Labik hu tasik, hu mbuan cuah saong hu gam riyak paoh tame gah jalan di tuai damuai

Tui sarak brei buh jien tame ngak di UBND tỉnh, danak dak jalan tapen tasik gah Hòa Thắng - Hòa Phú (tukvak buh jien tame ngak meng thun 2014 - 2016), hu taong abih yaom jien buh tame labaih kurang 1.000 tỷ đồng. Labik akaok di canah klau Hồng Thắng (xã Hòa Thắng, huyện Bắc Bình) saong labik puac hujung lac labik mố B tatua kraong Sông Lũy (xã Hòa Phú, huyện Tuy Phong). Jalan praong meng 45,5 – 50 m, dalam nan mbaok jalan praong 24 m (dalam nan hu 2 mbaok jalan praong 12 m/ sa jalan làn, di kreih lac ieu jalan neh dua laneng). Jalan atah labaih 23 km nao tapa dom mbuan cuah praong, sit, glaong bien. Dom mbuan cuah nan jeng labik main, labik brei iek, paso cuah di rilo tuai damuai saong dam dara pak ini. Tukvak masa jaik di ini, bruk rah tabiak rilo mbaik cadik hangin praong, jalan ini dak harei dak gheih mata saong praong jang. Jalan tapen tasik Hòa Thắng - Hòa Phú langiu di bruk pabak ka bruk ikonomi – rahra kinh tế - xã hội, jhul patagok bruk cak rok bruk jirah rivang du lịch tasik, bo daok lac kein lagaih piah pabak, khik khang kajap karo bhum palei di Bắc Bình, Tuy Phong. Langiu di nan, jalan mbak di tapen tasik daok lagaih piah plaih nyaik di jalan nagar 1A mayah hu katian jalan mbak meng gah Phan Thiết tal Tuy Phong. 

Rilo kapul tuai damuai mai meng Ban raya Hồ Chí Minh, Bình Dương hadei di sa mbang ba rup drei tame main, mek thaot mek binguk jeng hu panuac khan lac: “Gah jalan tapen tasik Hòa Thắng – Hòa Phú yaom lac oh atah min ginup piah daong ka tuai damui tame sa labik biak gheih makre siam. Sa labik bhian saneng lac hu dalam dom phim binguk. Labik hu tasik, hu mbuan cuah, hu kadik hangin praong saong hu gam riyak paoh tame gah jalan di tuai damuai”.

Ngan haong danak dak jalan mbak pakat II ini, dom huyện gah barak di tỉnh daok hu kein lagaih pachreih hu bruk buh jien tame, peih ngak khang kein lagaih piah jhul samar ikonomi – ahra kinh tế – xã hội cak rok patagok. Oh lac dom bruk ngak nong hu mbang tui laba meng danak dak bo labik gah tapen tasik Hòa Thắng – Hòa Phú jeng hu kein lagaih piah salih bruk ngak mbang, bo dahlau di abih lac pataom tame bruk ngak kong ngak kaya ikan tasik. Abih di nyu nan lac ngan haong gah jirah du lịch – dịch vụ, meng di tuk jalan praong Hòa Thắng – Hòa Phú hu peih tabiak ye dom urang buh tame grauk labik lac duah mai piah peih dom labik padeih padai, hotel, kadai mang manyum, labik main di labik tapen tasik.

Ong Đặng Duy Thông – Akaok UBND xã Hòa Thắng (Bắc Bình) brei thau: Gah jalan Hòa Thắng – Hòa Phú hu ngak salah oh lac ngak salih mbaok meta di sa bhum taneh, bo daok daong rik tame bruk paglaong raidiuk di bhap bini manuac urang di dalam xã. Meng thun 2017 mbiah tal masa urak ini, jien mek tame tui kuhria yaok urang jeng tagok, urak ini daok di tanut 46,5 triệu đồng sa urang sa thun. Taphia di nan, dom danak dak gom ahangin jeng rik tame kadung jien kanja palei papla biak praong, dalam nan hu 2 danak dak gom hangin hu ba tame ngak yau ye lac Thuận Nhiên Phong saong Thái Hòa. Meng bruk pamaong ieik tame bruk ngak nong yau meng kan mai ye urak ini urang nong meda thau ngak jirah du lịch, pablei salih, cak rok patagok rilo gah. Bruk salih ini tui njauk jalan ngak di Sarak di Parti huyện, xã ba tabiak.

Bình Thuận daok pamaong tal sa pasak jirah – pahit du lịch – thể thao tasik pakat negar, kayua yau nan ye bruk buh jien tame ngak jalan Hòa Thắng – Hòa Phú daong rik tame bruk pambuak gah jalan tapen tasik di tỉnh, dui atah meng Hàm Tân – La Gi – Hàm Thuận Nam – Phan Thiết – Bắc Bình tal Tuy Phong. Meng urak ini rik tame ngak rilo pandap panda, dịch vụ ka du lịch Bình Thuận saong khik takai rilo tuai damuai daok veik di ini ngan haong tukvak masa suai jang, buh jien tame rilo jang./.

Urang lang: TS. Phú Văn Hẳn - 28/08