Tuai dunya mai tal Việt Nam jeng daok biak takik, bahrau hu 733.000 mbang

Yaom lac du lịch dalam taneh ia daok tagok khang min ini lac bruk katut panak hadei di tukvak rahra takik hu nao ravang main dalam 2 thun njauk jit praong. Langiu di nan, rilo kapul hadei di tuk duh ka darak pasa dalam taneh ia jeng hu hatai sahneng oh ka glaong, oh ka kham marat piah hu dom pandap du lịch siam lagaih, dom bruk ngak mbang kateik greik oh siam rah tabiak di rilo  labik. Mayah daok ngak yau nan, pabak pandap oh hu chất lượng ye bruk siam veik di darak pasa du lịch dalam taneh ia biak kan hu khang kajap. Ong Nguyễn Văn Hùng – Akaok Mintri ilamo - Thể thao saong Du lịch ndem lac:“Taong abih dom doanh nghiệp dalam gah du lịch brei hu saneng duah jalan ngak bahrau. Ngak mbang brei hu jalan ngak njauk, catang, lagaih, bruk cung saong cầu brei samu gauk, oh ngak tui jalan ngak meng ngak, oh kuhria tal suai lavik, oh khang kajap”.

  Piah jhul patagok bruk dui pachreih tuai dunya, rilo doanh nghiệp saong kapul gah du lịch hu likau Rajaei saong dom mintri, dom gah pambuak tal njauk patagok mayaih khan du lịch Việt Nam tabiak dunya; samar langyah dom bruk oh lagaih gah visa, passport piah ka tuai dalam taneh ia mbuan tabiak negar langiu saong tuai negar langiu jeng mbuan tame Việt Nam jang. Dom khau tin ka bruk peih pabah mbang du lịch njauk hu dom jabat ngoại giao Việt Nam di negar langiu khan brei thau rilo jang kayua mboh lac, rilo tuai, doanh nghiệp di dom taneh ia jeng ka oh thau cambaih saong gam gam ieu phone mai ka dom công ty lữ hành dalam taneh ia puah sua tangi ka dom sarak ini.

  Ong Võ Anh Tài - Phó Tong Yam ndok Saigontourist Group mboh lac sa dalam dom jalan ngak praong piah dui pachreih rilo tuai dunya mai tal Việt Nam lac njauk pataom tame bruk du lịch MICE (nan lac du lịch pambuak haong ginum biai, nyaom biai): “Darak pasa MICE, du lịch pakat glaong lac hu makna biak praong. Khol dahlak jeng likau urang dang akaok UBND TP.HCM saong dom tinh, ban njauk caik hatai iek praong saong hu jalan ngak habar piah dui pachreih hu dom danak dak, ginum biai, nyaom biai… dom danak dak oh lac ta-eng ka gah du lịch bo daok lac bruk ngoại giao, ilamo, thể thao,... piah hu dom bruk praong, jhul patagok darak pasa MICE”)

   Sa bruk karei hu amuk Cao Thị Tuyết Lan – Yam ndok kinh doanh Cty Viettours ba tabiak di mbang ndom biai lac Rajaei brei hu dom sarak daong gah jien padai piah ka gah doanh nghiệp du lịch hu jien ngak veik dalam tuk kinh tế biak kan kandah hadei di tuk njauk jit praong.

  Jeng dalam mbang ndom biai, bruk kurang menuac ngak du lịch hadei di jit ruak COVID-19 daok jeng bruk biak pandiak saong hu ba tabiak ginum biai dalam 1 nyaom biai karei. Kayua bruk salih bruk ngak di dom kapul hướng dẫn viên, urang ngak di nhà hàng, khách sạn hadei di jit ruak nan ye urak ini jaik abih dom doanh nghiệp du lịch, dom labik nao tal, labik ndih daok dalam taneh ia daok kurang manuac ngak, abih di nyu nan lac urang ngak hu ilamo. Bruk ini ba tal chất lượng dịch vụ trun jang atau oh pabak hu abih hatai caong di tuai damuai. Ong Nguyễn Văn Khoa – Akaok Hiệp hội Du lịch tỉnh Bình Thuận ndem lac:“Ini lac bruk kan kandah haong gauk, meda lac labik halei jeng gaok kan kandah ka menuac ngak pabak ka du lịch saong khol dahlak daok pataom tame bruk pato, pasram gah ini”.

 Mboh lac du lịch Việt Nam peih pabah mbang min jeng daok hu biak rilo labik tavak tavaiy. Tui kuhria mboh dahlau, meng dom srau kadau gah chính trị,

lạm phát kinh tế saong bruk jit ruak daok rahtabiak di dunya, ye bruk dui pachreih tuai dunya mai gilac veik Việt Nam meda daok hu rilo kan kandah. Caong khin du lịch hu siam veik biak biai, brei samar lang talaih dom tavak tavaiy saong brei hu sa jalan ngak praong siam lagaih, atah dhua./.

Urang lang: Thu Thao – 16/09