Tok peih van, ia hu patui jalan nding bruh tame bak abih bein phun pala. Mikva ngak nong pak ni mayai lac oh ka hu tuk lei bruk ngak nong pak palei Nha Húi, xã Mỹ Sơn, huyện Ninh Sơn  hu mbuan lagaih yau urak ini. Hu ia pruh tani tanat, 25 baoh snag  di palei Nha Húi, xã Mỹ Sơn, huyện Ninh Sơn hu Kapul Urang ngak nong tỉnh daong sa baoh sang 40 triệu ndong meng phun jien danak dak pakat nagar patrun kathaot khang kajap thun 2021 - 2025 piah pala phun madar. Sa-ai Lê Thanh Bình, palei Nha Húi, xã Mỹ Sơn, huyện Ninh Sơn khan lac:

“Dahlak mboh bruk ngak biak gheih. Sang dahlak paik hu 2 mbang akaok mati, abih tih meik jien tame labaih 4 tấn. Mayah paih abih bein nan ngaok 10 tấn. Kayua nding ia Tân Mỹ ba mai mikva jang gheih tui ia”.

Daok muk Thái Thị Ngọc Bích, Akaok Kapul Urang ngak nong xã Mỹ Sơn bui sambai tuk mboh mikva ngak nong dalam xã drei mek hu jien tame biak glaong di bruk pala madar.

“Mikva jang taduan hu bruk pala phun madar sa baoh sang hu 2 sào taneh, kuhria abih tih 25 baoh sang hu 5 hecta. Tapa nan, daong mikva palei Nha Húi abih kathaot khang kajap. Mikva pala hu labaih 1 thun. Baoh madar mikva paik hu 2 tấn sa sào. Sa thun yau nan paik hu meng  6-7 tấn”.

Hu pabak piah pandar, pak bhum ngak hamu Chà Vum, palei Cang Lương Tri, xã Nhơn Sơn, huyện Ninh Sơn, mbang akaok mati 13 baoh sang mikva bangsa Cam hu buh jien tame ngak padai tui jalan hữu cơ ngaok hamu praong 14ha. Ong Đạo Văn Trí, palei Cang Lương Tri, xã Nhơn Sơn, huyện Ninh Sơn brei thau:

“Pachreih ngak nong pasrem ka mikva tui jalan ngak hữu cơ. Hadei ni pablei tabiak birak pasar nan Đài Thơm 8 ni hu yaom glaong jang pak lingiu. Mikva mek jien tame glaong saong peih ngak praong tabiak”.

Ong Nguyễn Đức Thuận, Yam ndok Pusak pachreih ngak nong tỉnh Ninh Thuận brei thau, dom bhum palei daok ngak bruk haong Kapul ngak nong tỉnh padang ngak Danak dak Daong pala drak pambuak tui talei makna baoh danui nyo, baoh madar, tangei blaoh blei veik di mikva.

“Mikva kham salih pala kruac bung, madar, danui, tamun lưới hu makna laba ralo mbang dut haong ngak hamu padai saong dom phun pala katut harei pakan/ karei. Ba mai yaom kinh tế hu yau nan jien mek tame ka mikva glaong jang, patagok jien mek tame ka rahra dom bhum ni. Mbluak jang, tuk hu ia nan karja dom huyện jang brei salih saong padang ngak jeng dom bhum pala hu pandar kong nghe glaong. Anak tal, bhum ni taduan hu ralo makna yaom glaong dut haong tukvak dahlau”.

Danak banek ia Tân Mỹ pabak ginup ia pandar ka labaih 7.500 ha tanek pala drak. Kayua hu ia pandar saong taduan hu jalan ky thuat ngak, dom bein madar pak Mỹ Sơn paik hu yaom 50 tấn sa ha sa thun. Hu yau nan, urakni ta-eng 2 xã Nhơn Sơn saong Mỹ Sơn, huyện Ninh Sơn, mikva mek jien tame kuhria rah tapa labaih 62 trieu ndong/sa urang/sa thun.