng dom mbang pablei pabe, sang sa-ai  Bích Tuyền laba hu labaih 120 trieu dong. Mboh  cambaih kein laba, sa-ai Tuyền daok padang veik var ro piah peih praong bruk praong pabe dalam tukvak anak tal, tui kuhria lac meng 600 tal 700 drei gam pabe binai menek, gam pabe pablei rilow:

“Brei mbang pandap mbang, hèm bia, hareik brei pabak min. Brei mbang pandap haong hèm bia meng samar tagok kilo, saong tuk ba pabe tame labik sik ngak hu rilo ralow, urang blei di drei hu yaom glong jang. Bruk raong pabe ini dahlak mboh kein laba tani tanat. Drei mboh tui jalan ini yaom pabe biak tani tanat, hu kein jang bruk ngak karei”.

Bruk raong pabe rilow hu peih ngak di huyện Tân Hồng thun 2021, hu 10 baoh sang di 6 xã dalam huyện Tân Hồng tame ngak saong hu daong 400 drei pabe pajaih ka mikva raong ngan haong yaok baoh sang raong meng 10 -100 drei. Tapa labaih 1 thun peih ngak, dom baoh sang hu daong  raong pablei pabe hu meng 3 tal 4 mbang, jien laba meng 1 trieu tal 1,5 trieu dong sa drei. Urak ini, danak dak nan hu taphon pabe abih tih  labaih 750 drei. Tui ong  Nguyễn Trí Tuệ, Akok jabat ilamu Pasak Dịch vụ Ngak nong saong ia hacih palei pala tỉnh Đồng Tháp, bruk raong pabe lac jalan nao birau ka bhap bini, rik tame salih bruk ngak nong tui jalan khang kajap, ba bruk ngak mbang, patagok jien mek tame ka bhap bini bhum taphia negar.

Bruk raong pabe rilow hu Pasak pachreih nong pakat negar di Mentri ngak nong saong Patagok palei pala peih ngak iek di huyện Tân Hồng, tỉnh Đồng Tháp, vaktu 2021-2023, hadei di nan pataom iek veik saong daok peih ngak di dom tỉnh dalam bhum Taneran kraong Cuu Long. Tapa taong yaom tuk camereip, ini lac bruk ngak mbang hu kein laba glong ngan haong bhap bini bhum taphia negar, daong ba bruk ngak mbang, patagok jien mek tame ka bhap bini./.

Urang lang: Ái Nghiêm -11/10