Rilo mblang taneh hu tuai du lich biak takre 

Saai Đàm Thu Nga, saurang ngak di jabat blei salih resort Cà Ty- Mũi Né brei thau, doanh nghiệp hu peih ngak dalam tukvak siam makre bahrau di puac thun 2021. Dalam dua mbang padeih ye harei Po Hùng saong harei 30/4- 1/5, blik di labik ini tuk halei jeng bak 100% manuac urang mai main. Daok harei bhian bhian tuk halei jeng hu labaih 50- 60% tuai mai, dom harei nacar harei dit tuk halei jeng katian tuai damuai, tuk halei jeng oh daok bilik. Daok bilan hè, resort hu taduan ginup tuai tal puac bilan 7.

Saai Đàm Thu Nga brei thau:

"Piah pachreih bruk ma-in ka urang du lịch, gah kon dahlak hulin jeng hu dom danak bak paok ka tuai damuai ndik daok dua harei sa melam atau klau harei dua melam di resort, tui paok combo. Atau yau ye paok duh ka tuai damuai dalam tỉnh mai ma-in hu paok pachreih dalam harei dan saong hu dom danak dak karei di gauk, tuai damuai meda ieu phone tapak tal resort piah hu langyah cambaih brei ka bruk mai main".

Hadei di jit Covid, dom urang ngak mbnag gah du lịch kham rami ramik ngak pasiam dom janih sang danaok ndap nda cơ sở vật chất kỹ thuật, jeng ye pahaci pahacih labik dhua caga raok taduan tuai damuai. Dom labik ngak du lịch jeng rami ramik dom ndap nda sản phẩm dịch vụ ka siam makre jeng ye padang dom paok brei pachreih urang mai main, halain hatian saong tuai damuai dom nap nda du lịch baharu tui jalan du lịch hijau, siam kajap, chreih chrai, karo jalan caga jit Covid-19.

Amuk Võ Thùy Loan, Phó Yam ndoc Công ty cổ phần Pablei salih  - Du lịch mbuan ceik patau Phú Hài, ban Phan Thiết brei thau, di bilan hè dom ranaih nao padeih padei di ini ralo tagok meng 30 - 40% dut saong dom bilan bhian bhian biasa. Tal tukvak masa ini, di labik padeih padai di công ty mek hu labaih 90% prein pak bilik dalam bilan Hè anak tal saong Cty jeng hu peih ngak rilo bruk ngak ilamo lagaih piah taduan raok tuai damuai mai main.

  "Bruk maiin di langiu mblang hu padang tadai tuan di mblang hareih piah urang main. Trun tasik hu phao brei ka uranaih vah ikan yau ye maiin di bein công viên min biak di nyu hu di ia tasik bingi jang. Papar kalang jeng ieu lac sa janih brei ka uranaih chreih yau tuk di daok sit nagk ka hei hei jeng takre suka. "  

Di bimon Po Sah Inư, rilo bruk ma-in ilamo meda hu peih tabiak piah pachreih tuai damuai mai ma-in saong rivang iek dalam bilan hè ini, yau ye Danak dak ilamo sajarah Cam (ma-in ragu ragam, daoh tamia kayua dom urang Cam daoh, tamia), parang iek ilamo ngak thaot binguk meng cuah, parang iek bruk pato ngak lar am meng kan di urang bangsa Cam...

Saai Lê Văn Tùng, Taong Yam ndoc Công ty cổ phần buh jien tame padang ngak Green Dragon – Po danak dak labik ma-in Suối Tiên brei thau, thau cambaih bruk kuhria caga jalan main di tuai damuai, kapul hu ngak bahrau abih ka labik ma-in di mblang langiu langik, bein bingu, ngak pasiam mblang main piah yaih khan tal labik ma-in Suối Tiên, sa janih ilamo siam gheih di Bình Thuận khin yaih khan tal tuai damuai.

