Tal maong 7 melam, dom "anek saih biak karei" hu ginup umo thun dalam xã Long Tân, huyện Phú Riềng, tỉnh Bình Phước pajeng gauk tal sang ilamo palei 6 piah bac akhar haroh. Dalam labaih 40 anek saih di tal bac, hu urang umo taha nan ye bruk bac ta-a lac oh mbuan, min yam tapa kan kandah, dom urang ini jeng kham merat yaok adit 3 harei nao tal sang bac piah duah "baoh akhar".

Dom anek saih khan brei thau, akaok mereip tuk nao bac, rilo urang klao lac, taha jaik metai bo daok nao bac akhar huroh ngak hagait. Mehit yau nan, urang jeng mboh duh hatai min hadei di nan hu bruk pahreih ba di urang jakar xã, di anai gru nan ye urang ba gauk nao tame tal bac. Ong Văn Đấu, umo 52 thun, urang bangsa S.Tiêng daok di xã Long Tân khan lac: “Nao ngak mai glaih glar, umo taha prong thun bac ta-a jeng suai damuai min jeng kham merat nao tui. Page mesup tagok ye  hadar veik melam blaoh anai gru tacei pato hagait, ye gam ngak gam saneng dalam akaok piah kanar”.

Tal bac palahik bruk oh thau akhar haroh di Sang ilamo palei 6 daok hu rilo anek saih dalam umo nao bac min kayua sang kan kandah nan ye njauk klaak puk palei tui amaik ame tame daok di Long Tân nan ye oh ka hu nao bac. Jeng hu rilo adei daok dalam palei min kayua sang biak kan kandah nan ye daok di sang piah daong amaik ame khik iek adei, nao ngak pah piah duah jien, nan ye baoh akhar haroh ngan haong dom adei lac biak atah dua. Yau nan min, hatai caong khin hu thau baoh akhar huroh daok ba dom adei mai tal tal bac ini.

Anai gru Đào Thị Yên khan lac, ngan haong dom "anek saih biak karei ini" brei hu jalan pato biak karei piah ka taong abih samar thau hu baoh akhar haroh. Piah pachreih mikva mai bac, dalam tuk pato brei ngak habar ka tal bac nyu bui sambai, thei jeng chreih takre. Gam bac gam ma-in nan ye tok hadei di 2 bilan, mikva thei jeng thau akhar huroh. Anai gru Đào Thị Yên brei thau: “Dalam tuk pato dahlak mboh mikva bac biak siam. Hu urang tapoh hu ine akhar, jeng hu urang oh ka thau tapoh akhar. Daok cih vak, ye mboh rilo mikva prong thun nan ye oh ka vak njauk ô ly, độ glaong, độ prong  nan ye khaol dahlak kham mekrat tacei pato”

Di xã Long Tân, urang bangsa takik oh thau akhar huroh daok biak rilo. Jeng hu urang hu nao bac blaoh min jeng oh thau akhar kayua klaak biak lavik oh daok kanal akhar . Tapa tukvak pasang iek veik, urang jakar xã hu nao tal yaok baoh sang piah duah thau ka hatai caong khin, jak ba mikva tame veik tal bac piah thau akhar huroh. 

 Ong Đỗ Nhật Quang, Phaok Akaok UBND xã Long Tân, huyện Phú Riềng brei thau, hadei di tal bac palei 6, xã mong iek veik piah peih dom tal karei ngan haong jalan ngak paglaong akaok saneng, paglaong chất lượng rai diuk, jeng yau hatai saneng di mikva labik ini: “Jalan ngak di tal bac nan lac piah ka taong abih bhap bani oh ka thau akhar jeng hu thau akhar huroh. Dalam tukvak bac, khaol dahlak taong yaom dom anek saih, jeng yau dom anai gru cei gru biak abih hatai haong bruk ngak di drei. Jak jeng tuk akaok mereip mek khaol dahlak mboh biak gheih."

Bình Phước hu 41 bangsa, labaih 203.500 urang (meblah jaik 20% bhap bani dalam tỉnh). Tukvak tapa, jeng daok hu dom baoh sang oh ka biak biai sangka tal bruk bac ta-a di anek kamuan nan ye bruk oh thau akhar huroh daok biak rilo. Yaom lac biak kham merat nao jak ba, peih dom tal bac oh abih jien min tal harei ini Bình Phước jeng oh ka hu mek chuẩn palahik bruk oh thau akhar huroh pakat 2.

Tui Mban Bangsa tỉnh Bình Phước, tukvak anak tal meda patui bruk pasang iek, pachreih ba mikva nao bac. Bruk peih tal bac palahik bruk oh thau akhar huroh, langiu di pato pasram ilamu puac, vak akhar Yuan, daok hu pabak dom ilamu gah tự nhiên, xã hội. Tal bac daok hu daong ka dom urang bac khang hatai jia tame rup drei, pandar siam dom ilamu bac megru hu meng tal bac palahik bruk oh thau akhar huroh, gam haong nan, paglaong rai diuk ilamo, cak rok patagok kinh tế - xã hội puk palei./.