Kadha vak di Hồng Hiếu di mangaok báo điện tử Thông tấn xã VN ka “Du lịch Bình Thuận – labik hadah dui pachreih tuai di bhum Nam Trung Bộ”

Bình Thuận laik tame top 9 labik dang akaok dalam taneh ia hu jien mek tame meng du lịch 6 bilan akaok thun 2023 labaih 10.000 tỷ đồng tagok. Kadha ini brei mboh lac, du lịch di Bình Thuận daok siam gilac veik khang kadang, ngak jeng prein jhul patagok ka bhum ravang me-in tapen tasik Nam Trung Bộ saong ravang me-in Việt Nam.

Di dom bhum ravang me-in rilo dalam ban Phan Thiết yau Hàm Tiến, Mũi Né, Hòn Rơm, Tiến Thành, Đồi Dương… bruk ravang me-in biak chreih chrai. Taphia nan, jalan ravang iek pulao Phú Quý, Labik inem mek căn cứ Tỉnh ủy dalam saman mesruh taong Mỹ, dom tour camping (cắm trại)… dui pachreih hu rilo tuai.

Labik duh ka patagok du lịch di Bình Thuận hu salih bahrau mboh di anak meta. Rilo danak dak hu ngak pasiam, jalan nao mai mbuan lagaih, siam mekre, salamat, dui katut panak tukvak nao mai. Kadha ini ngak brei tuai nao tui sang, kapul tuai dom urang nao ravang me-in meng radaih sang pilih ruah Bình Thuận piah nao tal.

Tui Cục Thống kê Bình Thuận, bilan 6/2023, yam tame bilan Hè – lac bilan tabung glaong ravang me-in dalam taneh ia, Bình Thuận biak njauk ndom tal tuk taduan raok jaik 830.000 mbang tuai dalam sa bilan. Kuhria pataom veik dalam 6 bilan tapa, dalam tỉnh taduan raok 4 triệu 460 rabau mbang tuai, rilo jang 86% duk haong dom bilan ini thun 2022.

Ong Nguyễn Văn Khoa, akaok Hiệp hội Du lịch tỉnh brei thau, du lịch Bình Thuận daok hu bruk bui sambai karei tuk urang ngak du lịch daok mai ngak gilac veik saong dak harei dak tani tanat hadei di sa tukvak atah kayua COVID-19. Dom labik padeih padei hu pasiam veik, gam haong nan, hu paglaong chất lượng bruk duh tuai, patagok pandap ravang me-in bahrau saong sangka pato pakai paglaong ilamu menuac ngak pak di labik.

Bình Thuận daok hu prein dui pachreih praong ngan haong tuai dalam taneh ia meng hu dom kein, lagaih. Min bruk cakrok di dom labik nao tal bahrau, meng dom labik jaik taphia haong bruk buh jien tame ngak khang hu klah rabha biak praong dom tuai di tỉnh. Ini lac cuang kandah praong ka Bình Thuận dalam bruk dui takai dom darak pasar tuai klak saong dui pachreih tuai bahrau. Taphia nan, dom bruk gah hacih sa-at alam môi trường, bruk nerak tachauk, ia nerak di dom labik ravang me-in, takai tasik saong dom labik daok di bhap bini, dom labik me-in di rahra… jeng lac dom bruk bo gah du lịch tỉnh daok dang anak.

 Bahrau ini, di mbang nyaom mBan tacei jalan patagok Du lịch Bình Thuận, Phaok akaok UB bhap bini tỉnh Nguyễn Minh hu panuac ieu Sở Ilamu, Thể thao saong Du lịch jhul khang bruk yaih khan du lịch meng rilo jalan ngak piah patagok darak pasar tuai bahrau; gam haong nan, pachreih ba, paglaong chất lượng duh ka tuai damuai di dom darak pasar bak prein khang nan, ngak jeng jalan cakrok ka dom darak pasar piah patagok dom tuai dunya mai tỉnh. Sở sangka dak padang thaot binguk labik nao tal "Salamat – siam mekre – chreih chrai - chất lượng", khik kajap angan du lịch Bình Thuận.

Tui phaok akaok UB bhap bini tỉnh Bình Thuận, dom sở, mban, ngành njauk patui jalan palagaih ka bruk dui pachreih saong peih ngak dom danak dak du lịch; ieu dom urang buh jien tame ngak mbang suai lavik, hu prein khang kinh tế piah khik bruk ba jalan, patagok pandap panda bahrau, darak pasar du lịch, abih di nyu lac dom pandap du lịch pakat glaong. Gam haong nan, dom gah patagok pasang iek, peih ngak hu kein laba dom quy hoạch, danak dak, sarak hu pambuak tal di gah du lịch; dalam nan hu dom danak dak padang ngak hạ tầng duh ka du lịch.

 Thun ini, tỉnh Bình Thuận ba tabiak bruk lac dui pachreih 6,7 triệu mbang tuai, dalam nan hu labaih 220.000 mbang tuai dunya. Abih tih jien mek tame meng bruk du lịch lac 15.900 tỷ đồng.

 Meng bruk dang tabiak peih Thun Du lịch pakat negar 2023 "Bình Thuận – Pataom veik hijao" gam haong dom kham merat dui pachreih tuai, caong lac du lịch Bình Thuận meda khik kajap bruk cakrok patagok, ngak hu jak jeng bruk caong cakrok du lịch hijao, khang kajap, ba du lịch jeng bruk ngak mbang praong, dang akaok./.