Dom drap ar Wa caik veik ndung bak hatai anit ranam, lac mbaik troy ba jalan, pahadah yaom glaong bangsa saong zaman bahrau. Pahadar 133 thun Harei manek Chủ tịch Hồ Chí Minh (19/5/1890 - 19/5/2023), daa mikva saong taong abih gauk pang kadha vak di Lại Hoa saong dom urang roh duah langyah ka dom Drap ar di Wa:

Anak bruk lahik taneh ia, sang danaok tayah tayac, maong mboh bruk kateik greik trak damak di kol thực dân phong kiến haong kol tangin takai di nyu, bruk rambah rambup di rahra, di urang ngak, urang dam anit ranam taneh ia Nguyễn Tất Thành samar hu hatai caong duah jalan peih paha bangsa saong hu meta maong độc lập, duah jalan ngak bahrau dut saong dom urang nao dahlau. Wa khang hatai tabiak negar langiu blaoh mai veik daong ka bhap bini dalam bruk peih paha, meblah mek độc lập ka bangsa, tự do, haniem phul ka rahra.

PGS. TS Lý Việt Quang, Akaok Viện Hồ Chí Minh saong dom urang pan akaok di Đảng ndom lac:  “Puac luận cương di Lê Nin ye Wa meng mboh ini lac bruk bo Wa daok duah meng lavik mai. Kayua Luận cương tacei tabiak ka Wa lac jalan bo bangsa Việt Nam meda nao lac jalan peih paha bangsa pambuak pagam haong peih paha giai cấp saong peih paha anek manuac, độc lập bangsa saong chủ nghĩa xã hội”.

Thun 1941, hadei di 30 thun tabiak negar langiu duah jalan daong ka taneh ia, Wa Hồ hu mai veik palei negar anit ranam,  pan akaok tacei ba tapak bruk cách mạng, peih ngak bruk sajarah di Đảng drei, meblah mek độc lập ka taneh ia, tự do ka rahra.Tukvak siam lagaih mai tal, Wa ba jalan ngak brei cách mạng bilan 8 hu jak jeng, ngak brei salih karei thar vak urang Việt Nam, bangsa Việt Nam. Wa daok lac angan je brei mboh ka hatai caong saron mbon, ka talei rohim saong pambuak gauk di dom bangsa. PGS. TS Bùi Đình Phong, Học viện Chính trị Quốc gia Hồ Chí Minh langyah lac: “Bruk ngak di Hồ Chí Minh, jalan maong di Hồ Chí Minh, phong cách Hồ Chí Minh, jalan sahneng di Hồ Chí Minh brei mboh lac: Hồ Chí Minh pandar ilamo yau sa janih keo pagam, talei pambuak dom bangsa, palahik dom bruk paatah di gauk. Yaom lac tuk urang France, urang My meblah mek negar drei. Wa jeng ndem lac: “ mesuh metak lac njauk taong, min dahrah halei jeng lac darah, urang halei jeng lac manuac. Wa iek praong suan yava di urang Việt Nam jang yau iek praong suan yava di urang France, urang My”..

Drap ar di Hồ Chí Minh ka padang ngak saong cak rok patagok kinh tế, oh padeih paglaong raidiuk mbang ngui, daok dang ka rahra, dahlau di abih lac rahra urang ngak. Wa jeng caik veik ka rai hadei yaom glaong drap ar ka bruk dak padang Đảng saong hệ thống chính trị piah pandar saong cak rok patagok lagaih haong bruk bangsa saong zaman. Tui GS. TS Mạch Quang Thắng, dalam tukvak yau urak ini njauk pambuak brei kajap jang talei rohim ralow darah di Đảng saong rahra: “Đảng meng rahra bo tabiak. Đảng lac anek di rahra. Đảng brei ngak bruk đạo hiếu ngan haong amaik ame di drei lac rahra. Chủ tịch Hồ Chí Minh ndem cambaih laih jang lac “Đảng lac menuac duh, lac halin halak di rahra. Kadha ini dalam bruk cách mạng urak ini njauk ndem khang piah pambuak kajap talei rohim tui njauk jalan sahneng di Hồ Chí Minh lac talei pambuak ralaow darah di Đảng saong rahra”.

Kol drei roh duah, ngak tui, cak rok patagok drap ar Hồ Chí Minh piah sahaneng mboh ginup jang, dalam jang yaom glaong biak praong drap ar di Wa ngan haong bangsa saong manuac sia, gam haong nan, ngak ka yaom glaong di drap ar Hồ Chí Minh dak harei dak khang kajap, hadah tabiak gam haong bangsa saong manuac sia dunya./.