Tuai damuai duah thau dom jalan main pak di Ninh Thuan 

Labik inem krung pakat negar  bimon Po Klong Garai (di phường Đô Vinh, ban Phan Rang-Tháp Chàm) ieu lac sa di dalam dom labik rivang iek hu angan praong di Ninh Thuận.

Ong Đổng Văn Nhường, Phó akaok Mbang khik ramik inem krung di bimon brei thau, thun ini tui kuria dom tuai nao rivang ma-in dalam bilan hè meda tagok biak rilo, kayua yau nan ye kapul hu dak jalan caga raok tuai, samar drah ngak pasiam dom danak dak karei karei, ngak pasiam veik mblang, labik pala phun ka hijao, jalan tagok trun bimon, pato tacei khau tin ka cambac. Gam tui di nan jeng pasang iek, rami ramik dom pandap di bilik parang iek ilamo Cam, rami ramik labik parang iek pandap panda inum krung ka nyu lagaih.

Piah pahadah ka tour mai rivang iek labik inem krung, thun ini, kapul hu daa dom urang palei Hamu Craok, urang di palei Cak Klaeng jhik manyim khan bai tal Bimon Po Klong Garai parang main ilamo ngak gaok glah lar am, jhik manyim khan bai yaih khan ka tuai damuai maong iek jeng ye ngak main.

Dom harei sanecar, harei adit, dom harei rija riya di labik bimon hu peih bruk daoh tamia bangsa Cam brei yaih khan tal tuai damuai ragam ragu urang Cham. Mai tal bimon, tuai damuai meda hu pah khan aw di urang Cam cuk piah mek thaot binguk caik krung caik piah ieik; hu urang ba jalan yaih khan oh mek jien meng sap Yuan – sap Engrih yaih khan ilamo siam gheih di urang bangsa Cam.

Piah pachreih tuai dalam nagar saong tuai damuai di langiu nagar mai dalam bilan hè ini, rilo labik rivang ma-in, hotel di Ninh Thuận hu peih dom danak dak raok taduan tuai damuai.

Saai Nguyễn Thái Lai, po danak dak rivang main rahra di Palei bích họa Hòn Thiên (xã Tân Hải, huyện Ninh Hải) brei thau, thau cambaih bruk kuhria hatai pachreih takre ba drei tame bruk ma-in di tuai damuai, saai hu peih dak ngak bahrau veik danieng sang klak, sang bhap bini dalam palei Hòn Thiên meng 40 blah thaot cih di danieng sang, thaot binguk 3D ghieh makre yaih thau tal thaot binguk, langik tasik di bhum palei tasik, dom siam gheih ilamo di Ninh Thuận hu yaih khan tal thaot binguk tal tuai damuai.

Piah paglaong paglaong dịch vụ, dom baoh sang ngak bruk rivang ma-in dalam palei hu pasiam veik cơ sở vật chất, ngak pasiam veik thaot binguk, bilik, sang danaok, peih labik ilamo, bruk mbang huak dalam puk palei, pabak hu hatai caong padeih padai di tuai damuai.

Gilac tame palei bích họa Hòn Thiên, langiu di bruk rivang iek, mek thaot binguk, tuai damuai daok hu rilo bruk piah ma-in biak chreih chrai, yau ye main ndik ceik maong iek ia harei tagok tuk masup aval page saong mek thaot binguk ilamo tuk ia harei tame trun, vah dai gilai nao vak ikan, mek hadang di Đầm Nại, mbang dom angan pandap mbang biak bingi hu ngak meng kaya tasik hu bhap bini bhum tasik cap mek dalam harei, gam haong ba drei tame bruk ma-in ilamo biak gheih makre di mikva bhum urang ngak mbang tui tasik.

Tui Phó akaok Uy mban Bhap bini tỉnh Ninh Thuận, ong Nguyễn Long Biên brei thau, piah taduan raok raok hu biak rilo tuai damuai dalam tukvak tabung glaong raok tuai damuai mai rivang ma-in dalam bilan hè, Uy ban Bhap bini tỉnh hu ba tabiak jalan peih ngak dom bruk langyah piah pachreih ba, raok tuai damuai mai rivang ma-in.