"Harei harei khol dahlak hulin taduan raok labaih 200 urang tuai, hajung adit tuai damuai ralo tagok tal dua mbang, daok di bilan tabung glaong dom tuai meda tagok tal dua mbang dut saong tukvak masa urak ini. Kayua yau nan ye, khol dahlak jeng hu caga dahlau di abih brei ka manuac ngak, masa anak mai tal, khol hulin meda pilih mek manuac urang piah pabak tame dom bruk ngak daok lapih manuac. Khol dahlak ngak pasiam dom labik ma-in yau ye bein bingu jaik tapen kraong ribaong piah ka tuai damuai mek thaot binguk, labik padeih padai saong ngak sang pahaci hacih ka tuai damuai".)

Piah brei siam lagaih ka tuai damuai roh duah thau gah rivang ma-in du lich, tỉnh Bình Thuận hu peih pandar gah rivang ma-in hadah krah di mangaok app phone par tangin ngan haong ginup janih lagaih ka tuai damaui saong dom gah pablei salih ka urang mai rivang ma-in. Patui di nan, tuai damuai meda duah thau dahlau ka gah rivang ma-in, dom labik mai tal, pathau khan dom labik mbang manyum, hotel, kadai mbang huak, dom bruk njauk caik hatai, daong ka gah gilang paraik, y tế, radaih juan pajeng nao mai.

 Taphia di nan, gah rivang ma-in meda pambuak haong dom labik dalam tỉnh peih dom bruk di ngak ilamo, pahat thể thao jeng dom bruk pachreih hu rilo tuai damuai mai rivang ma-in. Bình Thuận hu pambuak gauk cak rok patagok bruk ma-in di klau labik klau kieng du lịch ban raya HCM- Lâm Đồng- Bình Thuận, pambuak gauk cak rok patagok bruk rivang ma-in gam haong dom tỉnh Ninh Thuận, Đồng Nai, Bình Dương piah pambuak gauk yaih khan, padang ngak dom bruk ma-in, tour dhan, danak dak rivang ma-in pambuak talei tui tỉnh, tui bhum palei. 

Ong Nguyễn Linh Vũ – Phó Yam ndoc Pasak khau tin pachreih bruk rivang ma-in tỉnh Bình Thuận daok brei thau veik:

"Khol dahlak iek praong tal dom bruk rivang ma-in bahrau, dom bruk rivang main siam lagaih, njauk pak ini hu min, jak ba dom urang ngak mbang pablei salih gah rivang ma-in peih ngak dom danak dak, dom paok pachreih bruk khuyến mãi dalam bruk rivang a-in, trun yaom biak bier piah pachreih tuai dalam bilan hè. Gam tui di nan, khol dahlak hulin jeng hu jhul khang bruk salih số piah ka tuai damuai pabuak jaik haong khau tin di bruk rivang ma-in biak samar jang, siam lagaih".

Tui Cục Yaok pataom Bình Thuận, dalam bilan 4, tuai damuai mai rivang ma-in saong padeih padai di tỉnh hu 413.000 mbang tuai damuai tui kuhria yaok pataom dalam 4 bilan akaok thun 2022, Bình Thuận taduan raok saong 1,38 triệu mbang tuai damuai mai rivang ma-in. Jien mek tame meng bruk ma-in dalam bilan 4 hu 744 tỷ đồng (tagok 14,89% dut saong bilan dahlau), yaok pataom di 4 bilan akaok thun mek hu 2.704 tỷ đồng.

Tui jalan brei ka tuai damuai bui sambai hatai mai main di bilan hè thun 2022, dom dom labik dalam tinh daok samar drah peih ngak dom bruk ma-in piah pachreih tuai damuai mai rivang iek, dalam nan hu bruk brei pacang caga bala blung ia.

 Header di 2 thun yau ye daok ndih kandang kayua jit praong Covid-19, bilan hè thun ini, gah rivang ma-in di Bình Thuận caong cang mboh yau ye patuh ralo tuai damuai mai main./.

Urang lang: Phú Văn Hẳn- 12/6