Dom thun ini mai, phun kruac aik hu jeng janih phun hu pala rilo di Long An, ba mai kein laba kinh te ka urang nong, HTX, doanh nghiệp. Tukvak tabung glaong, hu jaik 70% baoh kruac aik that di Long An hu pablei nao dom taneh ia Trung Đông saong dom taneh ia karei.

Daok tukvak oh lac tabung glaong, meng bilan 5 tal bilan 9 yaok thun, kayua gam tame tukvak paik baoh kruac aik di rilo taneh ia, nan ye tok hu labaih 30% baoh kruac aik di Long An hu pablei tabiak negar langiu. Rilo kruac aik daok gilac, urang pala njauk duah jalan pablei dalam taneh ia haong yaom biak lap piah mek veik phun jien.

Ong Trần Duy Thuận, Yam ndok HTX dịch vụ ngak nong Bến Lức brei thau, tukvak oh lac tabung glaong, baoh kruac aik that yaom meng 20 tal 27.000 đồng/kg. Kayua baoh kruac aik biak rilo nan ye hu tuk urang pala njauk pablei yaom lap jang, hu tuk pablei khat. Kayua yau nan ye, piah pablei abih dom baoh kruac aik biak rilo yau urak ini, anak tal HTX ini meda padang sang mac chế biến, cak rok patagok dom pandap meng phun kruac aik. Ong Thuận ndem lac: “Tuk camereip HTX bahrau padang hu dom thun nan ye prein khang saong phun jien daok gaok kan kandah. Min jalan ngak ye kol dahlak hulin hu maong mboh saong daok kham marat dalam tukvak anak tal njauk peih ngak ka pahu dom jalan ngak ini ye jien mek tame di urang nong di kol drei meda tani tanat jang. Dalam tukvak katut panak yaom trun bier yau urak ini”.

Meng hatai caong paglaong yaom kaya nong Việt, tuk camriep dom doanh nghiep di Long An hu salih jalan meng cak rok patagok bhum pala, pablei tabiak negar langiu baoh kruac aik that tapa buh jien tame ilamu chế biến dalam. Dom pandap ini hu rik tame paglaong yaom di phun kruac aik, pandar siam di abih dom pandap labaih meng baoh kruac aik piah ngak tabiak dom pandap karei di palei.

Tui ong Nguyễn Văn Hiển, CEO, akaok HĐQT Công ty Kruac aik Việt, Long An, pandap ngak meng kruac aik dak harei dak hu rilo janih saong hu darak pasa biak takre, yau ye: tapung kruac aik, ia kruac aik, dom janih tea, ia sốt saong ia tut meng kruac aik… Mayah doanh nghiệp hu bruk buh jien tame saong hu jalan ngak suai lavik ye meda hu jalan ngak suai lavik ye meda langyah hu biah rilo bruk ka jalan pablei tabiak ka phun kruac aik: “Drei langyah hu bruk chế biến dalam ye drei meng langyah hu dom số lượng praong. Meyah tok pablei kruac aik that ye doanh nghiep maraik gauk blaoh matai min. Pablei kruac aik that te hu darak pasa Trung Đông, tỉnh hu HTX Bến Lức bahrau mbaoh tangin pambuak bruk pablei tapa châu Âu”.

Dalam tỉnh Long An urak ini hu labaih 11.720 ha kruac aik, dalam nan mblang taneh daok brei baoh lac labaih 10.000ha, hu labaih 97.700 tấn sa thun. Urak ini kruac aik that saong dom pandap ngak meng kruac aik meblah labaih 85% kruac aik dalam taneh ia. Jaik abih mblang taneh pala kruac aik hu doanh nghiep daong urang pala ngak njauk tui ilamu kỹ thuật, njauk tui tanut pablei tapa dom darak pasa Trung Đông, EU, Mỹ, Nhật Bản saong dom taneh ia jaik taphia.

Urak ini Sở Công thương tỉnh Long An, daok kham merat cak rok patagok darak pasa kruac aik that, pachreih doanh nghiep chế biến kruac aik saong rilo janih pandap karei, ngak jeng yaom glaong karei ka kaya nong di tỉnh pablei tabiak negar langiu. Amuk Châu Thị Lệ, Phó Yam ndok Sở Công thương tỉnh Long An daok brei thau lac: “Baoh kruac aik di Việt Nam hu tame darak pasa di Dubai saong daok hu rilo doanh nghiep pambuak pagam piah daong  meng darak pasa di gah deih. Urak ini jeng hu dom doanh nghiep di Long An jeng hu jabat ngak bruk, urang lambaok di Trung Đông. Urang hu menuac daok di gah Dubai  piah ngak jeng labik taom gaok, pablei salih. Long An jeng patagok jalan ngak ini, langiu di baoh kruac aik piah ba rilo janih kaya nong karei tapa Dubai”.

Dom thun jaik di ini, yaom kruac aik hu tani tanat, hu prein pablei siam tapa negar langiu saong langik tasik lagaih nan ye mblang taneh pala kruac aik di Long An tagok samar. Min, bruk ngak jeng daok sit sot, eng drei ngak, ka oh pambuak gauk dalam bruk ngak saong pablei. Piah ka phun kruac aik cak rok patagok khang kajap, gah chức năng saong kanja palei njauk hu sarak pachreih bruk pambuak gauk, daong phun jien ka dom doanh nghiệp, HTX hu jalan chế biến dalam./.