 Tinh hu ieu kakei dom se, dom gah, dom labik peih ngak dom jalan ngak cambaih laih, njauk caik hatai tal yaok bruk, meng bruk sit di abih nan lac piah pachreih saong raok tuai damuai biak siam makre, salamat, paglaong siam lagaih peih ngak dom labik rivang iek hu blaoh. Gam tui di nan, padang ngak dom bruk rivang ma-in meng dom bruk ilamo-thể thao, ba mai sa labik ma-in sambai saong khik takai tuai damuai daok veik di tỉnh biak suai jang.

Dom doanh nghiệp urang ngak mbang gah rivang ma-in hu peih dom jalan ngak pasiam, paglaong dom cơ sở vật chất kỹ thuật, pandap panda, ngak haci hacih alam, khik tani tanat tanut njauk piah taduan raok tuai mai rivang ma-in; pachreih uarng ngak mbang paglaong ilamu pandap panda gah du lich hu blaoh saong peih dom paok pachreih bruk rivang ma-in ngan haong dom janih pachreih, ngak njauk ngak siam tui sanya, dom bruk rivang ma-in bahrau tui jalan pandap panda, dịch vụ ma-in hijao, salamat, pachreih hu rilo urang takre gam pabak hu hatai caong, ghieh mata di tuai damuai, gam khik tani tanat salamat dalam bruk pacang caga jit ruak COVID-19.

Dom kapul, dom labik daok pataom tame ngak blaoh salah, paglaong pasiam dom labik urang mai tal, dom bruk ngak brei ka urang mai rivang ma-in piah peih pabah pambang raok tuai damuai, peih dom tour rivang ma-in katut harei taduan duh ka nyaom sit, gauk gar dalam sang dalam tukvak tabung glaong ngan haong dom danak dak, dom bruk rivang ma-in salamat gam haong dom paok pachreih; abih di nyu nan lac pataom tame dom bruk rivang ma-in di tasik, padeih padai, rivang ma-in thể thao pahat rup ma-in di tasik, rivang ma-in gah sinh thái langik tasik, rivang ma-in ilamo ngan haong dom bruk roh duah ilamo urang bangsa Cam, bangsa Raglai, rivang ma-in gah ngak nong, rivang iek bein danui nho, baoh madar, mblang rilo pabo, sara, main saong mbuan cuah tapen tasik.

Dom kalup kapul gah rivang ma-in, doanh nghiệp urang ngak mbang pablei salih gah rivang ma-in hu peih ngak saong pathau khan dom bruk ma-in, dom paok pachreih bruk rivang ma-in lagaih haong hatai caong takre di tuai damuai pambuak pagam dom pachreih saong sanya veik tui bruk ngak njauk ngak siam; pambuak haong dom tinh, ban dalam taneh ia piah peih dom bruk pachreih hu tuai rivang ma-in mai Ninh Thuận.

Gah rivang ma-in tỉnh Ninh Thuận jeng hu peih dom asal kadha dalam bruk njauk gauk pambuak cak rok patagok bruk rivang ma-in hu mbaoh tangin di dom tinh, ban jaik taphia, yau ye tinh Lâm Đồng- tinh Bình Thuận- tinh Khánh Hòa, ban raya Hồ Chí Minh, ban Hà Nội, gah dom tinh Tây Nguyên, hong dom tinh di Đông Nam bộ...

Gam tui di nan jeng pambuak haong dom gah kapar haok, dom công ty lữ hành dunya peih dom bruk ngak pambuak gauk saong peih dom danak dak rivang ma-in taong abih bak paok, salamat siam makre tal bhum palei.

        Piah brei siam lagaih ka tuai damuai mbuan duah thau darak pasar du lịch, tỉnh paglaong bruk yaih khan tal dom labik mai rivang ma-in di Ninh Thuận karo, pachreih hu rilo manuac urang saong biak lagaih; jhul khang bruk peih ngak dom janih brei ka urang rivang ma-in hadah krah di mangaok app phone par tangin ngan haong ginup siam lagaih ka tuai damuai saong dom kapul ngak gah rivang ma-in; tuai damuai meda hu iek meng dom video ndem ka rivang ma-in, dom labik tal, yaih khan tal dom labik mbang mayum, labik ndih daok hotel, dom bruk siam lagaih, gilang paraik, y tế, radaih nao mai saong rilo bruk karei karei di dalam tỉnh Ninh Thuận./. 

Urang lang: Phú Văn Hẳn -12/6